Okufaalela omuntu iifo aluhe ohaku kwathele okutameka omakonakonombiimbeli
1. Omolwashike ehangano lyaJehova lya kala nokuladhipika aauvithi ya tameke okufaalela aantu iifo pandjigilile?
1 Nonando aantu oyendji oye hole okulesha iifo yetu, haaluhe ye hole okukonakona Ombiimbeli natse. Nomolwaashono ehangano lyaJehova lya kala nokuladhipika aauvithi ya tameke okufaalela aantu iifo pandjigilile. Olundji aantu mboka haya lesha iifo yetu pandjigilile ohaya ka kala ya sa enota lyOohapu dhaKalunga. (1 Pet. 2:2) Hugunina, otashi vulika ya ka leshe oshinima shoka tashi ke yi inyengitha ya taambe ko ekonakonombiimbeli.
2. Ongiini tatu vulu okukokeka ohokwe mwaamboka hatu pe iifo pandjigilile?
2 ‘Tekela’ oombuto dhoshili: Pehala lyokupa owala omunegumbo iifo e to zi po oshe endelela, omolwashike itoo tameke oonkundathana naye, opo mu tseyathane? Shika otashi ke ku kwathela wu tseye onkalo ye, shoka e hole naashoka i itaala, opo wu vule okupopya naye nowino. (Omayel. 16:23) Ilongekidhila etalelopo kehe. Ngele otashi wapa, kundathana naye paufupi oshitsa shontumba nenyolo lyasho okuza moshifo. Kungeyi oto tekele oombuto dhoshili ndhoka dhi li momutima gwe. (1 Kor. 3:6) Nyola esiku lyetalelopo kehe, iileshomwa mbyoka we mu pe, shoka mwa kundathana nosho wo omanyolo ngoka mwa lesha.
3. Mboka hatu faalele iifo pandjigilile otu na oku ya talela po lungapi?
3 Owu na oku ya talela po lungapi? Owu na oku shi ninga lumwe momwedhi sho to ya faalele iifo iipe. Ihe oto vulu wo oku ya talela po olundji shi ikolelela koonkalo dhoye nosho wo kohokwe yawo. Pashiholelwa, konima yoshiwike shimwe nenge iyali, oto vulu okushuna ko to ti: “Onde ende po owala ndi ku ulukile oshitsa shimwe miifo mbyoka nde ku pele.” Shika otashi ka pendutha ehalo muye lyokulesha oshitopolwa shoka. Ngele okwe shi lesha nale, mu pula kutya ote shi tile ngiini e tamu shi kundathana paufupi. Ngele oku hole okulesha iileshomwa yetu, oto vulu oku mu talela po e to mu pe okafo, okambo nenge embo ndyoka tali gandjwa omwedhi ngoka.
4. Oshike tatu vulu okuninga omathimbo gamwe opo tu tale ngele mboka hatu faalele iifo oya hala okukonakona Ombiimbeli?
4 Ino tegelela omunegumbo e ku pule ekonakonombiimbeli. Oto vulu oku mu pula. Nonando monakuziwa okwa li a tindi ekonakonombiimbeli, omathimbo gamwe oto vulu oku mu ulukila oshitopolwa “Omapulo gopaMbiimbeli taga yamukulwa,” shoka hashi holoka aluhe mOshungolangelo e to tala ngele okwa hala mu shi kundathane. Otashi vulika wu tameke ekonakonombiimbeli petalelopo ndyoka to ningi pethimbo mpoka. Ihe ngele ino vula okutameka ekonakonombiimbeli, tsikila oku mu faalela iifo opo wu penduthe ohokwe muye.