Longitha nawa iifo iikulu

Molwaashoka kapu na ngoka ha mono uuwanawa miifo iikulu mbyoka ya pungulwa nenge ye ekelwahi, otu na okukambadhala tu yi gandje po muukalele. Oshifo shimwe otashi vulu okupendutha ohokwe momuntu yokutaamba ko oshili noku mu inyengitha a tameke okwiithana edhina lyaJehova. (Rom. 10:13, 14) Mpaka otapu landula omaetopo gankene tatu vulu okulongitha nawa iifo iikulu.

• Uuna tamu uvitha miitopolwa mbyoka ihaayi longwa olundji, pegumbo mpoka kaapu na aantu otashi vulika shi li nawa mu thige oshifo mpoka itaashi vulu okudhanwa po.

• Ngele tamu gandja uunzapo womontaneho pomahala mpoka aantu haya kala ya tegelela, ngaashi pomathikameno goombesa nenge piitaasi yomashina gokolutenda, pula oohandimwe ngele oya hala oshifo shokulesha, yu ulukila iifo ya yoolokathana, nokweetha ya hogolole po.

• Ngele tamu talele po omahala gokuyogela, omagumbo gaakulupe, uupangelo, nenge omahala ga faathana ngoka ge li moshitopolwa shegongalo lyeni, thiga omwaalu omushona gwiifo iikulu pomahala gokutegelela. Olundji ohashi kala shi li nawa okupula tango epitikilo kwaangoka ta tonatele ehala ndyoka. Ngele owu wete kutya opwa tulwa nale iileshomwa, ino gwedha po.

• Ngele to iilongekidhile omaishunoko, dhiladhila konkalo yomuntu kehe ngoka wa hala oku ka talela po. Mbela oku na uukwanegumbo? Mbela oku hole okuya momalweendo? Mbela oku hole iikunino? Tala miifo iikulu ngele omu na oshitopolwa shoka ta vulu okunyanyukilwa okulesha, shi mu ulukila ngele wa shuna kuye.

• Ngele pegumbo owa adha po omuntu ngoka u ulikile ohokwe konima sho wa kala to mu talele po ihe ino mu adha po, mu ulukila iileshomwa iikulu mbyoka inaa mona.