Ulika kutya owa pandula omagano nenge omaliko ngoka ihaaga monika

1. Jesus okwa popi shike kombinga yomaliko gomegulu?

HAMAGANO agehe hatu vulu okumona nomeho. Odhoshili kutya omaliko ngoka ga simanenena, ihaga monika nomeho. MEuvitho lye lyokOndundu, Jesus okwa li a popi kombinga yomaliko gomegulu ngoka ge vule kokulekule iinima yopamaliko. Opo nduno okwa gwedha ko oshili ndjika tayi ti: “Kokuma nkoka ku na eliko lyoye, oko ku na nomwenyo gwoye wo.” (Mat. 6:19-21) Omwenyo nenge tu tye omutima gwetu, ogwo tagu ke tu inyengitha tu lalakanene iinima mbyoka twa lenga nenge twe yi tala ko yi na ongushu. Ohatu ilikolele “omaliko megulu,” mokwiiningila edhina ewanawa naKalunga. Ngaashi Jesus e shi yelitha, omaliko ga tya ngawo kage na siku ga yonuke po nenge ga yakwe po.

2. (a) Shi ikolelela kAakorinto aatiyali 4:17, 18, Paulus okwe tu ladhipike tu kale hatu gandja eitulomo kushike? (b) Oshike tatu ka kundathana moshitopolwa shika?

² Omuyapostoli Paulus ote tu ladhipike tu kale twa ‘tala kiinima mbyoka kaayi wetike.’ (Lesha 2 Aakorinto 4:17, 18.) Iinima mbyoka kaayi wetike, oya kwatela mo omayambeko ngoka tatu ka nyanyukilwa muuyuni uupe waKalunga. Moshitopolwa shika, otatu ka kundathana kombinga yomaliko gane ihaaga monika, ngoka hage tu etele uuwanawa kunena, ano uukuume wetu naKalunga, omagano gegalikano, ekwatho lyombepo ondjapuki nosho wo ekwatho ndyoka Jehova, Jesus naayengeli haye tu pe, uuna tu li miilonga yokuuvitha. Otatu ka kundathana wo nkene tatu vulu okuulika kutya otwa pandula omaliko ngoka ihaaga monika.

UUKUUME NAJEHOVA

3. Eliko enenenene ndyoka ihaali monika olini, noshike she shi ningitha tashi wapa opo tu kale tu li na?

³ Eliko enenenene ndyoka ihaali monika olyo uukuume wetu naJehova Kalunga. (Eps. 25:14) Ongiini Kalunga ta vulu okupanga uukuume naantu aalunde, e ta tsikile okukala omuyapuki? Oha vulu oku shi ninga, molwaashoka ekuliloyambo lyaJesus olya “kutha po oondjo dhuuyuni.” (Joh. 1:29) Jehova okwa kala nale e shi tseya komeho yethimbo kutya elalakano lye lyokupa aantu Omuhupithi, itali ka ponya. Onkee ano, Kalunga okwa li a vulu okupanga uukuume naantu nokuli nomanga Kristus inaa sa. — Rom. 3:25.

4. Gandja iiholelwa yayamwe yomaapiya yaKalunga yonale, mboka ya li ya panga uukuume naye.

⁴ Natu taleni kuyamwe yomaapiya yaKalunga yonale mboka ya li ya panga uukuume naye. Abraham okwa li omulumentu e na eitaalo lya kola. Konima yomimvo 1 000 okuza sho Abraham a si, Jehova okwe mu popi e li ‘kuume ke.’ (Jes. 41:8) Shino otashi ulike kutya nonando omuntu okwa si, Jehova natango ohe mu tala ko e li kuume ke kopothingo. Jehova ke na esiku a dhimbwe Abraham. (Luk. 20:37, 38) Job oku li oshiholelwa shilwe. Oshikando shimwe sho aayengeli ya li ya gongala megulu, Jehova okwa li a popi nomukumo kombinga yaJob. Jehova okwa li e mu popi e li ‘omulumentu e shi okwiinekelwa, ha tila Kalunga noha tondo uuwinayi.’ (Job 1:6-8) Jehova okwa li e uvitile ngiini Daniel ngoka a li e mu longele nuudhiginini uule womimvo 80 lwaampono, nonando okwa li mokati kaapagani? Omulumentu ngoka omukokele okwa li a shilipalekwa kaayengeli iikando itatu kutya Kalunga ‘oku mu hole.’ (Dan. 9:23; 10:11, 19) Otatu vulu okukala nuushili kutya Jehova okwa tegelela nondjuulukwe, esiku ndyoka ta ka yumudha ookuume ke aaholike. — Job 14:15.

5. Oshike tu na okuninga, opo tu nyanyukilwe uukuume wopothingo naJehova?

⁵ Kunena aantu yangapi inaaya gwanenena haya nyanyukilwa uukuume wopothingo naJehova? Omamiliyona. Shoka otu shi shi, molwaashoka muuyuni awuhe aalumentu oyendji, aakiintu nuunona, otaye shi ulike miilonga yawo kutya oye li ookuume kaKalunga yashili. Jehova “oha panga uukuume wopothingo naayuuki” (NW). (Omayel. 3:32) Eitaalo lyawo mekuliloyambo lyaJesus olyo lya ningitha uukuume mboka wu kale po. Omolwekuliloyambo, Jehova okwe tu pitika tu mu iyapulile notu ninginithwe. Uuna twa katuka oonkatu ndhoka dha simana, ohatu wayimine Aakriste omamiliyona, mboka yi iyapulila Kalunga nohaya nyanyukilwa “uukuume wopothingo” nOmuntu omunenenene meshito alihe.

6. Ongiini tatu vulu okuulika kutya otwa lenga uukuume wetu naKalunga?

⁶ Ongiini tatu vulu okuulika kutya otwa lenga uukuume wetu naKalunga? Ngaashi Abraham naJob, mboka ya kala aadhiginini uule womimvo dhi vulithe pethele, natse otwa pumbwa okukala aadhiginini, kashi na nduno mbudhi kutya otwa longela Jehova uule wethimbo li thike peni. Ngaashi Daniel, otu na okukala twa lenga uukuume wetu naKalunga shi vulithe omwenyo gwetu. (Dan. 6:7, 10, 16, 22) Kekwatho lyaJehova, otatu vulu okwiidhidhimikila uudhigu kehe tawu tu adha, nokukaleka po uukuume wetu wopothingo naye. — Fil. 4:13.

OMAGANO GEGALIKANO

7. (a) Shi ikolelela kOmayeletumbulo 15:8, Jehova oha kala e uvitile ngiini omagalikano getu? (b) Omomukalo guni Jehova ha yamukula omagalikano getu?

⁷ Eliko lilwe ndyoka ihaali monika, egalikano. Ookuume kopothingo ohaya lombwelathana omaiyuvo nomadhiladhilo gawo. Mbela uukuume woye naJehova osho ngaa wu li ngawo? Eeno! Jehova oha popi natse okupitila mOohapu dhe, moka he tu hololele omadhiladhilo nomaiyuvo ge. Tse ohatu popi naye okupitila megalikano, notatu vulu oku mu lombwela omadhiladhilo getu nomaiyuvo getu gomuule. Jehova oha nyanyukilwa okupulakena komagalikano getu. (Lesha Omayeletumbulo 15:8.) E li Kuume omunahole, iha pulakene owala komagalikano getu, ihe ohe ga yamukula wo. Omathimbo gamwe ohe ga yamukula nziya. Ihe poompito dhilwe otashi vulika tu na okukala tatu galikana kombinga yoshinima shontumba uule wokathimbo. Nonando ongawo, otatu vulu okukala neinekelo kutya ote ke tu yamukula pethimbo lyo opala nomomukalo tagu opalele. Odhoshili kutya Kalunga otashi vulika a yamukule omagalikano getu momukalo moka kaatwa li twa tegelela. Pashiholelwa, pehala lyokukutha po uupyakadhi wontumba, otashi vulika e tu pe uunongo noonkondo, tu vule oku wu “idhidhimikila” (NW). — 1 Kor. 10:13.

8. Ongiini tatu vulu okuulika olupandu, omolwomagano gegalikano?

⁸ Ongiini tatu vulu okuulika olupandu, omolwomagano gegalikano ngoka ga simanenena? Omukalo gumwe tatu vulu oku shi ninga, omokuvulika komayele gaJehova ngoka taga ti “galikaneni aluhe.” (1 Tes. 5:17) Jehova ihe tu thiminike tu mu galikane. Pehala lyaashono, okwa simaneka emanguluko lyetu lyokuninga omatokolo nohe tu ladhipike tu ‘dhiginine okugalikana.’ (Rom. 12:12) Onkee ano, otatu vulu okuulika olupandu lwetu mokukala hatu galikana lwiikando momukokomoko gwesiku. Shimwe ishewe, uuna tatu galikana, otu na okupandula nokutanga Jehova. — Eps. 145:2, 3.

9. Omumwatate gumwe oku uvitile ngiini okugalikana, nangoye owu ku uvitile ngiini?

⁹ Ngele otwa kala tatu longele Jehova ethimbo ele nokumona nkene ta yamukula omaindilo getu, otashi ke tu kwathela tu kale twa pandula egalikano, shi vulithe nale. Pashiholelwa, omumwatate Chris, ngoka a kala miilonga yethimbo lyu udha omimvo 47, ota ti: “Ongula kehe ohandi nyanyukilwa okugalikana Jehova. Sho etango tali piti neshito alihe tali monika nawa, ohashi nyanyudha ndje okupopya naJehova. Shika ohashi inyengitha ndje ndi mu pandule, omolwomagano ge agehe, mwa kwatelwa uuthembahenda woku mu galikana. Konima yokugalikana pehulilo lyesiku, ohashi nyanyudha ndje wo oku ka kotha ndi na eiyuvo lya yela.”

OMAGANO GOMBEPO ONDJAPUKI

10. Omolwashike tu na okukala twa lenga ombepo ondjapuki?

¹⁰ Ombepo ondjapuki ndjoka yi li oonkondo dhaKalunga tadhi longo, oyi li omagano gamwe ngoka ihaaga monika tu na okukala twa lenga. Jesus okwe tu ladhipika tu kale hatu galikana tu pewe ombepo ondjapuki. (Luk. 11:9, 13) Okupitila mombepo ye, Jehova ohe tu pe oonkondo “dhi vule ndhoka dhopaunshitwe” (NW). (2 Kor. 4:7; Iil. 1:8) Kekwatho lyombepo yaKalunga, otatu vulu okwiidhidhimikila kehe uupyakadhi tashi vulika tu taalele.

11. Omomukalo guni ombepo ondjapuki hayi vulu oku tu kwathela?

¹¹ Ombepo ondjapuki otayi vulu oku tu kwathela tu gwanithe po iinakugwanithwa yetu miilonga yaJehova. Ombepo yaKalunga otayi vulu okuhwepopaleka uunkulungu nokuvula kwetu. Ohayi tu kwathele tu gwanithe po iinakugwanithwa yetu yopaKriste. Uushili owo kutya iizemo iiwanawa mbyoka hatu mono miilonga yaJehova, ohatu yi mono kekwatho lyombepo ondjapuki, ihe hakoonkondo dhetu.

12. Shi ikolelela kEpisalomi 139:23, 24, otatu vulu okugalikana tu pewe ombepo ondjapuki yi tu kwathele tu ninge shike?

¹² Omukalo gulwe moka tatu vulu okuulika kutya otwa lenga ombepo ondjapuki yaKalunga, omokugalikana yi tu kwathele tu ndhindhilike mo omadhiladhilo nenge omahalo ga puka momitima dhetu. (Lesha Episalomi 139:23, 24.) Ngele otwa galikana kombinga yaashoka, Jehova ota vulu oku tu kwathela okupitila mombepo ye, tu ndhindhilike mo omahalo ga puka. Shimwe ishewe, ngele otwa ndhindhilike kutya otu na omadhiladhilo nenge omahalo ga puka, otu na okupula Jehova e tu pe ombepo ye yi tu pe oonkondo tu vule oku ga kondjitha. Kungawo, otatu ka ulika kutya otwa tokola toko okuyanda kehe shoka tashi vulu okuningitha Jehova kee tu kwathe we nombepo ye ondjapuki. — Ef. 4:30.

13. Ongiini tatu vulu okukala nolupandu shi vulithe nale, omolwombepo ondjapuki?

¹³ Otatu vulu okukala tu na olupandu shi vulithe nale, omolwombepo ondjapuki, mokutedhatedha kombinga yaashoka ya tompola pethimbo lyetu. Manga Jesus inaa ya megulu, okwa lombwele aalongwa ye a ti: ‘One otamu ka pewa oonkondo, uuna ombepo ondjapuki tayi ka tililwa mune. Nena one otamu ka ninga oonzapo dhokuhokolola ndje paantu sigo omiilongo ayihe yokombanda yevi.’ (Iil. 1:8) Shika osho naanaa tashi ningwa kunena. Kekwatho lyombepo ondjapuki, opwa gongelwa aalongeli yaJehova ye thike pomamiliyona gahetatu netata, okuza miitopolwa ayihe yokombanda yevi. Shimwe ishewe, tu li aapiya yaKalunga, otwa hangana tu li aamwayinathana, molwaashoka ombepo yaKalunga ohayi tu kwathele tu kokeke omaukwatya ngaashi ohole, enyanyu, ombili, ontalanteni, ohenda, uuwanawa, eitaalo, engungumano neipangelo. Omaukwatya ngoka oge li “iiyimati yOmbepo.” (Gal. 5:22, 23) Ombepo ondjapuki kayi li tuu omagano ge na ondilo!

EKWATHO OKUZA KUJEHOVA, JESUS NAAYENGELI

14. Eyambidhidho lini tu na ihaali monika, uuna tu li miilonga yokuuvitha?

¹⁴ Otu li “aalongi pamwe” naJehova, Jesus naayengeli, shoka shi li omagano ge na ondilo. (2 Kor. 6:1) Kehe ethimbo tu li muukalele, ohatu longo pamwe nayo. Paulus okwi ipopi ye mwene nosho wo mboka haya longo iilonga mbika kutya oye li “aalongi pamwe naKalunga.” (1 Kor. 3:9) Uuna tatu kutha ombinga muukalele, ohatu kala wo aalongi pamwe naJesus. Dhimbulukwa kutya konima sho Jesus a lombwele aalanduli ye ya ‘ka ninge aantu ayehe aalongwa,’ okwa ti: ‘Ondi li pamwe nane.’ (Mat. 28:19, 20) Ongiini kombinga yaayengeli? Kashi li tuu eyambeko okuwilikwa kaayengeli, sho tatu uvithile ‘aantu yokombanda yevi oohapu dhelaka etoye lyaaluhe’! — Eh. 14:6.

15. Hokolola oshiholelwa shopaMbiimbeli shoka tashi ulike nkene Jehova ha dhana onkandangala ya simana miilonga yetu yokuuvitha.

¹⁵ Oshike hatu tompola po kekwatho lyaJehova, Jesus naayengeli? Sho tatu kunu oombuto dhetumwalaka lyUukwaniilwa, oombuto dhimwe ohadhi gwile momitima omiwanawa, e tadhi koko. (Mat. 13:18, 23) Olye ha ningitha oombuto ndhoka dhi koke nodhi ime? Jesus okwa ti kutya kapu na ngoka ta vulu okuninga omulanduli gwe, okuninga ‘He te mu eta kuye.’ (Joh. 6:44) MOmbiimbeli omu na oshiholelwa kombinga yaashoka. Dhimbulukwa kutya oshikando shimwe Paulus okwa li a uvithile ongundu yaakiintu kondje yoshilando Filippi. Ndhindhilika shoka Ombiimbeli ya popya kombinga yagumwe gwomaakulukadhi mboka, gwedhina Lidia, oya ti: “Omuwa nokwe egulula omwenyo gwe okutaamba nokwiitaala shoka Paulus a ti.” (Iil. 16:13-15) Ngaashi Lidia, Jehova okwa hilila aantu omamiliyona kuye.

16. Olye e na okupandulwa, omolwiizemo iiwanawa mbyoka hatu mono muukalele?

¹⁶ Olye e na okupandulwa, omolwiizemo iiwanawa mbyoka hatu mono muukalele? Paulus okwa yamukala epulo ndyoka, sho a nyola kombinga yegongalo lyomuKorinto, a ti: “Ngame onda kunu, Apollos e ta tekele, ihe Kalunga oye a menitha e ta kokitha oshimeno. Ngoka ta kunu naangoka ta tekele, itaa vulu okuyelekwa naKalunga, ngoka ta kokitha.” (1 Kor. 3:6, 7) Ngaashi Paulus, otu na aluhe okupandula Jehova, omolwiizemo iiwanawa mbyoka twa mona muukalele.

17. Ongiini tatu vulu okuulika olupandu, sho tu li “aalongi pamwe” naKalunga, Kristus naayengeli?

¹⁷ Ongiini tatu vulu okuulika olupandu, omolwuuthembahenda wokukala “aalongi pamwe” naKalunga, Kristus naayengeli? Omokuninga ngaashi tatu vulu tu lombwele yalwe kombinga yonkundana ombwanawa. Opu na omikalo odhindji dhokuuvitha, ngaashi okuuvitha ‘montaneho nomomagumbo.’ (Iil. 20:20) Oyendji ohaya nyanyukilwa wo okugandja uunzapo wontukuluka. Uuna ya tsakaneke omuntu, ohaye mu popitha momukalo gwombili nokukambadhala okutameka oonkundathana naye. Ngele omuntu oku ulike ohokwe, ohaya kundathana naye etumwalaka lyUukwaniilwa, taye shi ningi nuukeka.

18-19. (a) Ongiini hatu tekele oombuto dhoshili? (b) Hokolola oshiholelwa shoka tashi ulike nkene Jehova a kwathele omukonakoni gumwe.

¹⁸ Tu li “aalongi pamwe naKalunga,” katu na owala okukuna oombuto dhoshili, ihe otu na wo oku dhi tekela. Uuna omuntu a ulike ohokwe, otwa hala okukala hatu ningi oonkambadhala tu mu galukile nenge tu ninge omalongekidho a talelwe po kugulwe, nelalakano lyokutameka ekonakonombiimbeli naye. Sho omukonakoni ta humu komeho, ohatu kala twa nyanyukwa okumona nkene Jehova te mu kwathele a lundulule okudhiladhila kwe.

¹⁹ Natu taleni koshiholelwa shaRaphalalani, ngoka a li onganga yomoSouth Afrika. Okwa li e hole shoka ti ilongo mekonakonombiimbeli lye. Ihe okwa li a taalele eshongo enene, sho i ilongo shoka Ombiimbeli tayi ti kombinga yokupopya noohekulululwa mboka ya sa. (Deut. 18:10-12) Mokweendela ko kwethimbo, okwe etha Kalunga a zule okudhiladhila kwe. Mokweendela ko kwethimbo, okwe ke etha po uunganga, nonando iilonga mbyoka oyo ya li hayi mu etele omboloto. Raphalalani, ngoka ngashingeyi e na omimvo 60, ota ti: “Onda pandula Oonzapo dhaJehova, sho dha kwathela ndje momikalo odhindji, ngaashi okumona iilonga. Ihe olupandu otandi lu pe unene Jehova, sho a kwathele ndje ndi ninge omalunduluko monkalamwenyo yandje, opo ndi vule okukutha ombinga muukalele, ndi li Onzapo ye ya ninginithwa.”

20. Owa tokola toko okuninga shike?

²⁰ Moshitopolwa shika, otwa kundathana omaliko gane ngoka ihaaga monika. Eliko ndyoka lya simanenena momaliko ngoka, olyo uuthembahenda wokukala tu li ookuume kaJehova kopothingo. Shoka ohashi shi ningitha tashi wapa tu mone uuwanawa momaliko galwe ngoka ihaaga monika, ano oku mu galikana, ekwatho lyombepo ondjapuki nekwatho ndyoka Jehova, Jesus naayengeli haye tu pe. Natu kaleni twa tokola toko tu kale tu na olupandu shi vulithe nale, omolwomaliko ngoka ihaaga monika. Inatu etha po nando okupandula Jehova, sho e li Kuume omwaanawa.