Landula oshiholelwa shomupolofeti — Nahum
1. Oshike tatu ilongo membo lyaNahum?
1 Omakulukuma gaNinive shonale otaga gandja uunzapo kutya ngaashi owala Nahum a li a hunganeke, Jehova oha geyele aatondi Ye nosho wo kutya nokuli nomapataneko gonyanya itaga vulu oku mu ninga sha. (Nah. 1:2, 6) Okukonakona nawa ehunganeko lyaNahum otaku tu longo sha shi na ko nasha nuukalele wetu.
2. Ongiini tatu vulu okukaleka etumwalaka lyetu ewanawa?
2 Hekeleka yalwe noku ya pa etegameno: Membo lyaNahum shampa wa lesha mo owala to endelele ohashi vulika wu mone kutya otamu popiwa owala etumwalaka lyepangulo lyaNinive, oshilando shonale shaAssur sha li shi na aantu ye na uuntsa. (Nah. 1:1; 3:7) Ihe etumwalaka ndika lyepangulo olya li ewanawa koshigwana shaJehova. Nahum, ngoka edhina lye tali ti “Omuhekeleki,” okwa li a shilipaleke Aajuda ooyakwawo kutya masiku omutondi gwawo ita ka kala po we! Nahum okwa tsikile ko ta shilipaleke kutya Jehova “ota gamene aantu ye methimbo lyuudhigu.” (Nah. 1:7) Sho tatu uvithile aantu, natse wo otatu ya lombwele onkundana ombwanawa noku ya ladhipika ya konge egameno muJehova. — Nah. 1:15.
3. Ongiini tatu vulu okuholela Nahum mokulongitha iiholelwa nenge omathaneko?
3 Longitha iiholelwa nomathaneko: Jehova okwa li a nwetha mo Nahum a yelekanithe ohugunina yaNinive naandjoka yoshilandopangelo shaEgipiti No-Amon, shoka sha li sha hanagulwa po nale kuAssur mwene. (Nah. 3:8-10) Sho tatu popi nayalwe kombinga yehulilo lyonkalelo ndjika yiinima ya kolokosha, otatu vulu okutsa omuthindo omahunganeko gOmbiimbeli ngoka taga gandja uunzapo kutya Jehova oha gwanitha oohapu dhe itaa thigi ko sha nando. Pashiholelwa, sho Aababilonia nAamedia ya li ya homona oshilando Ninive momumvo 632 K.E.N., omvula yepoola oya li ya ningitha omulonga gwaTigris gu kunguluke, etagu gwitha po ombinga yimwe yomankolokuma omanene goshilando. Ninive osha li nduno sha kwatwa ko nziya, ngaashi owala Jehova a li e shi hunganeke. — Nah. 1:8; 2:6.
4. Ongiini tatu vulu okupopya momukalo gwa yela nogu uvitikiwe ko muukalele?
4 Popya momukalo gwa yela nogu uvitikiwe ko: Omukalo gwaNahum gwokunyola otagu ndjandjukununa nogu li pamukalo gwoshinyandwa. Iitsa ye oya li ya yela. (Nah. 1:14; 3:1) Sha faathana, otwa hala okupopya elaka ndyoka li uvitikiwe ko nuupu. (1 Kor. 14:9) Sho to popi nomuntu oshikando shotango, yelitha nawa etompelo lyetalelopo lyoye. Sho to konakona Ombiimbeli noohandimwe, ya kwathela ya kale ye na eitaalo muJehova nomOohapu dhe noya kale ye wete kutya uuyelele mboka owe ya guma ngiini paumwene. — Rom. 10:14.
5. Eshilipaleko lini tatu adha mehunganeko lyaNahum?
5 Einekelo lyaNahum megwanitho lyoohapu dhaJehova ndhoka itaadhi vulu okwiipwililikilwa oli iwetikile nawa membo lyOmbiimbeli ndyoka lye mu lukilwa. Sho ehulilo lyonkalelo yaSatana tali hedha popepi, ohatu mono ehekeleko moohapu dhaKalunga ndhika tadhi ti: “Omahepeko itage ya lwaali.” — Nah. 1:9, OB-1954.