Landula oshiholelwa shomupolofeti Joel
1. Ongiini tatu vulu okuholela eifupipiko lyaJoel uuna tatu uvitha?
1 Omupolofeti Joel okwa li lye naanaa? Okwi ipopi ye mwene ta ti kutya oye “Joel yaPetuel.” (Joel 1:1) Omupolofeti nguka omwiifupipiki okwa li a tsu omuthindo etumwalaka lyaJehova ndyoka a humbata, ihe ina gandja eitulomo konkandangala ndjoka ta dhana e li omutumwa. Natse ngele tu li muukalele wetu katu na okwiikongela esimano nenge etumba paumwene, ihe otu na okugandja eitulomo kuJehova nosho wo kOmbiimbeli. (1 Kor. 9:16; 2 Kor. 3:5) Shimwe ishewe, etumwalaka ndyoka hatu uvitha ohali tu nkondopaleke. Iinima yini yi li membo lyaJoel tayi vulu oku tu kwathela tu kale aalaadhi notu na etegameno kunena?
2. Esiku lyaJehova ndyoka li li popepi otali ke tu inyengitha tu ninge shike?
2 ‘Esiku lyaJehova oli li popepi.’ (Joel 1:15): Nonando oohapu ndhika odha nyolwa omimvo omayuvi dha ka pita, tse otu li pethimbo ndyoka dhi li pokugwanithwa thiluthilu. Oonkalo muuyuni otadhi ende tadhi nayipala. Aantu mboka kaaye na ko nasha naamboka haye tu sheke uuna tu li muukalele oye li euliko lela kutya otu li shili momasiku gahuguninga. (2 Tim. 3:1-5; 2 Pet. 3:3, 4) Ngele otwa kala hatu tedhatedha kombinga yehulilo ndyoka li li popepi, nena otatu ka kala twa lenga iilonga yuukalele monkalamwenyo yetu. — 2 Pet. 3:11, 12.
3. Omolwashike uukalele wetu wa simana unene tuu sho ethimbo lyuudhigu uunene tali ende tali hedha popepi?
3 ‘Jehova ota ka popila aantu ye.’ (Joel 3:16): Okukakama hoka kwa tumbulwa movelise ndjika otaku ulike owala sho Jehova ta ka gwanitha epangulo lye pethimbo lyuudhigu uunene. Otashi tu hekeleke okutseya kutya Jehova ota ka hupitha aapiya ye aadhiginini pethimbo ndyoka. (Eh. 7:9, 14) Uuna tatu kutha ombinga miilonga yokuuvitha otatu ka mona nkene Jehova he tu ambidhidha noku tu pa oonkondo. Ngele otu na eitaalo lya kola nosho wo eidhidhimiko otashi ke tu kwathela pethimbo lyuudhigu uunene mboka tawu ke ya.
4. Omolwashike tu na okukala twa nyanyukwa nokutaalela onakuyiwa tu na omukumo?
4 Nonando aantu oyendji otaya ti kutya etumwalaka lyaJoel etilithi, otali pe oshigwana shaKalunga etegameno lya dhenga mbanda lyehupitho. (Joel 2:32) Onkee ano, natu taaleleni onakuyiwa tu na omukumo nosho wo uulaadhi mokuuvitha onkundana ombwanawa yUukwaniilwa waKalunga nokuvulika koohapu dhaJoel 2:23 ndhoka tadhi ti: “Nyanyukweni. Tundulukilweni mbyoka [Jehova, NW] Kalunga keni e yi mu ningile.”