Okugongala kwiilonga yomomapya hoka taku gwanitha po elalakano lyakwo
1. Okugongala kwiilonga yomomapya okwa nuninwa shike?
1 Pompito yimwe, Jesus okwa li a gongala naalongwa ye 70 manga inaaya tameka oshikonga shokuuvitha. (Luk. 10:1-11) Okwa li e ya ladhipike moku ya dhimbulukitha kutya kaya li taya ka kala oyo ayeke, kokutya oya li taya wilikwa ‘kumwene gwiilya,’ Jehova. Okwa li wo e ya pe omalombwelo ngoka ga li ge ya dheula ya vule okugwanitha po oshilonga, nokwa li e ya unganeke ‘kooyaali nooyaali.’ (OB-1954) Kunena, okugongala hoka hatu kala tu na manga inaatu ya muukalele okwa nuninwa oku tu ladhipika, oku tu dheula noku tu unganeka.
2. Okugongala kwiilonga yomomapya oku na okukala ethimbo li thike peni?
2 Ngashingeyi okugongala kwiilonga yomomapya ohaku kala ku na ominute 10 dhu uka po-15, hoka kwa kwatela mo okuunganeka oongundu, okuulika kutya oshitopolwa shini tashi ka longwa, nokugalikana. Ngashingeyi opwa ningwa elunduluko. Okutameka muApilili, okugongala kwiilonga yomomapya itaku ka kala we kwa konda pominute heyali. Ihe, uuna kwa landula okugongala kulwe kwegongalo, oku na nokuli okukala okuhupi, molwaashoka mboka ye li po oya nyanyukilwa nale oonkundathana dhopamanyolo. Ngele okugongala okuhupi otaku ka pa ayehe ompito ya longe ethimbo olindji muukalele. Noshikwawo, ngele aakokolindjila nenge aauvithi oya tameke okuuvitha manga okugongala kwiilonga yomomapya inaaku tameka, okugongala hoka oku na okukala okuhupi.
3. Ongiini okugongala kwiilonga yomomapya taku vulu okukala kwa longekidhwa opo ku kale taku kwathele aauvithi?
3 Okugongala kehe kwiilonga yomomapya oku na okukala kwa longekidhwa opo ku kale taku kwathele lela aauvithi. Momagongalo ogendji ohashi kala shi li nawa opo oongundu dhiilonga yomomapya dhi tsakanene pomahala ga yoolokathana pehala lyokutsakanena pehala limwe. Shika otashi vulu oku shi ninga oshipu kaauvithi okuya kehala hoka taku ningilwa okugongala kwiilonga yomomapya nenge koshitopolwa. Aauvithi otaya vulu okuunganekwa nziya, notashi vulika shi ka kale oshipu komutonateli gwongundu a gandje eitulomo lela kwaamboka ye li metonatelo lye. Olutu lwaakuluntugongalo otalu vulu okukaleka momadhiladhilo oonkalo dhomoshitopolwa yo taya tokola kutya oshini tashi opalele. Manga okugongala inaaku hulithwa negalikano pauhupi, ayehe oye na okutseya kutya otaya ka longela peni nosho wo kutya otaya ka longa nalye.
4. Omolwashike okugongala kwiilonga yomomapya kaaku na okutalika ko kwa fa inaaku simana ku vulike kokugongala kulwe kwegongalo?
4 Kapu na okugongala kulwe kwegongalo kwa simana ku vule okugongala huka: Molwaashoka okugongala kwiilonga yomomapya ohaku ningwa omolwuuwanawa waamboka taya yi muukalele, aakwanegongalo ayehe itaya pumbwa okukala po. Ihe, shika inashi hala okutya oku na okutalika ko inaaku simana ku vulike kokugongala kulwe kwegongalo. Ngaashi owala okugongala kwetu kehe, okugongala kwiilonga yomomapya oku li esiloshimpwiyu lya za kuJehova ndyoka hali tu kwathele tu kwathathane nokulongelathana uuwanawa. (Heb. 10:24, 25) Onkee ano, omukwatelikomeho oku na okukala i ilongekidha nawa opo oonkundathana dhi kale tadhi simanekitha Jehova nokweetela uuwanawa mboka ye li po. Ngele otashi opalele, aauvithi mboka taya yi muukalele oye na okuninga oonkambadhala opo ya kale po.
Okugongala kwiilonga yomomapya kaku na okutalika ko inaaku simana ku vulike kokugongala kulwe kwegongalo
5. (a) Omutonateli gwiilonga ota dhana onkandangala yini mokuunganeka okugongala kwiilonga yomomapya? (b) Ongiini omumwameme ta vulu okukwatela komeho okugongala kwiilonga yomomapya?
5 Omukwatelikomeho oku na okukala i ilongekidha: Opo omuntu a kale i ilongekidha nawa a vule okukwatela komeho oshitopolwa shontumba pokugongala, okwa pumbwa okupewa oshinakugwanithwa she komeho yethimbo. Shika osha faathana nokugongala kwiilonga yomomapya. Eeno, uuna oongundu dhiilonga yomomapya tadhi gongala pomahala ga yoolokathana, aatonateli yoongundu nenge aayambidhidhi yawo ohaya kwatele komeho okugongala kwoongundu dhawo. Onkee ano, uuna oongundu dhegongalo tadhi imbwanga mumwe, omutonateli gwiilonga ota ka tula po ngoka ta kwatele komeho. Aatonateli yamwe yiilonga ohaya gandja omalandulathano kaakwatelikomeho ayehe yo taya tula elandulathano limwe kekatha lyomauyelele. Omutonateli gwiilonga oku na okulongitha oondunge dhokuyoolola uuna ta tula po ngoka ta kwatele komeho, a kaleka momadhiladhilo kutya uuwanawa mboka tawu ka za mokugongala huka otawu ki ikolelela wo kokulonga nokokwiilongekidha kwaangoka ta kwatele komeho. Ngele kapu na omukuluntugongalo, omuyakuligongalo, nenge omumwatate gulwe a ninginithwa ngoka a pyokoka pambepo opo a kwatele komeho omasiku gamwe, omutonateli gwiilonga oku na okutula po omumwameme a pyokoka pambepo a ninginithwa oye a kwatele komeho.—Tala oshitopolwa “Uuna omumwameme e na okukwatela komeho.”
6. Omolwashike sha simana komukwatelikomeho ngoka a tulwa po i ilongekidhe nawa?
6 Uuna twa pewa oshitopolwa mOsikola yOkudheula Aauvithi nenge mOkugongala kwoPailonga, otu na oku shi tala ko sha simana nokwiilongekidha nawa. Yamwe yomutse ohatu tegelele sigo twa yi mondjila opo tatu tameke okudhiladhila kwaashoka tatu ka tya. Oshinakugwanithwa shokukwatela komeho okugongala kwiilonga yomomapya oshi na okukala sha talika ko momukalo gwa faathana. Ngashingeyi okugongala hoka otaku ka kala okuhupi, okwiilongekidha nawa okwa simana unene opo okugongala hoka ku kale taku ti sha noku hule pethimbo. Okwiilongekidha nawa okwa kwatela mo wo okumona kutya oshitopolwa shini tashi ka longwa komeho yethimbo.
7. Iinima yini omukwatelikomeho ta vulu okukundathana?
7 Shoka ta ka popya: Molwaashoka oonkalo odha yoolokathana miitopolwa, ‘omupiya omudhiginini’ ina gandja omusindilo gwaashoka shi na okukundathanwa pokugongala kwiilonga yomomapya. Oshimpungu shi na oshipalanyolo, “pokugongala kwiilonga yomomapya, otamu vulu okukundathana,” oshi na iinima mbyoka tayi vulu okukundathanwa. Olundji okugongala otaku ka ningwa ku li oonkundathana. Omathimbo nomathimbo otashi vulika ku kwatele mo euliko lyi ilongekidhwa nawa nenge okavidio koko-jw.org. hoka ta ka opalele. Uuna omukwatelikomeho ti ilongekidhile okugongala kwiilonga yomomapya, oku na okudhiladhila kombinga yaashoka tashi ka ladhipika nokudheula mboka taya yi muukalele esiku ndyoka.
Uuna omukwatelikomeho ti ilongekidhile okugongala kwiilonga yomomapya, oku na okudhiladhila kombinga yaashoka tashi ka ladhipika nokudheula mboka taya yi muukalele esiku ndyoka
8. Oshike tashi ka kala oshiwanawa unene okukundathana pokugongala kwiilonga yomomapya mOolyomakaya nomOosoondaha?
8 Pashiholelwa, mOolyomakaya aauvithi oyendji ohaya gandja Oshungolangelo no-Awake! Aantu oyendji mboka haya yi muukalele mOlyomakaya ihaya yi mo mokati koshiwike, onkee ano, otashi vulika shi kale oshidhigu okudhimbulukwa efalomo ndyoka ya li yi ilongekidha pesiku lyElongelokalunga lyUukwanegumbo. Onkee ano, otashi vulika shi kale shi li nawa komutonateli e endulule limwe lyomiiholelwa yomafalomo konima yUukalele Wetu wUukwaniilwa. Omikalo dhilwe odha kwatela mo okukundathana nkene tamu vulu okukwatela mo oonkundana dhomoshitopolwa, oshiningwanima nenge efudho lyontumba mefalomo li li moshifo nenge nkene mu na okutula po ekankameno lyoonkundathana dhomoshikando tashi landula ngele omuntu okwa taamba iifo. Ngele yamwe pokugongala kwiilonga yomomapya oya kala taya longitha iifo mbyoka tayi gandjwa, omukwatelikomeho ota vulu oku ya pula ya ninge omatyokosha pauhupi nenge ya popye iimoniwa yawo. MOosoondaha, omukwatelikomeho otashi vulika a hogolole okuninga sha faathana shi na ko nasha naashoka tashi gandjwa momwedhi ngoka. Iileshomwa yokukonakonwa, ngaashi Onkundana Ombwanawa naPulakena kuKalunga nosho wo embo Omalongo gOmbiimbeli otayi vulu okugandjwa ethimbo kehe, onkee omukwatelikomeho ota vulu okukwatela mo pauhupi nkene shimwe shomiileshomwa mbika tashi vulu okugandjwa.
9. Oshike tashi vulu okukundathanwa mehuliloshiwike sho taku ningwa oshikonga shi ikalekelwa?
9 Ngele egongalo otali ningi oshikonga shi ikalekelwa mehuliloshiwike, omukwatelikomeho otashi vulika a tale kunkene iifo yomwedhi ngoka tayi vulu okugandjwa pamwe nokafo kehiyo nenge ta vulu okukundathana shoka egongalo tali vulu okuninga ngele opu na ngoka u ulika ohokwe. Omukalo gulwe otagu ka kala okuhokololelathana iimoniwa mbyoka tayi ulike kutya iikonga mbyoka oya simana.
10, 11. Omolwashike aauvithi ya pumbwa okwiilongekidha opo okugongala kwiilonga yomomapya ku kale taku pondola?
10 Okwiilongekidha kwaauvithi: Aauvithi nayo oye na ombinga mokuningitha okugongala kwiilonga yomomapya ku kale taku pondola. Mokukala yi ilongekidhila okugongala kwiilonga yomomapya komeho yethimbo, tashi vulika pethimbo lyelongelokalunga lyuukwanegumbo, otaya ka vula okutopolelathana naauvithi yalwe. Okwiilongekidha nawa okwa kwatela mo wo okukutha iifo niileshomwa manga inoo ya kokugongala kwiilonga yomomapya opo ayehe ya ye koshitopolwa nopwaahe na okumana po ethimbo.
11 Osha simana wo okuninga omalongekidho opo tu thike pokugongala kwiilonga yomomapya komeho yethimbo nominute dhontumba manga inaaku tameka. Eeno, otu na okukambadhala tu thike pethimbo pokugongala kehe kwegongalo. Otashi ka piyaganeka yalwe unene, uuna twa thiki pokugongala kwiilonga yomomapya ethimbo lya pwa po. Ngiini mbela? Omumwatate ngoka ta kwatele komeho oku na okukaleka momadhiladhilo iinima yontumba manga inaa topola nokuunganeka ongundu. Ngele opu na owala aauvithi aashona, otashi vulika a tokole opo ayehe ya ye koshitopolwa shoka inaashi pwa okulongwa. Ngele yamwe sho ye ya kokugongala kwiilonga yomomapya oye ende, sho oshitopolwa oshi li kokule, otashi vulika a topole aauvithi mboka naamboka ye na iiyenditho. Ngele moshitopolwa omu na omuyonena gu li pombanda, omumwatate ota vulu okutula po omumwatate opo a longe popepi nongundu yaamwameme. Aauvithi mboka ye na uukolele tawu nyangwanyangwa otaya vulu okupewa ya longe pomahala ngoka inaaga londa nenge pomagumbo ngoka kaage na ootalapa odhindji. Aauvithi aape otashi vulika ya pewe ya longe naamboka ya pyokoka. Ihe ngele aauvithi inaya thika pethimbo, elongekidho olundji ohashi vulika li ningululwe opo mboka inaaya thika pethimbo ya pewe mboka taya ka longa nayo. Eeno otashi vulika shili tu kale tu na etompelo lyomungunda lyokukala inaatu thika pethimbo. Ihe ngele otu na omukalondjigilile gwokwaathika pethimbo, otashi vulika tu ipule kutya mbela omolwaashoka kaatu na olupandu lwokugongala kwiilonga yomomapya nenge omolwaashoka inaatu unganeka nawa iinima yetu komeho yethimbo?
12. Ngele ohamu ningi elongekidho lyeni yene, oshike to vulu okukaleka momadhiladhilo?
12 Aauvithi mboka haya tsakanene ya ye miilonga yomomapya otaya vulu okuhogolola ya ninge elongekidho lyawo yene manga okugongala inaaku tameka nenge otaya vulu okupewa ngoka taya ka longa naye. Ngele olundji oho ningi elongekidho lyoye mwene, mbela ito vulu ‘okumbwalangandja’ mokulonga naauvithi yi ili noyi ili pehala lyokulonga owala nookuume koye ethimbo kehe? (2 Kor. 6:11-13, ftn NW.) Mbela ito vulu okuunganeka omathimbo gamwe wu longe nomuuvithi omupe wu mu kwathele a ninge ehumokomeho? (1 Kor. 10:24; 1 Tim. 4:13, 15) Pulakena nawa komalombwelo kehe ngoka wa pewa, mwa kwatelwa ewiliko li na ko nasha naampoka to tamekele okuuvitha. Uuna okugongala kwa hulu, henuka okulundulula omalongekidho e to yi koshitopolwa nziya.
13. Ngele ayehe mboka ya kwatelwa mo oye na ko nasha nohaya dhana onkandangala yawo, ongiini okugongala kwiilonga yomomapya taku ke tu etela uuwanawa?
13 Konima yokuuvitha, aalongwa 70 mboka Jesus a li u unganeke ya ye muukalele oya “galuka yu udha enyanyu enene.” (Luk. 10:17) Nopwaahe na omalimbililo, okugongala hoka Jesus a li a ningi nayo manga inaaya tameka okuuvitha okwa li kwe ya kwathele ya pondole. Kunena, okugongala kwiilonga yomomapya otaku vulu oku tu etela uuwanawa momukalo gwa faathana. Ngele ayehe mboka ya kwatelwa mo oye na ko nasha nohaya dhana onkandangala yawo, okugongala kwiilonga yomomapya otaku ke tu ladhipika, taku ke tu dheula notaku ke tu unganeka tu vule okugwanitha po oshilonga shetu shokugandja ‘uunzapo kiigwana ayihe.’— Mat. 24:14, NW.