Iilongitho yetu yi ili noyi ili yomuukalele
1. Omomukalo guni aauvithi yevaangeli ya fa omuhambudhi onkulungu?
1 Omuhambudhi oha longitha iilongitho ya yoolokathana. Iilongitho yimwe ohe yi longitha owala poompito dha shewa, omanga iikwawo he yi longitha iikando oyindji. Omuhambudhi a pyokoka oha kala aluhe e na iilongitho mbyoka ha longitha olundji. Iilongitho mbyoka oyo ha longitha unene nawa. Ombiimbeli otayi ladhipike Omukriste kehe a ninge ngaashi ta vulu muukalele, opo a kale “inaa sa ohoni iilonga ye.” (2 Tim. 2:15) Oshilongitho shetu sha simanenena oshinipo? Osho Ombiimbeli, Oohapu dhaKalunga, ndhoka hatu longitha ‘okuninga aantu aalongwa.’ (Mat. 28:19, 20) Onkee ano, natu kambadhaleni tu kale twa pyokoka ‘mokulonga aantu oshili ya yela yomOohapu dhaKalunga.’ Ihe opu na ishewe iilongitho yilwe mbyoka Aakriste ayehe ye na okwiilonga oku yi longitha nuunkulungu mokulonga aantu oshili. — Omayel. 22:29.
2. Iilongitho yini hatu longitha unene sho tatu longo aantu oshili?
2 Iilongitho mbyoka hatu longitha unene: Kakele kOmbiimbeli, iilongitho ishewe yini tu na okulongitha? Oshilongitho shoka hatu longitha unene okulonga aantu oshili yOmbiimbeli, osho embo Omalongo gashili gOmbiimbeli ogeni naanaa? Shampa twe li mana, natu konakonene nomuntu embo ‘Ikalekeni mohole yaKalunga,’ tu mu longe okutula miilonga omakotampango gOmbiimbeli. Onkee ano, otu na okukala twa pyokoka mokulongitha iilongitho mbika iyali. Otu na wo okulongitha uumbo wulwe mokulonga aantu oshili. Okambo Onkundana ombwanawa ya za kuKalunga oko kamwe komiilongitho mbyoka ya simanenena, mokutameka omakonakonombiimbeli. Ongiini ngele moshitopolwa sheni omu na aantu kaaye shi okulesha nawa, nenge haya popi elaka ndyoka kaatu na mo iileshomwa oyindji, nenge kaatu na mo oshileshomwa shasha? Otatu vulu okulongitha wo okambo Kala ho pulakene kuKalunga opo wu ka kale nomwenyo sigo aluhe. Oshilongitho shimwe shoka tashi yelithile aakonakoni kombinga yEhangano lyaJehova, okambo Oolye taya longo ehalo lyaJehova kunena? Iilongitho ishewe mbyoka tu na okwiilonga okulongitha nawa sho tatu kwathele aantu ya ninge aalongwa, uuvidio ngaashi: Omolwashike wa pumbwa okukonakona Ombiimbeli?, Oshike hashi ningwa pokugongala kwOonzapo dhaJehova? nosho wo Kalunga oku na edhina? (Ke li mOshiingilisa.)
3. Iitopolwa mbyoka tayi ka holoka mUukalele Wetu wUukwaniilwa otayi ke tu kwathela tu ninge shike?
3 Iitopolwa mbyoka tayi ka holoka mUukalele Wetu wUukwaniilwa otayi ke tu kwathela tu kale twa pyokoka mokulongitha iileshomwa mbyoka twa pewa tu longe aantu oshili. Ngele otwa kala hatu longitha nawa iilongitho yetu, nena otatu vulika komayele ngoka taga ti: “Itonatela ano mwene nosho wo elongo lyoye. Iinima mbika yi dhiginina, oshoka ngele to shi ningi, oto ihupitha nosho wo mboka taye ku pulakene.” — 1 Tim. 4:16.