Mbela oto ke etha sha shi ku ethithe po okulandula Jesus?

1. Oshike tashi vulika sha li she ku kumitha sho wa kambadhala okulombwela aantu kombinga yetumwalaka lyOmbiimbeli oshikando shotango?

MBELA oto dhimbulukwa oshikando shotango sho wa mono oshili yOmbiimbeli? Otashi vulika oshili ndjoka wa li to ilongo pethimbo ndyoka wa li wu yi uvite ko nawanawa. Otashi vulika wo wa li to dhiladhila kutya kehe gumwe ota ka taamba ko oshili ndjoka. Owa li wa tompwa kutya etumwalaka lyOmbiimbeli otali ka kwathela aantu ya kale nonkalamwenyo tayi ti sha ngashingeyi nosho wo netegameno ewanawa lyonakuyiwa. (Eps. 119:105) Onkee ano, owa li wa tameke okulombwela nehwamo ookuume koye ayehe naapambele oshili ndjoka wi ilonga. Ihe oshike sha ningwa po? Osha li she ku kumitha sho oyendji ya tindi okutaamba ko shoka we ya lombwela.

2-3. Jesus aantu oyendji yopethimbo lye oya li ye mu tala ko ngiini nosho wo etumwalaka lye?

² Inashi tu kumitha uuna aantu taya tindi okutaamba ko etumwalaka ndyoka tatu ya uvithile. Sho Jesus a li kombanda yevi, aantu oyendji kaya li ya pulakene kuye, nokuli nonando okwa li a longo iikumithalonga, mbyoka ya li yu ulike kutya Kalunga oye e mu tumu. Pashiholelwa, Jesus okwa li a yumudha Lasarus, oshikumithalonga shoka sha li itaashi vulu okutindwa nokuli kwaamboka ya li ompinge naye. Nonando ongawo, aawiliki yAajuda kaya li yi itaala kutya Jesus oye Mesiasa. Oya li nokuli ya hala okudhipaga Jesus naLasarus. — Joh. 11:47, 48, 53; 12:9-11.

³ Jesus okwa li e shi kutya aantu oyendji otaya ka tinda okwiitaala kutya oye Mesiasa. (Joh. 5:39-44) Okwa li a lombwele ongundu yaalongwa yaJohannes Omuninginithi, a ti: “Omunelago oye tuu ngoka itaa etha ndje.” (Mat. 11:2, 3, 6) Mbela omolwashike aantu oyendji ya li ye etha po okulandula Jesus?

4. Oshike tatu ka kundathana moshitopolwa shika?

⁴ Moshitopolwa shika nomwaashoka tashi landula ko, otatu ka kundathana kombinga yomatompelo gontumba kutya omolwashike aantu oyendji yomethelemumvo lyotango kaaya li yi itaala Jesus. Otatu ka tala wo kutya omolwashike aantu oyendji kunena ihaaya taamba ko etumwalaka lyOmbiimbeli. Shoka sha simanenena, otatu ki ilonga kutya omolwashike tatu vulu okukala tu na eitaalo lya kola muJesus, ndyoka tali ke tu kwathela kaatu ethe po oku mu landula.

(1) EPUTUKO LYAJESUS

5. Omolwashike tashi vulika aantu yamwe ya li ya thiki pehulithodhiladhilo kutya Jesus haye Mesiasa ngoka u uvanekwa?

⁵ Aantu oyendji kaya li yi itaale Jesus omolweputuko lye. Oya li ye shi zimine kutya Jesus omulongi omuwanawa nosho wo kutya oha longo iikumithalonga. Nonando ongawo, kuyo Jesus okwa li owala omwanamati gwomuhongi gwiipilangi ohepele. Okwa li wo a za muNasaret, oshilando shoka tashi vulika sha li sha talika ko inaashi simana naanaa. Nokuli Natanael, ngoka lwanima a ka ninga omulongwa gwaJesus, petameko okwa tile: “MuNasaret otamu vulu tuu okuza uuwanawa washa?” (Joh. 1:46) Natanael otashi vulika a li a dhina oshilando moka Jesus a putukila. Nenge tashi vulika a li ta dhiladhila kombinga yehunganeko ndyoka tali adhika muMika 5:2, ndyoka tali ti kutya Mesiasa ota ka valelwa muBetlehem, ihe hamuNasaret.

6. Oshike sha li tashi vulu okukwathela aantu yopethimbo lyaJesus ya mone kutya oye Mesiasa?

⁶ Omanyolo otaga ti ngiini? Omuhunganeki Jesaja okwa hunganeke kutya aatondi yaJesus itaya ka gandja eitulomo kombinga ‘yepipi lyaMesiasa.’ (Jes. 53:8) Uuyelele owundji kombinga ye owa li wa hunganekwa. Ando aantu mboka oya kongele ethimbo ya konakone uuyelele awuhe mboka kombinga yaJesus, ando oye shi mono mo kutya Jesus okwa valelwa muBetlehem nonokutya ye ogwomezimo lwomukwaniilwa David. (Luk. 2:4-7) Onkee ano, Jesus okwa valelwa moshilando shoka sha hunganekwa muMika 5:2. Uupyakadhi owa li peni nduno? Aantu oya li ya thiki pehulithodhiladhilo lya puka nziya. Kaya li ye na uuyelele wi ihwa po. Shoka oshe ya ningitha ye ethe po okulandula Jesus.

7. Omolwashike aantu oyendji kunena ya tala ko nayi Oonzapo dhaJehova?

⁷ Mbela nokunena aantu osho ye li ngawo? Eeno. Oonzapo dhaJehova odhindji kadhi shi aanenentu nenge aayamba, onkene aantu oyendji oye dhi tala ko dhi li ‘aantu inaaya longwa sha.’ (Iil. 4:13) Aantu yamwe oyu uvite kutya Oonzapo dhaJehova itadhi vulu okulonga aantu kombinga yOmbiimbeli, molwaashoka inadhi ya koosikola dhokwiilongela uusita. Yalwe ohaya ti kutya elongelokalunga lyOonzapo dhaJehova “olyokoAmerika,” ihe uushili owo kutya Oonzapo dhaJehova odhindji ihadhi zi moAmerika. Shimwe ishewe, aantu yamwe oya lombwelwa kutya Oonzapo inadhi itaala muJesus. Omimvo dha ka pita, aantu oya kala noku ithana oshigwana shaJehova “Aakomonisi,” “oondaadhi dhaAmerika” nosho wo “aanashipotha.” Onkee ano, omolwomahokololo ogendji ngoka kaage li paushili, aantu oyendji ihaya kala ya hala okuninga Oonzapo dhaJehova.

8. Shi ikolelela kIilonga 17:11, aantu oye na okuninga shike, ngele oya hala okumona kutya oolye aapiya yashili yaKalunga kunena?

⁸ Oshike tashi vulu oku ku kwathela kuu ethe po okulandula Jesus? Owa pumbwa okuninga oonkambadhala wu mone oshili yi ihwa po kombinga yeitaalo lyetu. Shoka osho omunyoli gwEvaangeli lyaLukas a li a tokola okuninga. Okwa li a konakona nuukeka “iinima ayihe okuza petameko.” Okwa li a hala mboka taya ka lesha shoka a nyola, ya ‘tseye oshili kombinga yomahokololo’ ngoka yu uva kombinga yaJesus. (Luk. 1:1-4) Aajuda yomuBerea shonale oya li ya fa Lukas. Sho yu uvu oshikando shotango onkundana ombwanawa kombinga yaJesus, oya kala nokukonakona Omanyolo gOshihebeli, ya tale ngele shoka ya lombwelwa oshoshili tuu. (Lesha Iilonga 17:11.) Momukalo gwa faathana, owa pumbwa okukala ho konakona iinima muule. Owu na okuyelekanitha shoka to longwa naashoka Omanyolo taga ti. Owa pumbwa wo okukonakona shoka sha li sha ningwa koshigwana shaJehova pethimbo lyetu. Ngele owa ningi omapekapeko ngoka nuukeka, ito ke etha omafekela nenge omifofodholo dhi ku pukithe.

(2) JESUS OKWA LI A TINDI OKULONGA IIKUMITHALONGA U ULIKE KUTYA OYE MESIASA

9. Oshike sha li sha ningwa po, sho Jesus a tindi okuulukila aantu endhindhiliko kutya ota longithwa kuKalunga?

⁹ Yamwe yopethimbo lyaJesus kaya li ya gwanenwa kwaashoka Jesus te ya longo. Oya li ya hala Jesus a ninge oshindji kaashi shi owala oku ya longa. Oya pula Jesus u ulike kutya oye Mesiasa, mokulonga “oshikumithalonga shokuulika kutya ota longithwa kuKalunga.” (Mat. 16:1) Otashi vulika ya li ye shi ningi, molwaashoka inaayu uva ko nawa ehunganeko ndyoka li li muDaniel 7:13, 14. Nonando ongawo, kuJehova kasha li natango ethimbo lyokugwanitha po ehunganeko ndyoka. Shoka Jesus a li e ya longo osha li sha gwana oku yu ulukila kutya oye Mesiasa. Ihe sho a tindi oku ya pa endhindhiliko ndyoka ya li ya hala okumona, oye etha po oku mu landula. — Mat. 16:4.

10. Jesus okwa li a gwanitha ngiini shoka sha nyolwa kuJesaja kombinga yaMesiasa?

¹⁰ Omanyolo otaga ti ngiini? Omuhunganeki Jesaja okwa popi kombinga yaMesiasa, a ti: “Ita ka igidha nenge a kololoke nenge ewi lye li kugagane momapandaanda.” (Jes. 42:1, 2) Jesus okwa li a gwanitha po uukalele we nengungumano nosho wo neifupipiko. Ka li a tungu ootempeli, noka li ha zala omizalo dhi ikalekelwa dhopalongelokalunga nenge a kale a hala aantu ye mu ithane omadhinasimaneko gopalongelokalunga. Nonando omwenyo gwaJesus ogwa li moshiponga sho a li ta pangulwa, okwa tindi okuninga shoka omukwaniilwa Herodes a hala ninge, ano okulonga oshikumithalonga montaneho ye. (Luk. 23:8-11) Jesus okwa li a longo iikumithalonga yontumba, ihe okuuvitha onkundana ombwanawa oko kwa li unene kwa simanenena kuye. Okwa li a lombwele aalongwa ye, a ti: ‘Shika osho nde endela.’ — Mark. 1:38.

11. Omadhiladhilo ga puka geni aantu yamwe ye na kunena?

¹¹ Mbela nokunena aantu osho ye li ngawo? Eeno. Kunena aantu oyendji ohaya kala ya fuuka komatungo goongeleka omanene go opala, kaakwatelikomeho mboka ye na omadhinasimaneko tagu ulike oondondo dhawo nosho wo kiituthi mbyoka aantu oyendji kaaye shi mpoka ya tamekela. Ihe aantu mboka haya yi komalongelokalunga ngoka iha yi ilongo po sha kombinga yaKalunga nomalalakano ge. Mboka haya kala pomakugongala getu gopaKriste ohayi ilongo shoka Jehova a tegelela tu ninge nonkene tu na okwiihumbata metsokumwe nehalo lye. Iinyanga yetu yUukwaniilwa ohayi kala ya yela noyi li monkalo ombwanawa, ihe kayi shi yondilo. Mboka haya kwatele komeho ihaya zala omizalo dhi ikalekelwa nokaye na omadhinasimaneko ngoka tagu ulike kutya oya simana. Oohapu dhaKalunga odho onzo yaashoka hatu longo aantu naashoka twi itaala. Nonando ongawo, aantu oyendji ohaya tindi etumwalaka lyetu, molwaashoka oya tala ko omukalo moka hatu longele Kalunga gu li unene paunathangwa. Shimwe ishewe, omathimbo gamwe shoka hatu longo aantu ihaye shi taamba ko, oshoka ihashi nywitha omakutsi gawo.

12. Ngaashi sha yelithwa mAahebeli 11:1, 6, eitaalo lyetu oli na okukala lya kankamena kushike?

¹² Oshike tashi vulu oku tu kwathela kaatu ethe po okulandula Jesus? Omuyapostoli Paulus okwa li a lombwele Aakriste yomuRoma, a ti: “Eitaalo ohali zi mokuuva, neuvitho otali zi moohapu dhaKristus.” (Rom. 10:17) Onkee ano, ohatu koleke eitaalo lyetu mokukonakona Omanyolo, ihe hamokukutha ombinga miituthi yopalongelokalunga kaayi li pamanyolo, nonando oyi kale tayi monika yinyanyudha noyihokithi. Otu na okukala tu na eitaalo lya kola lya kankamena kontseyo yashili, molwaashoka “kapu na ngoka ta hokiwa kuKalunga, ngele ke na eitaalo.” (Lesha Aahebeli 11:1, 6.) Ano inatu pumbwa tu mone oshikumithalonga shontumba, opo tu kale twa tompwa kutya otwa mona oshili. Okukonakona nuukeka omalongo gOmbiimbeli ngoka taga koleke eitaalo lyetu, okwa gwana oku tu itaalitha kutya otwa mona oshili nokaa tu kale tu na omalimbililo.

(3) JESUS KALI HA LANDULA OMITHIGULULWAKALO ODHINDJI DHOSHIJUDA

13. Oshike sha li sha ningitha aantu oyendji ya tinde Jesus?

¹³ Pethimbo lyaJesus, aalongwa yaJohannes Omuninginithi oya li ya limbililwa sho aalongwa yaJesus ya li ihaayi idhilike iikulya. Jesus okwa li e shi yelitha kutya kaya li ye na etompelo lyokwiidhilika iikulya, omanga natango e na omwenyo. (Mat. 9:14-17) Nonando ongawo, Aafarisayi naapataneki yamwe yaJesus oya li ye mu nyana, molwaashoka ihaa landula omithigululwakalo dhawo. Oya li haya kala ya geya uuna a aludha aavu mEsabati. (Mark. 3:1-6; Joh. 9:16) Oya li yi itala ko haya simaneke Ompango yEsabati, ihe oya li ye na oongeshefa motempeli. Oya li ya geya sho Jesus e ya nyenyetele omolwoshinima shoka. (Mat. 21:12, 13, 15) Shimwe ishewe, mboka Jesus a li u uvithile mosinagoga muNasaret oya li ya geya noonkondo sho a ningi eyelekanitho ndyoka lya holola kutya oyi ihole unene yoyene nokaye na eitaalo. (Luk. 4:16, 25-30) Aantu oyendji oya li ya tindi Jesus, molwaashoka kali ha ningi iinima momukalo moka ya li ya tegelela. — Mat. 11:16-19.

14. Omolwashike Jesus a li ompinge nomithigululwakalo dhopantu, ndhoka dha li itaadhi tsu kumwe naashoka sha popiwa mOmanyolo?

¹⁴ Omanyolo otaga ti ngiini? Jehova okwa popi okupitila momuhunganeki Jesaja, a ti: ‘Aantu mbaka ohaye ya kungame nomilungu dhawo notaa simaneke ndje nomakana gawo, ihe oomwenyo dhawo odhi li kokule nangame. Elongelokalunga lyawo lyokulongela ndje olya tungwa owala komautho gaantu.’ (Jes. 29:13) Jesus okwa li e li mondjila sho a li e li ompinge nomithigululwakalo dhaantu ndhoka dha li itaadhi tsu kumwe nOmanyolo. Mboka ya li ya pititha oompango nomithigululwakalo dhopantu komeho yaashoka tashi popiwa mOmanyolo, oya li ya tindi okuvulika kuJehova nosho wo okutaamba Jesus e li Mesiasa.

15. Omolwashike kunena aantu oyendji kaaye hole Oonzapo dhaJehova?

¹⁵ Mbela nokunena aantu osho ye li ngawo? Eeno. Aantu oyendji ohaya kala ya geya sho Oonzapo dhaJehova ihaadhi dhana pamwe nayo iituthi yopamithigululwakalo inaayi kankamena komanyolo, ngaashi omasiku gomavalo nOkrismesa. Yalwe ohaya kala ya geyela Oonzapo dhaJehova sho ihaadhi kutha ombinga mokudhana iituthi yopashigwana nenge sho ihaadhi landula omikalondjigilile dhopomafumviko ndhoka itaadhi tsu kumwe nOohapu dhaKalunga. Mboka haya kala ya geela Oonzapo dhaJehova omolwiinima mbyoka, otashi vulika ya kale yi itaala kutya otaya longele Kalunga momukalo ngoka a hokwa. Ihe itaya vulu okukala ya hokiwa kuye, ngele oya simaneka omithigululwakalo dhuuyuni, pehala lyokuvulika komalongo ga yela nawa gOmbiimbeli. — Mark. 7:7-9.

16. Shi ikolelela kEpisalomi 119:97, 113, 163-165, oshike tu na okuninga noshike tu na okuyanda?

¹⁶ Oshike tashi vulu oku tu kwathela kaatu ethe po okulandula Jesus? Otwa pumbwa okukoleka ohole yetu yokuhola oompango nomithikampango dhaJehova. (Lesha Episalomi 119:97, 113, 163-165.) Ngele otu hole Jehova, itatu ka landula omithigululwakalo ndhoka inaa hokwa. Itatu ke etha nando sha shi tu imbe tu kale tu hole Jehova.

(4) JESUS KALI E ETA ELUNDULUKO LYOPAPOLOTIKA NZIYA

17. Aantu yamwe yopethimbo lyaJesus oya li ya tegelela Mesiasa a ninge shike?

¹⁷ Aantu yamwe yopethimbo lyaJesus oya li ya hala mepangelo mu ningwe omalunduluko. Oya li ya tegelela Mesiasa e ya mangulule kepangelo lyAroma, ihe sho ya kambadhala oku mu ninga omukwaniilwa gwawo, okwa tindi. (Joh. 6:14, 15) Yalwe, mwa kwatelwa aayambi, oya li taya dhiladhila kutya Jesus ote ke eta omalunduluko mepangelo, shoka tashi ka geyitha Aaroma, mboka ya pa aawiliki yomalongelokalunga mboka oonkondopangelo. Omolwoshinima shoka, Aajuda oyendji oya tindi okutaamba ko Jesus.

18. Oshike shoka omahunganeko gOmbiimbeli ga popya kombinga yaMesiasa, shoka aantu oyendji kaaya li ya gandja eitulomo kusho?

¹⁸ Omanyolo otaga ti ngiini? Nonando omahunganeko ogendji oga li ga hunganeka kutya Mesiasa ota ka ninga Omusindani, omahunganeko galwe oge shi ulika kutya tango oku na okusa omolwoondjo dhetu. (Jes. 53:9, 12) Omolwashike nduno Aajuda ya li ye na omadhiladhilo ga puka kombinga yaMesiasa? Aantu oyendji yopethimbo lyaJesus kaya li ye hole omahunganeko ngoka itaage ya uvanekele ekandulopo lyomaupyakadhi gawo. — Joh. 6:26, 27.

19. Omadhiladhilo ga puka geni ga ningitha aantu oyendji kunena kaaya taambe ko etumwalaka lyetu?

¹⁹ Mbela nokunena aantu osho ye li ngawo? Eeno. Aantu oyendji kunena oye li ompinge natse, molwaashoka ihaatu kutha ombinga mopolotika. Ohaya kala ya tegelela natse tu kale hatu kutha ombinga momahogololo. Ashike otu shi kutya pataloko lyaJehova, ngele otwa hogolola omuwiliki gwopantu oye e tu pangele, nena kungawo otatu tindi Jehova oye a kale omupangeli gwetu. (1 Sam. 8:4-7) Aantu otashi vulika wo ya kale yu uvite kutya otwa pumbwa okutunga oosikola, iipangelo nosho wo okwaambidhidha aantu momikalo dhilwe dhi ili nodhi ili. Ihaya taamba ko etumwalaka lyetu, molwaashoka ohatu gandja unene eitulomo kiilonga yetu yokuuvitha, ihe hakokukandula po omaupyakadhi ngoka ge li muuyuni.

20. Ngaashi sha tsuwa omuthindo moohapu dhaJesus ndhoka tadhi adhika muMateus 7:21-23, otu na okukala hatu gandja unene eitulomo kushike?

²⁰ Oshike tashi vulu oku tu kwathela kaatu ethe po okulandula Jesus? (Lesha Mateus 7:21-23.) Otu na unene okugandja eitulomo lyetu kokugwanitha po iilonga mbyoka Jesus e tu lombwela tu longe. (Mat. 28:19, 20) Katu na nando okukala twi ipyakidhila niinima yopapolotika nosho wo nokukandula po omaupyakadhi guuyuni mbuka. Otu hole aantu nohatu kala twa hala oku ya kwathela nomaupyakadhi gawo, ihe otu shi kutya omukalo omwaanawa tatu vulu oku ya kwathela, omo ku ya kwathela yi longe kombinga yUukwaniilwa waKalunga noku ya kwathela ya pange uukuume naye.

21. Otu na okukala twa tokola toko okuninga shike?

²¹ Moshitopolwa shika, otwa kundathana kombinga yiinima ine mbyoka ya li yi imbi aantu oyendji kaaya taambe ko Jesus methelemumvo lyotango mbyoka nokunena tashi vulika yi ningithe yamwe kaaya pulakene ketumwalaka lyetu. Ihe mbela iinima mbyoka oyo owala tu na okuyanda? Hasho. Moshitopolwa tashi landula ko, otatu ka konakona iinima ine ya gwedhwa po, mbyoka tashi vulika yi ningithe omuntu kaa longele Jehova. Natu kale twa tokola toko kaatu ethe po nando okulandula Jesus nokukaleka eitaalo lyetu lya kola!