Oshimpungu Shepulo
◼ Omakotampango geni tu na okulandula kombinga yelongitho lyoongodhi dhopeke uuna tu li pokugongala nenge muukalele?
“Ayihe oyi na otundi yayo.” (Omuuv. 3:1): Oongodhi dhopeke ohadhi longithwa okutumina omuntu etumwalaka nenge okupopya naye kehe ethimbo wa hala. Ihe opu na omathimbo gamwe Aakriste haya kala inaaya hala okupiyaganekwa koongodhi dhawo dhopeke. Pashiholelwa, ethimbo lyomakugongala getu olyo ethimbo lyokulongela Jehova, lyokulongwa iinima yopambepo nolyokutungathana. (Deut. 31:12; Eps. 22:22; Rom. 1:11, 12) Onawa ngele tatu dhimi oongodhi dhetu uuna twa thika pokugongala nokulesha owala omatumwalaka getu konima ngele twa piti mo. Ngele otwa tegelela ongodhi ye endelela, onawa tu tule ongodhi yetu yopeke momukalo moka itaayi piyaganeke yalwe.
‘Ninga ayihe omolwevaangeli.’ (1 Kor. 9:23): Omathimbo gamwe ohashi kala sha pumbiwa okulongitha ongodhi muukalele. Pashiholelwa, omumwatate ngoka ta kwatele komeho otashi vulika e yi longithe, opo u uve kutya mboka taya longo pamwe nayo oya gama peni. Omathimbo gamwe aauvithi ohaya longitha oongodhi dhawo dhopeke ya dhengele omuntu ngoka u ulika ohokwe nenge omukonakoni manga inaaye ke mu talela po, unene tu ngele oha zi kokule kashona. Ngele otu na ongodhi yopeke, otu na okusa oshimpwiyu kaayi tu piyaganeke sho tatu popi nomunegumbo. (2 Kor. 6:3) Pehala lyokukala tatu dhenge nenge tatu tumine ookuume omatumwalaka manga twa tegelela aauvithi yalwe, onawa ngele tatu gandja eitulomo kuukalele nosho wo kwaamboka tatu longo nayo.
Kala wu na ko nasha nayalwe. (1 Kor. 10:24; Fil. 2:4): Inatu kala nando kaatu na ko nasha nokuthika pethimbo kelongekidho lyiilonga yomomapya, tatu dhiladhila kutya otatu vulu owala okudhenga nenge okutuma etumwalaka tu mone kutya ongundu otayi uvithile peni. Ngele otwa thiki kwa lata, olundji aantu oye na okutopolululwa. Ethimbo limwe otashi vulika shili tu late omolwoonkalo dhontumba nodhongandi. Ihe ngele otwa kala tu na ondjigilile yokuthika pethimbo, otatu ulike kutya otu na ko nasha nelongekidho lyaJehova, nomumwatate ngoka ta kwatele komeho nosho wo naauvithi ooyakwetu.