Aakwaniilwa taya kondjithathana momasiku gahugunina

Omahunganeko ngoka ga popiwa moshimpungu shika, otaga hokolola iiningwanima mbyoka ya ningwa ya landulathana. Otayi ulike kutya otu li pethimbo ‘lyehulilo lyuuyuni.’ — Dan. 12:4.

Oshimpungu tashi ulike omahunganeko nosho wo uuyelele kombinga yomukwaniilwa gwokuumbangalantu nomukwaniilwa gwokwuumbugantu, okuza mo 1870 sigo okunena.

Enyolo: Eh. 11:7; 12:13, 17; 13:1-8, 12

Ehunganeko: “Oshilikama” osha kala nokupangela aantu kombanda yevi, uule womimvo odhindji. Pethimbo lyehulilo, omutse gwasho omutiheyali, ogwa ehamekwa. Lwanima, omutse gwasho ogwa aluka, na “evi alihe” olya landula oshilikama. Satana oha longitha oshilikama shoka a “kondjithe oyana mboka ya hupu ko.”

Egwanitho: Konima yEyelu, omapangelo gopantu ngoka ge li ompinge naJehova, oga holoka. Konima yomimvo odhindji, pIita yoTango yUuyuni, epangelo lyaBritania olya kanitha oonkondo dhalyo odhindji. Olya ka kala ishewe li na oonkondo, sho lya wayiminwa kuAmerika. Unene tuu pethimbo ndika lyehulilo, Satana okwa kala ta longitha omapangelo agehe gokombanda yevi, ga hepeke aapiya yaKalunga.
Enyolo: Dan. 11:25-45

Ehunganeko: Ekondjithathano pokati komukwaniilwa gwokuumbangalantu nogwokuumbugantu pethimbo lyehulilo.

Egwanitho: Epangelo lyaNdowishi naAnglo-Amerika taga kondjithathana. Mo 1945, Soviet Union niilongo mbyoka yi imanga kumwe naye, oya ningi omukwaniilwa gwokuumbangalantu. Mo 1991, epangelo lyaSoviet Union olya hulu po, nomokweendela ko kwethimbo, Rusia niilongo mbyoka yi imanga kumwe naye, oya ningi omukwaniilwa gwokuumbangalantu.
Omanyolo: Jes. 61:1; Mal. 3:1; Luk. 4:18

Ehunganeko: Jehova okwa tumu “omutumwa” gwe a ‘longekidhe ondjila,’ manga Uukwaniilwa wopaMesiasa inaawu dhikwa po. Omutumwa ngoka okwa tameke ‘okuuvithila aaifupipiki onkundana ombwanawa.’

Egwanitho: Okuza mo 1870 nasha okuuka komeho, omumwatate C. T. Russell nooyakwawo, oya konakona Ombiimbeli nuudhiginini, opo ya mone lela shoka tayi longo. Mo 1881, oye shi mono mo kutya osha simana noonkondo, aapiya yaKalunga ya kale haya uvitha. Oya nyanyangidha iitopolwa ngaashi “Otwa pumbwa aauvithi 1 000” nosho wo “Aagwayekwa ya langekwa po yu uvithe.”
Enyolo: Mat. 13:24-30, 36-43

Ehunganeko: Omutondi okwa kunu omawu ogendji mokati kiilya, e taga ethiwa ga koke noga kala ge vule iilya sigo eteyo lya thiki. Pethimbo lyeteyo, omawu oga yoololwa mo miilya.

Egwanitho: Okuza momumvo 1870 okuuka komeho, Aakriste yashili oya tameke okuyoololwa mo mwaamboka yiifundja. Pethimbo lyehulilo, Aakriste yashili oya gongelwa nokuyoololwa mAakriste yiifundja.
Enyolo: Dan. 2:31-33, 41-43

Ehunganeko: Oompadhi dhosheela nodheloya, odhoshiyelekela shoka sha ningwa miiyela ya yoolokathana.

Egwanitho: Eloya otali thaneke aantu mboka ye li kohi yepangelo lyaAnglo-Amerika, mboka ye li ompinge nalyo. Omolwaantu mboka, epangelo ndyoka ihali vulu okulongitha oonkondo dhalyo ngaashi lya hala.
Enyolo: Mat. 13:30; 24:14, 45; 28:19, 20

Ehunganeko: “Iilya” oya gongelwa “miigandhi,” ‘nomupiya omudhiginini nomunandunge’ okwa langekwa po a tonatele “aapiya ooyakwawo” (NW). ‘Elaka etoye lyOshilongo’ olya tameke okuuvithilwa “aantu ayehe.”

Egwanitho: Mo 1919, omupiya omudhiginini okwa langekwa po a tonatele aapiya yaKalunga. Okuza ethimbo ndyoka okuuka komeho, aakonakonimbiimbeli oya li yu uvitha shi vulithe nale. Kunena, Oonzapo dhaJehova ohadhi uvitha miilongo yi vulithe po 200, nohadhi nyanyangidha iileshomwa yopaMbiimbeli momalaka ge vulithe pe 1 000.
Omanyolo: Dan. 12:11; Eh. 13:11, 14, 15

Ehunganeko: Oshilikama shooniga mbali, osha lombwele aantu kombanda yevi ya honge “oshiyelekela shoshilikama,” e tashi ‘fudhile ombepo yomwenyo moshiyelekela.’

Egwanitho: Epangelo enankondo muuyuni, Anglo-Amerika, olyo lya kwatele komeho mokutotwa po kwOshipandi shIigwana. Ehangano ndika olya li lya ambidhidhwa kiigwana yilwe. Mokweendela ko kwethimbo, omukwaniilwa gwokuumbangalantu naye okwa wayimine oshipandi shoka, ihe okuza owala mo 1926 sigo 1933. Ngaashi owala Iigwana ya Hangana, oshipandi shoka nasho osha pewa esimano ndyoka li na okupewa Uukwaniilwa waKalunga.
Enyolo: Dan. 8:23, 24

Ehunganeko: Omukwaniilwa omwiinayi ote ke “eta ehanagulo likenyaneka.”

Egwanitho: Epangelo enankondo muuyuni, Anglo-Amerika, olya li lya eta ehanagulo enene. Pashiholelwa, pethimbo lyIita Iitiyali yUuyuni, Amerika okwa etitha ehanagulo enene noonkondo, sho u umbile aatondi yawo naBritania oomboma mbali dhopalute.
Omanyolo: Dan. 11:31, yelekanitha OB-1954; Eh. 17:3, 7-11

Ehunganeko: Oshilikama “oshitiligane” shi na ooniga omulongo shoka shi li omukwaniilwa omutihetatu, osha zi mo molumbogo. Embo lyaDaniel olya popya omukwaniilwa ngoka e li ‘oshiyelekela shiitonditha tashi eta ehanagulo.’

Egwanitho: Oshipandi shIigwana osha kala itaashi dhana we onkandangala pethimbo lyIita Iitiyali yUuyuni. Konima yiita mbyoka, opwa ‘tulwa’ Iigwana ya Hangana. Ngaashi Oshipandi shIigwana, Iigwana ya Hangana oya pewa esimano ndyoka lya gwana okupewa Uukwaniilwa waKalunga. Iigwana ya Hangana otayi ka ponokela omalongelokalunga.
Omanyolo: 1 Tes. 5:3; Eh. 17:16

Ehunganeko: Iigwana oyi igidha ‘ombili negameno,’ ‘nooniga omulongo’ nosho wo “oshilikama,” oya ponokele “ohonda” noye yi hanagula po. Lwanima, iigwana oya hanagulwa po.

Egwanitho: Iigwana otashi vulika yi igidhe kutya oye eta ombili negameno muuyuni. Opo ihe iigwana mbyoka tayi ambidhidha Iigwana ya Hangana, otayi hanagula po omahangano gomalongelokalunga giifundja. Shoka otashi ka kala etameko lyuudhigu uunene. Uudhigu uunene mboka, otawu ke ya pehulilo, uuna uuyuni awuhe waSatana wa hanagulwa po puArmagedon.
Omanyolo: Hes. 38:11, 14-17; Mat. 24:31

Ehunganeko: Gog okwa ponokele oshilongo shaapiya yaKalunga. Opo ihe, aayengeli oya gongele “aahogololwa.”

Egwanitho: Omukwaniilwa gwokuumbangalantu nosho wo omapangelo galwe muuyuni, otaya ka ponokela aapiya yaKalunga. Konima ngele eponokelo ndyoka lya tameke, aagwayekwa mboka ya hupa ko, otaya ka gongelwa ya ye megulu.
Omanyolo: Hes. 38:18-23; Dan. 2:34, 35, 44, 45; Eh. 6:2; 16:14, 16; 17:14; 19:20

Ehunganeko: “Omukayili” ‘gwokakambe okatokele,’ okwa ‘sindana’ mokuhanagula po Gog netangakwiita lye. “Oshilikama” oshu “umbilwa mefuta lyomulilo,” na oshiyelekela oshinenenene osha nyanyagulwa po.

Egwanitho: Jesus, Omukwaniilwa gwUukwaniilwa waKalunga, ota ka hupitha aapiya yaKalunga. Ye naapangeli pamwe naye 144 000 nosho wo etangakwiita lye lyaayengeli, otaya ka hanagula po oshipandi shiigwana, ano uuyuni waSatana.