Natu ulikeni olupandu lwetu
Edhimbuluko otali ka ningwa mo 17 Apilili
1. Oohapu dhomupisalomi dhini tadhi opalele unene tuu pethimbo lyEdhimbuluko?
1 Omupisalomi ngoka a li i inyengithwa kiilonga yaJehova oyindji yohenda noyehupitho, okwa li a pula a ti: “OMUWA otandi mu futu shike [molwuuwanawa] we auhe e u ningile ndje?” (Eps. 116:12) Kunena, aapiya yaKalunga oye na nokuli omatompelo ogendji gokuulika olupandu. Omathelemimvo konima yokunyolwa kwoohapu ndhika, Jehova okwa li a pe aantu omagano dhingi, sha hala okutya, ekuliloyambo. Sho tatu ilongekidhile edhimbuluko lyeso lyaKristus ndyoka tali ka kala ko mo 17 Apilili, otu na etompelo ewanawa okuulika kutya otwa pandula. — Kol. 3:15.
2. Omolwomatompelo gamwe geni hatu pandula ekulilo?
2 Omayambeko ngoka hatu mono omolwekulilo: Otatu vulu ‘okudhiminwa po oondjo dhetu’ okupitila mekuliloyambo. (Kol. 1:13, 14) Shika oshe tu kwathele tu longele Jehova neiyuvo lya yela. (Heb. 9:13, 14) Otatu vulu okuya koshipala shaJehova tu na omukumo uuna tatu galikana. (Heb. 4:14-16) Mboka ye na eitaalo tali longo mekulilo kaye na tuu etegameno ekumithi lyomwenyo gwaaluhe! — Joh. 3:16.
3. Ongiini tatu vulu okuulika olupandu lwetu kuJehova omolwekulilo?
3 Nkene tatu vulu okuulika olupandu lwetu: Omukalo gumwe moka tatu vulu okuulika olupandu lwetu lwomuule ogwo okuninga elesho lyOmbiimbeli li na ko nasha nEdhimbuluko esiku kehe nokutedhatedha kulyo. MOshungolangelo yOshiingilisa ye 1 Febuluali omu na oshitopolwa tashi ti: “Owi ilongekidhila ngaa esiku lya simanenena lyokomumvo?” shoka sha li sha longekidhwa oku tu kwathela tu ninge ngaaka. Otatu vulu wo okulombwela Jehova megalikano tali zi komutima kutya ekulilo otwe li lenga shi thike peni. (1 Tes. 5:17, 18) Okukala kwetu pEdhimbuluko ngaashi Jesus e tu lombwela, otaku ulike olupandu lwetu. (1 Kor. 11:24, 25) Kakele kaashono, otatu vulu okuholela ohole onene yaJehova nokuhiya aantu oyendji ngaashi tashi vulika ye ye ya gongale pamwe natse. — Jes. 55:1-3.
4. Otu na okukala twa tokola toko okuninga shike?
4 Aapiya yaJehova mboka ye na olupandu itaya ka tala ko okugongala kwEdhimbuluko ku li owala ngaashi hoka kwoshito. Okugongala huka kwokomumvo inaku simanenena tuu! Sho Edhimbuluko tali hedha popepi, natu kale twa tokola toko ngaashi omupisalomi ngoka a nyola a ti: “Omwenyo gwandje, hambelela OMUWA! Ino dhimbwa uuwanawa we.” — Eps. 103:2.