Oto vulu okuhogolola kutya owa hala onakuyiwa ya tya ngiini

Konima yomimvo 3 500 dha ka pita, Jehova okwa li a lombwele mboka ya li haye mu longele kutya oye na okuninga shike, opo ya ka kale nonkalamwenyo ombwanawa, a ti: “Otandi ku pe, u hogolole pokati komwenyo neso, pokati keyambeko lyaKalunga netulomutima lye, notandi hiya egulu nevi li ninge onzapo yehogololo ndyoka to hogolola. Hogolola omwenyo.” — Deuteronomium 30:19.

Aantu mboka oya li ye na okuninga ehogololo lyomondjila, opo ya ka kale nonkalamwenyo ombwanawa. Natse kunena otu na okuninga ehogololo lya faathana. Ombiimbeli oya yelitha kutya ongiini tatu vulu okuhogolola onakuyiwa ombwanawa ya ti: “Hola Omuwa Kalunga koye, vulika kuye.” — Deuteronomium 30:20.

OSHIKE TASHI KU KWATHELE WU KALE WU HOLE JEHOVA NOHO VULIKA KUYE?

KONAKONA OMBIIMBELI: Opo wu kale wu hole Jehova, tango owa pumbwa okwiilonga kombinga ye mOmbiimbeli. Ngele owe shi ningi, oto ka mona kutya oKalunga omunahole, ngoka e ku halela uuwanawa. Ote ku hiya wu galikane kuye, ‘oshoka oye omusilishimpwiyu gwoye,’ nenge tu tye oku na ko nasha nangoye. (1 Petrus 5:7) Ombiimbeli otayi ti kutya ngele owa ningi oonkambadhala wu hedhe popepi naye, nena ‘ota hedha kungoye.’ — Jakob 4:8.

TULA MIILONGA SHOKA TO ILONGO: Okupulakena kuKalunga osha hala okutya okulandula ewiliko lye lyopandunge ndyoka li li mOmbiimbeli. Ngele owa kala ho shi ningi, “oto kala omusindani nomunelago.” — Josua 1:8.