Okuhwepopaleka uunkulungu wetu muukalele — Tameka oonkundathana wu gandje uunzapo wontukuluka

Omolwashike sha simana?: Uuna tatu longo egumbo negumbo, aantu oyendji ihatu ya adha mo. Ihe ohashi vulika tu ende pamwe nayo miiyenditho yaayehe nokutsakanena nayo kiipangelo. Ohashi vulika hatu kala nayo uuna tu li pokafudho kiilonga nenge koosikola nosho tuu. Jehova okwa hala aantu ayehe yu uve etumwalaka lyUukwaniilwa, opo ya hupithwe. (1 Tim. 2:3, 4) Olundji otse tu na okukatuka oonkatu ndhoka tadhi fala sigo omokugandja uunzapo wontukuluka.

Nkene tu na oku shi ninga:

Kala wu shi okutongolola aantu. Mbela omuntu ota monika omunambili noku na ehalo lyokupopya? Mbela omudhingoloko nonkalo otayi mu pitike ngaa mu popye mwa manguluka? Aauvithi yamwe ohaya tala omuntu tango koshipala, nopo nduno tayi imemeha. Uuna omuntu i imemeha ohaya tameke oonkundathana naye.
Ngele ku na uulaadhi wokupopya, galikana paufupi meimweneneno. — Neh.2: 4; Iil. 4:29.
Popitha omuntu tango. Sho Jesus a li ta kundathana nomukiintu Omusamaria, ina tameka owala ta popi kombinga yUukwaniilwa. (Joh. 4:7) Omathimbo gamwe otashi vulika wu tameke oonkundathana nomapandulo. Oto vulu okutya “aamwoye ohayi ihumbata nawa shili.” Omukalo gulwe tatu vulu okulongitha ogwo okupula omapulo. Oto vulu okupula to ti: “Owa mona ngaa shoka shu ulikwa koonkundana ongulohi, nenge owu uva ngaa shoka sha popiwa moonkundana ongulohi?”
Uuna wa tameke, tala kutya omukalo guni to vulu okulongitha wu lombwele omuntu onkundana ombwanawa. Ihe ino kala we endelela unene, etha oonkundathana dhi tameke momukalo ngoka aantu haya popi paunshitwe. Oto vulu okupopya sha, shoka tashi nywitha omakutsi wu penduthe ohokwe yomuntu a pulakene, ye a kale a hala okuuva nawa. Pashiholelwa, oonkundathana otashi vulika dhi kale kombinga yiinima yomagumbo. Oto vulu wu tye: “Onda mona omayele gamwe ge shi okwiinekelwa ge na ko nasha nokuputudha aanona.” Ngele oto kundathana oshinima shoka sha popiwa nenge shu ulikwa moonkundana oto vulu okutya “omasiku ngano onda lesha onkundana ombwanawa lela.” Ngele oonkundathana odha hulu manga inoo gandja uunzapo, ino tyololoka.
Kala wu na uufo niileshomwa yilwe mbyoka to vulu okupa kehe ngoka tu ulike ohokwe.

Kambadhala wu shi ninge momwedhi ngu:

Itulila po elalakano wu kale ho tameke oonkundathana oshiwike kehe nelalakano lyokugandja uunzapo wontukuluka.