Oshimpungu shomapulo
◼ Omapulo ngoka tashi vulika ga holoke po uuna egongalo lya pulwa li kwathele shi na ko nasha nokuunganeka efumviko:
Olye e na okugandja oshipopiwa shefumviko? Aanegumbo yanakusa oyo ye na okuninga etokolo. Otaya vulu okuhogolola omumwatate kehe ngoka a ninginithwa e na epopilo ewanawa megongalo. Ngele aanegumbo yanakusa oya pula olutu lwaakuluntugongalo lu hogolole omupopi, olutu ohalu hogolola omupopi ngoka a pyokoka oye a gandje oshipopiwa shefumviko shoka sha za kehangano. Nonando omupopi ke na okutanga nakusa mokuhokolola ondjokonona ondeendeeka kombinga ye, oshi li nawa okupopya paufupi kombinga yomaukwatya ge omawanawa ngoka a li e na.
Mbela Oshinyanga shUukwaniilwa oshi na okulongithwa? Eeno, ihe Okomitiye yIilonga yEgongalo oyo yi na okugandja epitikilo, sho oshipopiwa shefumviko kashi na okuya elandulathano lyokugongala moshipala. Oshinyanga shUukwaniilwa otashi vulu okulongithwa ngele nakusa okwa li e na edhina ewanawa, ye okwa li oshilyo shegongalo nenge a li okanona okashona koshilyo shegongalo. Ngele nakusa okwa li a tseyikila eihumbato ewinayi nenge pu na ngaa iinima yilwe mbyoka tashi vulika yi shekithe egongalo, aakuluntugongalo otaya vulu okuninga etokolo opo Oshinyanga shUukwaniilwa kaashi longithwe.
Iinyanga yUukwaniilwa ihayi longithwa mu ningilwe omafumviko gaamboka kaaye shi ooitaali. Ihe poompito dhimwe Oshinyanga otashi vulu ngaa okulongithwa ngele nakusa aanegumbo lye oye li aauvithi ya ninginithwa, ye nakusa okwa tseyika koyendji megongalo kutya okwa li ha popile oshili noku na eihumbato ewanawa momudhingoloko. Melandulathano kamu na okukwatelwa oonkuluhedhi dhiinima mbyoka hayi ningwa muuyuni.
Uuna epitikilo lyokulongitha Oshinyanga shUukwaniilwa lya gandjwa, aakuluntugongalo oye na okutala ngele aantu momudhingoloko oye shi taamba ko ngaa okweeta oshiketha mOshinyanga pethimbo lyoshipopiwa shefumviko. Ngele osha taambiwa ko otamu vulu okweeta oshiketha mOshinyanga shUukwaniilwa.
Ongiini shi na ko nasha nomafumviko gaantu yomuuyuni? Ngele nakusa okwa li e na edhina ewanawa momudhingoloko, nena omumwatate ota vulu okugandja oshipopiwa shehekeleko sha kankamena kOmbiimbeli te shi ningile pegumbo nenge komayendo. Egongalo itali ka uungaunga nefumviko lyomuntu ngoka e na eihumbato lya nyata, ha ningi iinima mbyoka yaahe li pampango nenge ngoka onkalamwenyo ye yi li ompinge nomakotampango gOmbiimbeli. Ihe omumwatate ke na okupitika omaitaalo gi imbwange mumwe mokukala ta kwatele komeho efumviko ta ningi omalufo nomusita gulwe nenge a kuthe ombinga mefumviko uuna tali ningilwa mongeleka yaBabiloni Oshinene.
Ongiini mbela ngele nakusa okwa kondwa? Osha pumba lela egongalo li kwa telwe mo. Oshinyanga shUukwaniilwa kashi na okulongithwa ngele nakusa okwa kondwa. Ngele nakusa okwa li tu ulike sha yela kutya okwiiyela ombedhi nokwa hala okugalukila megongalo, omumwatate ngoka eiyuvo lye tali mu pitike a gandje oshipopiwa sha kankamena kOmbiimbeli ota vulu oku shi ningila pegumbo nenge komayendo. Kungawo ota ka gandja uunzapo kwaamboka kaaye shi ooitaali nokuhekeleka aakwanezimo yanakusa. Ihe manga omumwatate inee shi ninga, otashi ka kala shi li pandunge a popye nolutu lwaakuluntugongalo nokutala kutya otalu mu pe omayele ga tya ngiini. Poompito mpoka aamwatate itaaya vulu okukutha ombinga, otashi vulika shi kale nawa ngele omumwatate ngoka e li omukwazimo gwopepi nanakusa oye a gandje oshipopiwa a hekeleke aakwanezimo.