Okavidio: “These Words . . . Must Be on Your Heart”

Aavali oya fa aasita yoonzi. Oye na okusila oyana oshimpwiyu. Omolwashike mbela? Aanona ohaya vulu okufalwafalwa nuupu nosho wo okunwethwa mo nziya. (Omayel. 27:23) Oshike tashi vulu okukwathela aavali? Okukala haya popi noyana esiku kehe, opo ya vule okumona kutya momadhiladhilo nomomitima dhawo otamu nakina shike. (Omayel. 20:5) Shimwe ishewe, aavali oye na okutunga eitaalo lyoyana, taya longitha iitungitho mbyoka ihaayi pi. (1 Kor. 3:10-15) Taleni okavidio: “These Words . . . Must Be on Your Heart,” hoka taku ulike kutya elongelokalunga lyuukwanegumbo osha simana li kale hali ningwa pandjigilile. Ka taleni pamwe naanegumbo ayehe, e tamu kundathana omapulo taga landula.

(1) Oshike sha li sha nkundipaleke uupambepo waanegumbo lyomumwatate Roman? (2) Omolwashike oshikando shotango sho omumwatate Roman a li a hala ya ninge Elongelokalunga lyuukwanegumbo inaashi enda nawa? (3) Ngele aavali oya hala okuputudha oyana nawa, enyolo lini ye na okulongitha unene? (Deut. 6:6, 7) (4) Oshike tashi vulu okukwathela ayehe megumbo ya kale haya popi ya mangulukilathana? (5) Aanona ohaya kala ya hala okumona aavali yawo taya ningi omaiyambo goludhi luni? (6) Omumwatate nomumwameme Barrow oya li ya nwetha mo nawa ngiini iilyo yegumbo lyomumwatate Roman? (Omayel. 27:17) (7) Omutse gwegumbo ogu na okuninga shike komeho yethimbo, opo elongelokalunga lyuukwanegumbo li kale lya mwenyopala? (8) Omumwatate Roman okwa li e shi ende ngiini, opo iinima yi kale tayi ende nawa megumbo? (9) Omolwashike sha simanenena elongelokalunga lyuukwanegumbo li kale hali ningwa aluhe? (Ef. 6:4) (10) Iinima yini ishewe tayi vulu okuningwa pelongelokalunga lyuukwanegumbo? (11) Oshike sha li sha kwathele omumwatate Roman a popye nomuhona gwe, Marcus, a ngungumana a mone esimano lyiinima mbyoka yu uka, nopwaahe na oku mu lila okathima koluko? (Jer. 17:9) (12) Omumwatate nomumwameme Roman oya li ya tompathana ngiini nomwanakadhona gwawo, Rebecca, opo ye mu kwathele a hulithe po ekwatathano nomumati Justin ngoka te mu kongo? (Mark. 12:30; 2 Tim. 2:22) (13) Omumwatate nomumwameme Roman oya li yu ulike ngiini kutya oye na eitaalo sho taya ningi omalunduluko monkalamwenyo yawo? (Mat. 6:33) (14) Okavidio haka otaka vulu ngiini okukwathela omitse dhomagumbo dhi kale hadhi sile aanegumbo yadho oshimpwiyu pambepo? (1 Tim. 5:8) (15) Owa tokola toko okuninga shike wu li omutse guukwanegumbo?

OMALOMBWELO KOMITSE DHOMAGUMBO: Okavidio haka oka kankamena koshinyandwa shoka sha li sha dhanwa poshigongi shoshitopolwa shomo 2011. Sho wa li to tala oshinyandwa, mbela owa li ngaa wa mono mpoka wa pumbwa okuhwepopala momukalo moka ho kwatele komeho elongelokalunga lyuukwanegumbo woye? Mbela natango owa pumbwa okuhwepopala? Ngele osho, galikana opo wu ka mone uuwanawa tawu kalele pamwe negumbo lyoye. —  Ef. 5:15-17.