ONDJOKONONA
“Ngashingeyi ondi hole uukalele!”
ONDA putukila mondoolopa Balclutha, yi li kokantuntu kokuumbugantu waNew Zealand. Sho nda li okanona, onda li handi kala ndu uvite ndi li popepi naJehova nonda li ndi hole oshili. Okuya kokugongala kakwa li omukundu kungame, nuuna ndi li kOshinyanga shUukwaniilwa onda li handi kala ndu uvite nda gamenwa nonda nyanyukwa. Nonando onda li ndi na oohoni, onda li handi tyapula uukalele oshiwike kehe. Kanda li handi kala nda tila okuuvithila aanasikola ooyakwetu naantu yalwe. Onda li ndu uvite etumba sho ndi li Onzapo yaJehova, nondi iyapulile Jehova sho ndi na omimvo 11.
ONDA LI NDA KANITHA ENYANYU
Shiyemateka, sho nda li ndi na oomvula omulongo nandatu lwaampono, ohole yandje yokuhola Jehova oya talala. Onda li ndi wete aanasikola ooyakwetu ye na emanguluko lyokuninga shoka ya hala, nonda li nda hala okukala nde ya fa. Onda li ndi wete kutya oompango dhaavali yandje nomithikampango dhopaKriste odha manga ndje, nonda li ndi wete okulongela Jehova ku li omutengi. Nonando onda li ndi shi kutya Jehova oko e li, kanda li we ndu uvite ndi na ekwatathano naye.
Nando ongawo, kanda li nde etha po thiluthilu okuuvitha, ihe onda li owala handi shi ningi omalupita. Muukalele onda li handi yi mo inaandi ilongekidha, nonda li handi nyengwa okutameka oonkundathana naantu. Shoka osha ningitha ndje kaandi kale handi pondola muukalele nondi kanithe enyanyu. Onda li ndi ipula kutya, ‘Omuntu ota vulu ngiini okukala ha nyanyukilwa iilonga mbika?’
Sho nda gwanitha omimvo 17, onda kala nda halelela okukala ndi li kungame mwene. Onkene onda longele omitsalo dhandje, e tandi tembukile koAustralia. Aavali yandje oya li ya yemata noonkondo sho tandi tembuka. Oya li tayi ipula nangame, ihe oya li taya dhiladhila kutya otandi ka tsikila okulongela Jehova.
Sho nda tembukile koAustralia, onda talala pambepo thiluthilu. Onda tameke okukala handi faula omakugongala. Onda tameke okupanga uukuume naagundjuka mboka ya li ya talala pambepo ya fa ndje, mboka ya li owala haya yi kokugongala omalupita noye hole omainyanyudho sha pitilila nokunwa omalovu. Kokutala konakuziwa yandje, oshi iwetikile kutya onda li ndi na onkalamwenyo yopaali.
OSHIILONGOMWA SHA SIMANA SHOKA KAANDA LI NDA TEGELELA
Konima yomimvo mbali lwaampono, onda tsakaneke omumwameme gumwe ngoka a ningitha ndje ndi ipule kutya onkalamwenyo yandje oyu uka peni. Onda li handi zi megumbo limwe naamwameme yatano inaaya hokanwa, notwa li twa hiya omutonatelishikandjo nomukadhi, Tamara, ye ye ya kale haya zi maandjetu uule woshiwike. Manga omusamane gwe i ipyakidhila niinima yegongalo, Tamara okwa li ha kala natse nokwa li ha yolo aluhe natse. Onda li ndi shi hole. Okwa li e hole aantu noha popiwa naye nuupu. Molwaashoka Tamara okwa li e na uupambepo uuwanwa noonkondo, kanda li nda tegelela a kale ha yolo nokunyanyukilwa pamwe natse.
Tamara okwa li omulaadhi lela. Ohole ye yokuhola oshili nuukalele oya li ya kola lela, shoka sha ningitha ndje ndi kale nda hala okukala nde mu fa. Okwa li ha nyanyukilwa okupa Jehova shoka oshiwanawa, omanga ngame nda li handi mu longele shampa owala te ningi. Uulaadhi we nokukala kwe aluhe a nyanyukwa okwa kwathela ndje noonkondo ndi ninge omalunduluko monkalamwenyo yandje. Oshiholelwa she osha ningitha ndje ndi dhiladhile muule kombinga yoshili yimwe ya simanenena, ano kutya Jehova okwa hala tu mu longele “nenyanyu” ‘nokuligola koshipala she twa nyanyukwa.’ — Eps. 100:2.
TANDI TAMEKE OKUKALA ISHEWE NDI HOLE UUKALELE
Onda li nda hala okukala nda nyanyukwa ngaashi Tamara, ihe opo ndi shi ninge, onda li nda pumbwa okuninga omalunduluko omanene. Osha li sha pula ndje ethimbo, ihe kashonanakashona onda tameke okuninga omalunduluko. Onda tameke okukala handi ilongekidhile uukalele nokukutha uukwathelikokolindjila omathimbo nomathimbo. Shoka osha kwathele ndje kaandi kale we nda tila okupopya naantu nondi kale ndi na omukumo. Okulongitha Ombiimbeli sho tandi uvithile aantu, okwa kwathele ndje ndi kale handi tyapula uukalele. Konima yaashono, onda tameke okukala tandi kutha uukwathelikokolindjila omwedhi kehe.
Onda tameke okupanga uukuume nooitaali yomapipi ga yoolokathana, ano mboka ye na uupambepo uuwanawa nohaya longele Jehova nuulaadhi. Iiholelwa yawo iiwanawa oya kwathele ndje ndi talulule shoka ndi na okukala nda pititha komeho monkalamwenyo yandje nondi tameke okukala handi lesha Ombiimbeli esiku kehe. Onda tameke nokuli okukala handi tyapula uukalele shi vulithe nale, nomokweendela ko kwethimbo onda ningi omukokolindjila gwondjigilile. Onda kala ndu uvite nda kola pambepo nonda nyanyukwa sho ndi li oshitopolwa shegongalo.
OSHO NDA MONO PO OMUKOKOLINDILA OMUKWETU
Konima yomumvo gumwe, onda tsakanene naAlex, omumwatate omunambili, e hole Jehova nosho wo uukalele. Okwa li omuyakuligongalo nonda adha a kokola ondjila uule womimvo hamano. Pompito yimwe Alex okwa li wo a yi a ka longele koMalawi uule woomwedhi hetatu, hoka kwa li ku na ompumbwe onene yaauvithi. Sho a li koMalawi okwa li ha longo pamwe naatumwa mboka ya li oshiholelwa oshiwanawa kuye, noye mu ladhipike a tsikile okupititha komeho Uukwaniilwa.
Momumvo 2003, tse naAlex otwa hokana, notwa tsikile niilonga yethimbo lyu udha. Otwi ilongo iiyilongomwa oyindji iiwanawa, na Jehova okwe tu yambeke momikalo odhindji.
JEHOVA TA TSIKILE OKU TU YAMBEKA
Tu li muukalele moshitopolwa Gleno, moTimor-Leste
Momumvo 2009, otwa li twa hiywa tu ka longele koTimor-Leste tu li aatumwa, oshilongo oshishona shi li muuntuntu waIndonesia. Otwa li twa kumwa, twa tuntukwa notwa li wo twa tila. Konima yoomwedhi ntano, otwa thiki moshilandopangelo Dili.
Sho twa tembukile hoka otwa li tu na okwiigilila okukalamwenyo okupe. Otwa li tu na okwiigilila eputuko epe, elaka, iikulya nosho wo oonkalo dhomoshilongo moka. Muukalele otwa li hatu tsakaneke mo aantu ya hepa, inaaya longwa notaya monithwa iihuna. Otwa li hatu mono mo mboka ye na uupyakadhi wopalutu nowopamadhiladhilo, omolwiita nelongithonkondo.a
Iilonga yokuuvitha oya li tayi ende nawa lela. Pashiholelwa, oshikando shimwe onda li nda tsakaneke omukadhona a yemata e na omimvo 13, gwedhina Maria.b Opwa adhika pwa pita oomvula dhontumba sho yina a si, natate gwe okwa li owala he mu mono omalupita. Ngaashi aagundjuka ooyakwawo yepipi lye, Maria ka li e shi shoka e na okuninga monkalamwenyo ye. Otandi dhimbulukwa oshikando shimwe sho a li ta lili manga ta lombwele ndje nkene u uvite. Ihe kanda li ndi uvite ko ashihe shoka a li ta lombwele ndje, oshoka elaka lye kanda li natango ndi li shi nawanawa. Onda galikana Jehova, tandi mu pula a kwathele ndi tse Maria omukumo, nopo nduno onda tameke oku mu leshela omanyolo taga hekeleke. Konima yomimvo dhontumba, onda mono nkene oshili ya lundulula etaloko lyaMaria, eholokopo lye nosho wo onkalamwenyo ye. Konima yethimbo okwa ninginithwa, noku na aakonakonimbiimbeli ye mwene ngashingeyi. Kunena, Maria oku na aamwayina yopambepo oyendji noku uvite kutya oku holike.
Jehovah ota laleka nuuyamba iilonga yokuuvitha moTimor-Leste. Nonando aauvithi oyendji opo owala ya ninginithwa omimvo omulongo dha ka pita, oyendji yomuyo aakokolindjila, aayakuligongalo nenge aakuluntugongalo. Yalwe ohaya longo koombelewa dhokutoloka nohaya kwathele mokutoloka iileshomwa momalaka gomoshilongo shoka. Ohashi nyanyudha ndje noonkondo oku ya uva tayi imbi pokugongala, tayi imemeha nokumona sho taya panga uukuume naJehova.
Tu li naAlex, tu li pokuya koshitopolwa hoka ihaaku uvithilwa olundji, tu ka gandje okafo kokuhiya aantu kEdhimbuluko
KAPU NA ONKALAMWENYO YILWE YI YINYANYUDHA YI VULE NDJINO
Onkalamwenyo yetu moTimor-Leste oya li ya yooloka ko thiluthilu kwaandjoka twa li tu na moAustralia, ihe oya li yinyanyudha noonkondo. Omathimbo gamwe, otwa li hatu londo mokabesa mwa thinana, moka aantu ya li haya kala ye na oohi oonkunkutu niikwamboga oyindji mbyoka ya landa komatala. Omathimbo gamwe otwa li hatu konakona naantu mondunda onshona mu na uupyu noinaayi kolongwa pevi, noondjuhwa tadhi matuka owala shaa mpoka. Nonando ongawo, olundji onda li handi i ipopile tandi ti kutya: ‘Okulongela Jehova ngeyi okwa dhenga mbanda!’
Tu uka koshitopolwa hoka tatu ka longela
Uuna tandi dhiladhila konakuziwa yandje, ohandi kala ndi na olupandu olunene sho aavali yandje ya longo nuudhiginini ya longe ndje omithikampango dhaJehova noya kwathela ndje, nokuli naasho nda li methimbo edhigu lyuugundjuka. Shi na ko nasha nonkalo yandje, ondi wete kutya onda gwanithilwa shoka sha popiwa mOmayeletumbulo 22:6. Tate nameme oye tu uvitile uuntsa sho ye wete ngame naAlex twa nyanyukwa sho tatu longithwa kuJehova. Okuza mo 2016, otwa kala tatu longo miilonga yuutonatelishikandjo moshikandjo shaAustralasia.
Tatu ulukile aanona yamwe ya nyanyukwa yomoTimor-Leste uuvidio waKalipi naSofia
Oshikumithi okwiitaala kutya pompito yimwe sho nda li omugundjuka onda li nda tala ko iilonga yokuuvitha yi li omutengi. Ngashingeyi ondi hole uukalele noonkondo! Onde shi ndhindhilike kutya nonando ohatu piti momathimbo omadhigu monkalamwenyo, enyanyu lyashili ohali zi owala mokulongela Kalunga nomutima gwetu aguhe. Odhoshili kutya okulongela Jehova pamwe naAlex okwe etela ndje enyanyu enene noonkondo. Ngashingeyi ondu uvite ko uushili waashoka omupisalomi David a lombwele Jehova a ti: “Naa nyanyukwe ayehe mboka haa kongo egameno pungoye; otaa ki imba aluhe oondjimbo dhenyanyu. . . . Mboka ye ku hole, omolwoye oye na shili elago.” — Eps. 5:11.
Oshinyanyudha lela okukonakona Ombiimbeli naantu aaifupipiki!
a Petameko lyomumvo 1975, moTimor-Leste omwa tukuluka iita uule womimvo dhi vulithe po 20, molwaashoka aantu oya li ya hala emanguluko.
b Edhina ndyoka halyo lye lyolela.