Longitha nawa iitopolwa yi li membo Omalongo gOmbiimbeli

Sho omukonakonimbiimbeli ta tsikile nokwiilonga kutya Ombiimbeli otayi ti naanaa shike nokutula miilonga shoka ti ilongo, ota ka koka pambepo nota ka imika iiyimati yopambepo. (Eps. 1:1-3) Otatu vulu okukwathela aakonakoni yetu ya koke pambepo, uuna tatu longitha nawa iitopolwa yimwe mbyoka tayi ya kwathele yi li membo Omalongo gOmbiimbeli.

Omapulo gopetameko: Ontopolwa kehe oyi na omapulo petameko ngoka ga yamukulwa muyo. Oto vulu okupula omukonakoni omapulo ngoka nelalakano kee ga yamukule, opo a ka kale a hala okuyamukula moonkundathana dheni ndhoka tamu ka ninga. Oto vulu wu mu pule a yamukule paufupi epulo kehe. Ngele okwa popi oshinima sha puka, ino pumbwa oku mu pukulula pethimbo mpoka. Omatyokosha ge otage ke ku kwathela wu mone kutya iitsa yini wa pumbwa okugandja eitulomo kuyo noku yi tsa omuthindo. — Omayel. 16:23; 18:13.

Oshigwedhelwako: Ngele omukonakoni oku uvite ko nota tsu kumwe naashoka mwa kundathana, oto vulu oku mu ladhipika a leshe ye mwene oshigwedhelwako shoka tashi popi kombinga yontopolwa ndjoka. Pekonakono lya landula ko, oto vulu oku mu pula paufupi wu tale ngele shoka a lesha oku shi uvite ko ngaa. Opo shi mu etele uuwanawa, owu na okulongitha ethimbo lyontumba pekonakono mu kundathane oshigwedhelwako, nenge oshitopolwa shoka mokulesha uutendo nokupula omapulo ngoka wi ilongikidha nale.

Oshimpungu sheendululo: Oshimpungu sheendululo pehulilo lyontopolwa kehe oshi na omayamukulo gomapulo gopetameko lyontopolwa. Oto vulu okulongitha oshipungu shika, opo wu shilipaleke kutya omukonakoni gwoye oku uvite ko nota vulu okuyelitha iitsa ya simana. Lesheni oshitsa kehe mokule nomanyolo ngoka ge etwa mo. Opo nduno lombwela omukonakoni gwoye a longithe omanyolo sho ta yelitha oshitsa shontumba kutya omolwashike i itaala kutya shoka oshili. — Iil. 17:2, 3.