Longitha nawa ethimbo ndyoka wu li muukalele
1 Opu na natango oshindji shoka tu na okulonga muukalele wetu, ihe ethimbo ndyoka lya hupa ko olyo efupi. (Joh. 4:35; 1 Kor. 7:29, OB-1954) Ngele tatu unganeke nawa iinima yetu nokuninga omalongekidho manga kuyele, otatu vulu okulongitha nawa ethimbo ndyoka tu na muukalele.
2 Kala wi ilongekidha nawa: Omanga inoo ya kelongekidho lyiilonga yomomapya, sa oshimpwiyu okukala wu na iileshomwa mbyoka to ka longitha nokukala wi ilongekidha nawa shoka to ka popya. Konima ngele elongekidho lya hulithwa negalikano, inda nziya muukalele. Shika otashi ku kwathele naamboka to longo pamwe nayo mu longe oshindji ngaashi tashi vulika ethimbo ndyoka lya nuninwa iilonga yomomapya.
3 Ngele ongoye to kwatele komeho elongekidho lyiilonga yomomapya, tameka pethimbo. Elongekidho nali kale paufupi inali konda pominute 10 nenge 15. Shilipaleka kutya kehe gumwe oku shi ngoka ta ka longa pamwe naye naampoka tapu ka longwa omanga inaamu ya momapya.
4 Uuna wu li muukalele: Ngele elongekidho lyiilonga yomomapya lya pu, ino kala to kakadhala, ihe inda nziya koshitopolwa hoka taku ka longwa. Ngele koshitopolwa ito ka kala ko unene, oshi li nawa wu ze ko ongoye awike opo kuu piyaganeke ongundu yi ze mo mbala momapya. Uuna to longo pamwe nongundu, kala ho yaalele yalwe mboka tashi vulika ya tegelela wu mane oonkundathana dheni nomunegumbo. Shoka osha kwatela mo okukala ho thigi po momukalo omwaanawa mboka ye hole okutsa oompata nenge wu ninge elongekidho okugalukila kwaamboka tayu ulike ohokwe. — Mat. 10:11.
5 Uuna to ningi omaishunoko, kala ho mana tango agehe ngoka ge li moshitopolwa shimwe manga inoo ya koshikwawo, opo wu yande okweenda inaaku pumbiwa. Ngele otashi vulika oshi li nawa okudhengela ongodhi mboka to yi kuyo wu shilipaleke ngele omo ye li megumbo. (Omayel. 21:5) Ngele owu shi nale kutya etalelopo otali kala ethimbo ele, oto vulu okulombwela yalwe mongundu ya kale taya uvitha popepi nenge ya ye komaishunoko ngoka ge li popepi.
6 Otu li methimbo lyeteyo enene lyopambepo. (Mat. 9:37, 38) Masiku iilonga mbika otayi ka pwa. Onkee ano, elalakano lyetu olyo okulongitha nawa ethimbo ndyoka tu li muukalele.