ONKALAMWENYO YOPAKRISTE
Jehova ohe tu kwathele tu idhidhimikile omashongo
Pethimbo ndika lyomasiku gahugunina, ohatu iyadha momaupyakadhi ogendji. Omathimbo gamwe, otashi vulika tu kale tu uvite kutya omashongo getu ogendji unene noku ga idhidhimikila. Nonando ongawo, ngele otwa tsikile okuhedha popepi naJehova, ote ke tu kwathela tu ga idhidhimikile, nokuli naangoka taga yemateke noonkondo. (Jes 43:2, 4) Ongiini tatu vulu okuhedha popepi naJehova, uuna tu li momaupyakadhi?
Egalikano. Uuna tatu mbumbulile Jehova omutima gwetu, ohe tu pe ombili yopamadhiladhilo nosho wo oonkondo tu vule okwiidhidhimika. — Fil 4:6, 7; 1Tes 5:17.
Okugongala. Otwa pumbwa iikulya yopambepo shi vulithe nale nosho wo okweendathana naamwatate naamwameme pokugongala. (Heb 10:24, 25) Ngele ohatu ilongekidhile okugongala, hatu kala po nohatu kutha ombinga muko, otatu ka mona mo uuwanawa kekwatho lyombepo yaJehova. — Eh 2:29.
Iilonga yokuuvitha. Otashi ka kala oshipu okugandja eitulomo kiinima iiwanawa, ngele otwa ningi kehe shimwe tatu vulu tu kale twa ipyakidhila muukalele. Otatu ka koleka wo ekwatathano lyetu naJehova nosho wo nooitaali ooyakwetu. — 1Kor 3:5-10.
TALA OKAVIDIO JEHOVA OTA SILE NDJE OSHIMPWIYU, E TO YAMUKULA OMAPULO NGAKA:
Oshike sha kwathele Malu a kale popepi naJehova, pethimbo a li momashongo?
Ngaashi Malu, oohapu ndhoka dhi li mEpisalomi 34:18, otadhi vulu ngiini oku tu hekeleka, uuna tu li momashongo?
Oshimoniwa shaMalu, otashi ulike ngiini kutya Jehova ohe tu pe ‘oonkondo dhi vule ndhoka dhopaunshitwe,’ uuna tu li momashongo? — 2Kor 4:7, yelekanitha NW