Longitha o-Web Site yetu wu longe aamwoye
1. Elalakano lyoshitopolwa “Children,” shono shi li ko-Web site yetu olyashike?
1 Ko-Web site yetu, jw.org oku na iinima mbyoka tayi hokitha aantu yomapipi agehe. Uuna wa yi ko tala mpoka mpwa nyolwa “Find resources for” e to thindi mpoka mpwa nyolwa “Children,” oshitopolwa shoka osha nuninwa aanona naavali ya kale ye na ekwatathano lya kola notashi ya kwathele ya hedhe popepi naJehova. (Deut. 6:6-7) Ongiini to vulu oku shi longitha wu longe aamwoye?
2. Ongiini to vulu okuhogolola uuyelele mboka tawu opalele aamwoye?
2 Tala oompumbwe dhokanona kehe: Okanona kehe oke na oompumbwe dhi ili. (1 Kor. 13:11) Oshike tashi ke ku kwathela wu hogolole uuyelele mboka tawu opalele aamwoye? Ipula to ti: ‘Mbela aamwandje otaya ka kala ya hokwa shike? Mbela otaye ke shi uva ko tuu shili? Mbela otaya ka kala ngaa ye shi hokwa ethimbo ele? Oto vulu okulongitha omahokololo ngoka taga adhika kohi yokapalanyolo “My Bible Lessons” wu longe aanona yomimvo ndatu oku uka pevi. Aanamagumbo yamwe oye hole omahokololo gOmbiimbeli ngoka ge li moshitopolwa “Teach Your Children” ko-Web site yetu. Opu na wo iinima yilwe mbyoka to vulu okuninga.
3. Ongiini aavali taya vulu okulongitha omahokololo nosho wo iinima mbyoka yi li moshitopolwa “Family Worship Projects” ko-Web Site yetu?
3 Oshitopolwa Family worship projects: Moshitopolwa moka omu na iinima mbyoka tayi kwathele omitse dhomagumbo dhi kale hadhi konakona noyana. Thinda mpoka pwa nyolwa download e to lesha mpoka pwa nyolwa “Parents’ Guide.” wu lombwelwe shoka wu na okuninga. Longa aamwoye to longitha omathano ngoka ge li mpoka pwa nyolwa picture activity. Kwathela aamwoye mboka ya kaha ya mane oshitopolwa shoka sha nyolwa study activity. Aanona ayehe yomimvo dha yoolokathana otaya vulu okukutha ombinga miinima mbyoka, molwaashoka iitopolwa mbyoka ayihe oya pamba iiyilongomwa nenge omahokololo ga faathana okuza mOmbiimbeli.
4. Oshike shi li moshitopolwa “Become Jehovah’s Friend”?
4 Oshitopolwa Become Jehovah’s friend: Oshitopolwa shoka oshi li ko-Web Site yetu. Oshi na uuvidio, omaimbilo nosho wo iinima yilwe mbyoka tayi vulu okukwathela aavali ya thindile Oohapu dhaKalunga moyana mboka aashona. (Deut. 31:12) Uuvidio mboka uufipi, na kehe kamwe komuwo oke na oshiilongomwa sha simana. Iinima mbyoka hayi ningwa mo ngaashi omaudhano ngoka ge li mo otaga ulike esimano lyiiyilongomwa mbyoka. Ko-Web Site yetu ohaku kala aluhe omaimbilo, molwaashoka aanona oye hole okwiimba, go omaimbilo ohage ya kwathele ya dhimbulukwe iinima mbyoka tayi ilongo.
5. Omolwashike aavali ye na okupula Jehova e ya kwathele ya longe oyana oshili?
5 Jehova okwa hala aavali amuhe mu pondole mokuputudha oyana yeni. Onkee ano, mu indileni e mu kwathele mu longe aanona yeni oshili. (Aatok. 13:8) Kekwatho lyaJehova otamu ka vula okudheula aanona yeni ya kale ye na ‘oondunge ndhoka tadhi ke ya thikitha mehupitho, sho yi itaala Jesus Kristus.’ — 2 Tim. 3:15; Omayel. 4:1-4.