Ulika olupandu omolwomagano omanenenene gaKalunga
1. Omolwashike tu na okupa Jehova olupandu lwa sheywa?
1 Shimwe ‘shomiipewa iiwanawa’ ya dhenga mbanda mbyoka Jehova e tu pa osho ekulilo lyOmwana omuholike. (Jak. 1:17) Olye tu etela omayambeko ogendji, mwa kwatelwa edhiminopo lyoondjo. (Ef. 1:7) Shika otu na oku shi pandula aluhe. Unene tuu sho tu uka poomwedhi dhEdhimbuluko natu tedhatedhe kombinga yomagano ngoka ge na ondilo.
2. Ongiini omaukwanegumbo noohandimwe taya vulu okupandula ekulilo?
2 Kala nokupandula: Omolwashike itaamu longitha ethimbo lyEkonakono lyUukwanegumbo mu endulule uuyelele wu na ko nasha nekulilo moshiwike shoka tashi tetekele Edhimbuluko mo 30 gaMaalitsa mu ulike kutya uukwanegumbo weni owu na olupandu? Lesheni wo Omanyolo gi ikalekelwa kombinga yEdhimbuluko esiku kehe. Kehe gumwe na dhiladhile uuwanawa mboka ekulilo lye mu etela nonkene lye mu kwathela a kale netaloko lyu uka kombinga yaJehova, ye mwene, yayalwe nosho wo yonakuyiwa. Oshiwanawa ngele tamu iyenditha po peimbilo eti-8 ne 109, ngoka tage ki imbwa pEdhimbuloko. — Eps. 77:12.
3. Ongiini tatu vulu okuulika olupandu lwetu?
3 Nkene tatu ulike olupandu: Ngele otwa pandula ekulilo otashi ke tu inyengitha tu lombwele yalwe kombinga yaJehova nohole ye onene sho a tumu Omwana. (Eps. 145:2-7) Omaukwanegumbo gamwe ohagu ulike olupandu mokuninga omalongekidho opo yamwe muukwanegumbo ya kuthe uukwathelikokolindjila muMaalitsa, Apilili naMei. Ngele shika itashi vulika, mbela ito vulu ‘okulongitha ethimbo’ lyoye nawa wu tamunune mo uukalele woye? (Ef. 5:16) Ilongekidheni mu li uukwanegumbo mu ka kuthe ombinga ya gwana mesiku lyi ikalekelwa lyokugandja iifo mo 17 gaApilili. Ngele otu na olupandu otashi ke tu inyengitha tu kwathele yalwe ye ye kEdhimbuluko. (Eh. 22:17) Ninga omusholondondo gwomadhina gaatalelwapo, aakonakonimbiimbeli, aapambele, aaniilonga pamwe nangoye naashiinda mboka to ka hiya kEdhimbuluko nokukala wi ipyakidhila noshikonga.
4. Omomikalo dhini tatu vulu okulongitha ethimbo lyEdhimbuluko pandunge?
4 Poomwedhi dhEdhimbuluko ohatu mono ompito okupandula Jehova omolwomagano ngoka a pa aantu. Natu ninge ngaashi tatu vulu okulongitha ethimbo tu ulike olupandu omolwekulilo lyaJesus ‘nomolwuuyamba we kaawu shi okuyelekwa.’ — Ef. 3:8.