Ethimbo lyEdhimbuluko ndyoka tali ya otali ke tu pa ompito tu ulike olupandu lwetu

1. Edhimbuluko ohali tu pe ompito yini yi ikalekelwa?

¹ Edhimbuluko ndyoka tali ka kala ko mo 14 Apilili otali ke tu pa ompito yi ikalekelwa yokukokeka nokuulika olupandu lwetu omolwuuwanawa waJehova. Ehokololo ndyoka li li muLukas 17: 11-18 otali tu ulukile nkene Jehova naJesus ya tala ko okupandula. Shinikitha oluhodhi, gumwe owala gwomaanashilundu mboka ya li ya aludhwa a li a longitha ompito u ulike olupandu. Monakuyiwa, omagano gekuliloyambo otaga ka aludha aantu thiluthilu komauvu agehe, notage ke shi ninga tashi wapa aantu ya kale nomwenyo sigo aluhe. Nopwaahe na omalimbililo, otatu ka pandula nduno Jehova esiku kehe omolwomalaleko nuuyamba ngoka. Ihe ongiini tatu vulu okuulika olupandu lwetu miiwike tayi ya?

2. Ongiini tatu vulu okukokeka olupandu lwekuliloyambo?

² Kokeka olupandu: Okudhiladhila kombinga yoshinima shontumba okwo haku tu kwathele tu kale tu na olupandu lwasho. Opo tu kwathelwe tu kale tu na olupandu lwekuliloyambo, opu na elandulathano lyelesho lyOmbiimbeli li ikalekelwa lyEdhimbuluko ndyoka li li miinima oyindji, ngaashi moshigwedhelwako B12 shomOmbiimbeli ompe yo-New World Translation, mokalindeli, nosho wo mokambo Konakona Omanyolo esiku kehe. Manga Edhimbuluko inaali thika, otali ka tulwa wo ko-jw.org. Omolwashike itaamu kundathana uuyelele mbuka mu li uukwanegumbo? Okuninga ngaaka otaku ka kokeka olupandu lwetu lwekuliloyambo. Naashika otashi ka nwetha mo nawa eihumbato lyetu. — 2 Kor. 5:14, 15; 1 Joh. 4:11.

3. Omomikalo dhini tatu vulu okuulika olupandu lwetu pethimbo lyoomwedhi dhEdhimbuluko?

³ Ulika olupandu: Olupandu ohalu ulikwa niilonga. (Kol. 3:15) Omunashilundu ngwiyaka e na olupandu okwa li a ningi oonkambadhala a mone Jesus ye e mu pandule. Nopwaahe na omalimbililo, okwa li wo a lombwele yalwe nehwamo kombinga yokwaaludhwa kwe pashikumithalonga. (Luk. 6:45) Mbela olupandu lwekuliloyambo otalu ke tu inyengitha ngaa tu kuthe ombinga nuuladhi moshikonga shokulombwela yalwe kombinga yEdhimbuluko? Okukutha uukwathelikokolindjila nenge okutamununa mo uukalele wetu pethimbo lyoomwedhi dhEdhimbuluko oku li omukalo gulwe omwaanawa gwokuulika olupandu lwetu. Kongulohi yEdhimbuluko, omutima gu na olupandu otagu ke tu inyengitha tu taambe ko aayenda nokukala twi ilongekidha okuyamukula omapulo gawo.

4. Oshike tatu vulu oku ka ninga pethimbo lyEdhimbuluko opo kaatu ki ipe uusama ngele lya piti?

⁴ Mbela ndika otali ka kala Edhimbuluko lyetu lyahugunina? (1 Kor. 11:26) Katu shi shi. Ihe otu shi shi kutya ngele lya piti, ompito ndjoka yi ikalekelwa yokuulika olupandu otayi ka kala ya pita po. Oto ka longitha ngaa ompito ndjoka? Oohapu dhetu dholupandu nokutedhatedha kwomitima dhetu naku nyanyudhe Jehova, ngoka a gandja ekuliloyambo nehalo ewanawa. — Eps. 19:14.