Dhimbulukwa kutya Jehova ‘oKalunga omunamwenyo’

1. Oshike hashi kwathele aapiya yaJehova ya tsikile oku mu longela, nonando oya taalela omaupyakadhi?

OMBIIMBELI oya ti kutya otu li ‘momathimbo omadhigu’ okukaliwa mugo. (2 Tim. 3:1) Kakele komashongo ngoka kehe gumwe ha taalele muuyuni mbuka, oshigwana shaJehova ohashi ungaunga nomapataneko nosho wo nomahepeko. Oshike hashi tu kwathele tu tsikile okulongela Jehova, nonando otwa taalela omaupyakadhi? Oshinima shimwe sha simana shoka hashi tu kwathele okutseya kutya Jehova ‘oKalunga omunamwenyo.’ — Jer. 10:10; 2 Tim. 1:12.

2. Omomukalo guni Jehova e li Kalunga omunamwenyo?

² Jehova omuntu gwolela, ngoka he tu kwathele uuna tu li muudhigu noha kongo oompito e tu yambidhidhe. (2 Ondjal. 16:9; Eps. 23:4) Okukala twe mu tala ko e li Kalunga omunamwenyo, otashi vulu oku tu kwathela tu sinde eshongo kehe tali tu adha. Natu tale shoka sha li sha ningilwa omukwaniilwa David.

3. David okwa li a hala okutya shike sho a ti, “Omuwa oku na omwenyo”?

³ David okwa li e shi Jehova nawa nokwa li a inekela muye. Sho a li a ponokelwa kaatondi ye, mwa kwatelwa nomukwaniilwa Saul, David okwa li a galikana kuJehova e mu kwathele. (Eps. 18:6) Konima sho Kalunga a yamukula egalikano lye noku mu kwathela, David okwa ti: “Omuwa oku na omwenyo!” (Eps. 18:46) David okwa li a hala okutya shike? Embo limwe olya ti kutya mokupopya oohapu ndhoka, David okwa li ta ulike kutya okwiinekela Jehova “e li Kalunga omunamwenyo ngoka ta kala aluhe nokukwathela oshigwana she.” Eeno, David okwa li e shi shi nawa okupitila miimoniwa ye mwene kutya Kalunga oku na omwenyo, naashoka osha li she mu tompo a kale a tokola toko oku mu longela noku mu tanga. — Eps. 18:28, 29, 49.

4. Ohatu mono mo ngiini uuwanawa mokukala twa tala ko Jehova e li Kalunga omunamwenyo?

⁴ Okukala twa tompwa kutya Jehova oKalunga omunamwenyo otaku vulu oku tu kwathela tu mu longele nuulaadhi. Otatu ka kala tu na oonkondo dhokwiidhidhimikila omashongo notashi ke tu inyengitha tu tsikile okulongela Kalunga nuudhiginini. Otatu ka kala wo twa tokola toko okutsikila okukala tu na ekwatathano ewanawa naJehova.

KALUNGA OMUNAMWENYO OTE KE KU NKONDOPALEKA

5. Oshike tashi vulu oku tu tsa omukumo, uuna twa taalela omashongo? (Aafilippi 4:13)

⁵ Otatu ka vula okwiidhidhimikila eshongo kehe, kutya nduno enene nenge eshona, ngele otwa dhimbulukwa kutya Jehova omunamwenyo noku lile po oku tu kwathela. Komeho gaayihe, Jehova ota vulu oku tu kwathela meshongo kehe, molwaashoka kapu na shoka tashi mu nyenge. Ye Omunankondoawike, nota vulu oku tu pa oonkondo tu idhidhimike. (Lesha Aafilippi 4:13.) Shika ohashi tu tsu omukumo, uuna twa taalela omashongo. Sho Jehova he tu kwathele uuna tu li momashongo omashona, oshe tu tompa kutya ote ke tu kwathela wo uuna tu li momashongo omanene.

6. Iimoniwa yini yopethimbo lyuugundjuka waDavid ya li ya koleke einekelo lye muJehova?

⁶ Natu taleni kiimoniwa iyali yaDavid, mbyoka ya li ya koleke einekelo lye muJehova. Sho David a li omusita gwoonzi omugundjuka, onkoshi nemwanka oya li ya yakula po yimwe yomoonzi dhahe. Poompito adhihe ndhoka, David okwa li a katuka nuulaadhi a gamene oonzi ndhoka. Ihe nonando ongawo, ka li a itangele shoka a ninga. Okwa li e shi kutya Jehova oye a yi mo olunyala moshinima shoka. (1 Sam. 17:34-37) David ka li nando a dhimbwa iimoniwa mbyoka. Sho a tedhatedha kuyo, osha li she mu tsa omukumo kutya Kalunga omunamwenyo ote ke mu nkondopaleka monakuyiwa.

7. David okwa li a gandja eitulomo kushike, nongiini shoka sha li she mu kwathele a kondjithe Goliat?

⁷ Lwanima, sho David a li e na omimvo omulongo nasha okwa li a ka talela po kokamba yetangakwiita lyAaisraeli. Okwa li a mono kutya aakwiita oya li ya sholola, omolwomutongolume Omufilisti gwedhina Goliat, ngoka a “shongo etangakwiita lyAaisraeli.” (1 Sam. 17:10, 11) Aakwiita oya li ya tila, molwaashoka oya li taya gandja eitulomo kuunene waGoliat nokwaashoka a li ta popi. (1 Sam. 17:24, 25) David okwa li a gandja eitulomo kushimwe shi ili. Okwa li e shi kutya sho Goliat ta sheke etangakwiita lyAaisraeli okwa li ta nyana “etangakwiita lyaKalunga omunamwenyo.” (1 Sam. 17:26) David okwa li ta dhiladhila kombinga yaJehova. Okwa li e na einekelo kutya Kalunga, ngoka a li e mu kwathela sho a li omusita gwoonzi, ote ke mu kwathela natango sho e li monkalo ndjoka. Kekwatho lyaJehova, David okwa kondjo naGoliat e ta sindana! — 1 Sam. 17:45-51.

8. Oshike tashi vulu okukoleka einekelo lyetu kutya Jehova ote ke tu kwathela, uuna twa taalela omashongo? (Tala wo ethano.)

⁸ Natse wo otatu vulu okutaalela omashongo tu na omukumo, ngele otwa dhimbulukwa kutya Kalunga omunamwenyo okwiilongekidha oku tu kwathela. (Eps. 118:6) Otatu vulu okukala neinekelo kutya Jehova ote ke tu kwathela, ngele otwa dhiladhila kwaashoka a ninga monakuziwa. Lesha iiholelwa yopaMbiimbeli, mbyoka tayi ku dhimbulukitha nkene Jehova a li a gamene mboka ya li haye mu longele. (Jes. 37:17, 33-37) Lesha wo oolopota kepandja lyetu jw.org, ndhoka tadhi yelitha nkene Jehova a kala nokuyambidhidha aamwatate naamwameme pethimbo lyetu. Shimwe ishewe, dhimbulukwa poompito dhimwe mpoka Jehova a li e ku kwathele. Ino tyololoka, ngele ito vulu okudhimbulukwa oshimoniwa sha dhenga mbanda shankene Jehova a li e ku kwathele, shoka tashi vulu okufaathanithwa nokukondjitha emwanka nenge onkoshi. Omolwashike mbela? Uushili owo kutya Jehova okwe ku ningila iinima oyindji monkalamwenyo yoye! Okwe ku hiya, opo wu ninge kuume ke. (Joh. 6:44) Kekwatho lyaJehova, oto tsikile oku mu longela. Omolwashike itoo pula Jehova e ku kwathele wu dhimbulukwe nkene a li a yamukula omagalikano goye, e ku yambidhidha pethimbo lya opala, nenge e ku kwathela sho wa li muudhigu? Okutedhatedha kiimoniwa mbyoka otaku ka koleka einekelo lyoye muJehova kutya ota ka tsikila oku ku kwathela.

9. Oshike twa pumbwa okudhimbulukwa, uuna twa taalela omashongo? (Omayeletumbulo 27:11)

⁹ Okukala twa tala ko Jehova e li Omuntu omunamwenyo, otaku ke tu kwathela kaatu gandje eitulomo komashongo getu. Ngiini mbela? Otatu ka tameka okutala ko omashongo getu ge li oshitopolwa shompata pokati kaJehova naSatana. Omuhindadhi okwa ti ngele otwa kala twa taalela omaupyakadhi, otatu ka etha po okulongela Jehova. (Job 1:10, 11; lesha Omayeletumbulo 27:11.) Ihe ngele otwa ungaunga nomashongo getu nomupondo, otatu ka ulika kutya otu hole Jehova nosho wo kutya Satana omufundja. Mbela owa taalela omapataneko okuzilila kaakwanepangelo, uuhupilo tawu shongola, omashongo miilonga yokuuvitha, nenge galwe ga gwedhwa po? Ngele osho, dhimbulukwa kutya onkalo yoye ohayi ku pe ompito wu nyanyudhe omutima gwaJehova. Dhimbulukwa wo kutya ite ku ethele momamakelo ge vule oonkondo dhoye. (1 Kor. 10:13) Ote ku pe oonkondo wu idhidhimike.

KALUNGA OMUNAMWENYO OTE KE KU PA ONDJAMBI

10. Kalunga omunamwenyo ota ka ningila shike mboka haye mu longele?

¹⁰ Jehova oha pe ondjambi mboka haye mu longele. (Heb. 11:6) Ohe tu pe ombili nohe tu kwathele tu kale twa gwanenwa ngashingeyi, nomonakuyiwa ote ke tu pa omwenyo gwaaluhe. Otwa inekela thiluthilu kutya Jehova okwa hala oku tu pa ondjambi noku na oonkondo dhoku shi ninga. Shono ohashi tu inyengitha tu mu longele nomutima aguhe, ngaashi owala sha li sha inyengitha aapiya ye aadhiginini yomonakuziwa. Shoka osho Timoteus a li a ningi methelemumvo lyotango. — Heb. 6:10-12.

11. Oshike sha inyengitha Timoteus a longe nuudhiginini megongalo? (1 Timoteus 4:10)

¹¹ Lesha 1 Timoteus 4:10. Timoteus okwa li a inekela muKalunga omunamwenyo. Nomolwaashono a li a longele Jehova nuudhiginini nokukwathela yalwe. Omomikalo dhini mbela? Omuyapostoli Paulus okwa li a ladhipike Timoteus a ninge ehumokomeho, opo a kale omulongi omwanawa miilonga yokuuvitha nomegongalo. Okwa li a lombwele Timoteus a tulile po ooitaali ooyakwawo oshiholelwa oshiwanawa kutya nduno aagundjuka nenge aakuluntu. Okwa li wo a pewa iinakugwanithwa ya kwata miiti, mwa kwatelwa okugandja omayele kwaamboka ye ga pumbwa. (1 Tim. 4:11-16; 2 Tim. 4:1-5) Omathimbo gamwe, yalwe inaya ndhindhilika iilonga ye nenge ye mu pandule, ihe okwa li e na uushili kutya Jehova ote ke mu pa ondjambi. — Rom. 2:6, 7.

12. Oshike tashi vulu okwiinyengitha aakuluntugongalo ya kale ya ipyakidhila niilonga yawo? (Tala wo ethano.)

¹² Kunena, aakuluntugongalo nayo otaya vulu okukala nuushili kutya Jehova oku wete nokwa lenga iilonga mbyoka taya longo. Kakele kokuninga omatalolopo guusita, okulonga yalwe nosho wo okuuvitha, aakuluntugongalo oyendji ohaya ambidhidha ooproyeka dhokutunga nokukwathela mboka ya dhengwa kiiponga yopaunshitwe. Yamwe ohaya kwathele mOongundu dhOkutalela po Aavu nenge mOkomitiye yOkukwatathana nIipangelo. Aakuluntugongalo, mboka haya longo iilonga mbyoka, oye shi kutya egongalo olyaJehova, ihe kali shi lyomuntu. Oshizemo, ohaya longo nuudhiginini megongalo noye na einekelo lya kola kutya Jehova ote ke ya pa ondjambi omolwiilonga yawo. — Kol. 3:23, 24.

13. Jehova oha kala e uvitile ngiini shoka hatu mu ningile?

¹³ Hakehe gumwe ta vulu okukala omukuluntugongalo. Ihe atuhe otu na sha, shoka tatu vulu okupa Jehova. Kalunga ketu ohe shi pandula, uuna tatu ningi ngaashi tatu vulu tu mu longele. Oha mono omayambidhidho ngoka hatu gandja giilonga yomuyuuni awuhe, nokuli nonando ihatu vulu okugandja oshindji. Oha kala a nyanyukwa, uuna tatu kutha ombinga mokugongala, nonando otu na oohoni nosho wo uuna tatu dhimine po mboka ye tu uvitha nayi. Ngele owu uvite kutya ito vulu okulonga oshindji miilonga yaJehova, kala wu na einekelo kutya okwa lenga oonkambadhala dhoye. Oku ku hole, omolwiilonga mbyoka ho mu longele, note ke ku pa ondjambi. — Luk. 21:1-4.

KALA POPEPI NAKALUNGA OMUNAMWENYO

14. Ongiini okutsikila okukala popepi naJehova taku tu kwathele tu kale aadhiginini kuye? (Tala wo ethano.)

¹⁴ Ngele otwa kala twa tala ko Jehova e li omuntu gwolela kutse, otashi ka kala oshipu okutsikila okukala aadhiginini kuye. Shoka osho Josef a li a ningi. Ka li a pitike a ye momilalo dha nyata, molwaashoka okwa li a tala ko Kalunga e li omuntu gwolela kuye noka li a hala oku mu yemateka. (Gen. 39:9) Opo Jehova a kale omuntu gwolela kutse, otwa pumbwa okukala hatu kongo ethimbo tu galikane kuye nokukonakona Oohapu dhe, Ombiimbeli. Kungawo, uukuume wetu naye otawu ka kola. Otu na ekwatathano lya kola naJehova noitatu ka kala twa hala okuninga sha shoka tashi mu yemateke. — Jak. 4:8.

15. Oshiilongomwa shini tatu vulu okwiilonga kwaashoka sha li sha ningilwa Aaisraeli, sho ya li mombuga? (Aahebeli 3:12)

¹⁵ Mboka haya dhimbwa kutya Jehova oKalunga omunamwenyo, otaya vulu okukala kaaye shi aadhiginini kuye. Natu ka taleni shoka sha li sha ningilwa Aaisraeli mombuga. Oya li ye shi kutya Jehova oko e li, ihe oya tameke okukala ye na omalimbililo ngele ota vulu ngaa oku ya sila oshimpwiyu. Oya li nokuli ya pula ya ti: “Omuwa omo tuu e li mokati ketu nenge aawe?” (Eks. 17:2, 7) Oshizemo, oya li ya tukulile Kalunga oshipotha. Uushili owo kutya inatu hala okulandula okwaahavulika kwawo, shono shi li oshiholelwa shelondodho kutse. — Lesha Aahebeli 3:12.

16. Oshike tashi vulu okumakela eitaalo lyetu?

¹⁶ Uuyuni ohawu shi ningitha oshidhigu tu kale popepi naJehova. Oyendji ohaya tindi okwiitala kutya Kalunga oko e li. Olundji, mboka haya idhimbike omithikampango dhaKalunga ohaya monika ya fa ye na onkalamwenyo ombwanawa. Ngele twa mono shoka tashi ningwa, eitaalo lyetu otali vulu okumakelwa. Nonando otwa itaala kutya Kalunga oko e li, otashi vulika tu kwatwe komalimbililo ngele ote ke tu kwathela ngaa. Pompito yimwe, omunyoli gwEpisalomi 73 naye osho a li e uvite. Okwa li a mono mboka ihaaya vulika koompango dhaKalunga taya nyanyukilwa onkalamwenyo. Oshizemo, okwa tameke okwiipula ngele okulongela Kalunga oku na ngaa uuwanawa washa. — Eps. 73:11-13.

17. Oshike tashi ke tu kwathela tu kale popepi naJehova?

¹⁷ Oshike sha li sha kwathele omupisalomi ngoka a lundulule okudhiladhila kwe? Okwa kala ta tedhatedha kwaashoka tashi ka ningilwa mboka ya dhimbwa Jehova. (Eps. 73:18, 19, 27) Okwa li wo a tedhatedha kuuwanawa mboka hawu zi mokulongela Kalunga. (Eps. 73:24) Sha faathana, natse otatu vulu okutedhatedha komalalekonuuyamba ngoka Jehova e tu pa. Dhiladhila wo kutya ando onkalamwenyo yetu otayi ka kala ya tya ngiini ando katwa li hatu longele Jehova. Okuninga ngawo, otaku vulu oku tu kwathela tu kakatele uudhiginini wetu nokupopya ngaashi omupisalomi a li a popi sho a ti: “Ngame, osho opalela ndje okukala popepi naKalunga.” — Eps. 73:28.

18. Omolwashike tatu vulu okutaalela onakuyiwa tu na omukumo?

¹⁸ Otatu vulu okutaalela eshongo kehe tatu tsakaneke momasiku ngaka gahugunina, molwaashoka otu li “aalongeli yaKalunga kashili omunamwenyo.” (1Tes. 1:9) Kalunga ketu oku na ko nasha natse note ke tu kwathela aluhe. Okwa li pamwe naapiya ye yomonakuziwa, nota ka kala wo pamwe natse. Masiku, otatu ka taalela uudhigu uunene, mboka tawu ke ya kombanda yevi alihe. Ihe itatu ka kala otse atuke, Jehova ota ka kala pamwe natse. (Jes. 41:10) Atuheni natu “kaleni tu na omukumo, tse tu tye: ‘Omuwa oye omukwathi gwandje; itandi tila sha.’” — Heb. 13:5, 6.