Nkene tatu vulu okuhwepopaleka uunkulungu wetu muukalele — Okukala nomukalondjigilile gwokufala iifo

Omolwashike sha simana?: Aantu oyendji mboka ye hole okulesha iifo yetu ihaya kala ya hala okukonakona Ombiimbeli natse. Tashi vulika molwaashoka ya hokwa elongelokalunga lyawo, nenge ye wete kutya kaye na ethimbo lyokukonakona. Ihe sho haya lesha iifo yetu pandjigilile, otashi vulika ya tameke okukala ya sa enota lyOohapu dhaKalunga. (1 Pet. 2:2) Otashi vulika ya gumwe koshitopolwa shontumba, nenge oonkalo dhawo tashi vulika dhi lunduluke. Oku ya talela po paufupi pandjigilile otaku ke ya ningitha ya kale ye tu mangulukila noku tu kwathela tu tseye shoka ye hole naashoka tayi ipula nasho. Mokweendela ko kwethimbo, otashi vulika ekonakonombimbeli li tamekwe.

Nkene tatu vulu oku shi ninga:

Omwedhi kehe, ninga elandulathano lyokufaalela aantu iifo iipe yOshungolangelo no-Awake! Oto vulu oku mu talela po pethimbo lilwe momwedhi opo wu mu ningithe a kale e na ohokwe moshitopolwa shimwe shoka shi li moshifo shoka wa li we mu thigilile nenge wu mu pe oshileshomwa shoka tashi gandjwa omwedhi ngoka. Ninga omandhindhiliko gaamboka wa pa naashoka we ya pa. — Tala Uukalele Wetu wUukwaniilwa waJanuali 2014, ep. 3.
Ilongekidhila etalelopo kehe. Pehala lyokupitika po owala iifo, kundathana nomunegumbo e to kambadhala okupanga uukuume naye opo wu mu ningithe a kale e na ohokwe.
Kala wi ilongekidhila oompito opo wu tameke ekonakonombiimbeli. Ngele gumwe ngoka ho faalele iifo okwe ku pula shoka Ombiimbeli tayi ti kombinga yoshikundathanwa shontumba, mu etela oshileshomwa shoka shi na eyamukulo e to li kundathana naye. Manga inoo ya, mu pula epulo lya pambathana e to ya mu li kundathane petalelopo tali landula. Ngele oho kundathana naye pandjigilile nokuli nando opaufupi to longitha Ombiimbeli nenge shimwe shomiileshomwa yokukonakonwa, nena ngawo oto ningi ekonakono. Mbela owa pa omunegumbo okabroshure Onkundana Ombwanawa nowu ulika paufupi kutya ekonakonombiimbeli ohali ningwa ngiini? Owe mu ulukila ngaa okavidio Omolwashike wa pumbwa okukonakona Ombiimbeli? nosho wo Oshike hashi ningwa pokugongala kwOonzapo dhaJehova? Nokuli nando monakuziwa omuntu kali a hala ekonakono, oonkalo ohadhi lunduluka. Mbela itashi ka kala shi li nawa ngele owa kambadhala ishewe?

Kambadhala oku shi ninga momwedhi ngu:

Ninga omusholondondo gwaamboka wa hala okukala ho faalele iifo. Ya pa iifo iipe, e to ya lombwele kutya oto ya etele ishewe tayi landula ko.