Oshimpungu Shepulo

◼ Aanona oye na okwiilonga shike opo ya koke pambepo?

Aavali Aakriste ohaya ningi oshindji ‘mokuputudha oyana noku ya kumagidha pauKriste.’ (Ef. 6:4) Pashiholelwa, aavali oya mona shi li nawa ya kale haya kundathana noyana enyolo lyesiku ongulonene kehe. Pethimbo lyelongelokalunga lyuukwanegumbo nosho wo pethimbo lilwe, omaukwanegumbo otashi vulika ga tale nokukundathana okavidio, okupopya kombinga yuuyelele mboka wa za miitopolwa yo-Young People Ask, okudhana iinyandwa kombinga yomahokololo gOmbiimbeli, nenge okuninga omaidheulo. Onkee ano, opo aanona ya ‘lalakanene uukuluntu,’ oye na wo okulongwa ooshili dhOmbiimbeli dhomuule. — Heb. 6:1.

Natu dhiladhile kwaashoka hatu longo mboka hatu tsakanene nayo moshitopolwa shetu. Petalelopo lyotango nenge peishunoko, ohatu kambadhala tu tameke ekonakonombiimbeli tatu longitha embo Omalongo gashili gOmbiimbeli ogeni naanaa? Uuna twa mana ko oshileshomwa shoka, ohatu longitha embo ‘Ikalekeni mohole yaKalunga.’ Omolwashike? Embo Omalongo gOmbiimbeli ohali pe aalongwa ontseyo yopetameko yOmanyolo. Embo ‘Ohole yaKalunga’ ohali ya longo nkene taya vulu okutula miilonga omakotampango gOmbiimbeli monkalamwenyo yakehe esiku. Okukundathana iileshomwa ayihe ohaku kwathele mboka aape ya kale ya ‘dhama muKristus nokukala meitaalo shi vulithe shito.’ (Kol. 2:6, 7) Mbela iileshomwa mbyoka itayi ka etela wo aanona yetu uuwanawa? Nayo wo oya pumbwa okulongwa kombinga yekuliloyambo, yUukwaniilwa nosho wo yonkalo yoonakusa. Aanona oya pumbwa wo okutseya kutya omolwashike Kalunga e etha okumona iihuna ku kale po nankene tatu vulu okudhimbulula mo omasiku gahugunina gonkalelo ndjika. Oye na okukala ya tompwa kutya Oonzapo dhaJehova odhi shi oshili. Aagundjuka oya pumbwa wo okutseya omakotampango gOmbiimbeli nankene ye na okukala “yi ilonga noyi igilila okuyoolola.” (Heb. 5:14) Eeno shili, aavali oye na okutala koomvula nokonkatu ndjoka okanona ke li. Ihe aanona oyendji ohaya vulu okutameka okwiilonga ooshili dhOmbiimbeli dhomuule nokuli nuuna aashona lela. — Luk. 2:42, 46, 47.