Kapu na shoka tashi vulu okwiimba mboka ye hole Kalunga ye mu longele

1-2. Omunyoli gumwe okwa ti shike, noshike tatu ka kundathana moshitopolwa shika?

KUNENA aantu omamiliyona ohaya ti kutya aniwa oyi itaala muJesus, ihe ihaya vulika kuye. (2 Tim. 4:3, 4) Omunyoli gumwe okwa tile: “Ando mokati ketu kunena omwa li mu na ‘Jesus’ gulwe ngoka ha popi iinima ngaashi ya popilwe kuJesus gwonale . . . , mbela otatu ka tinda okupulakena kuye ngaashi owala aantu ya ningile oomvula omayuvi gaali dha ka pita? . . . Uushili owo kutya aantu itaye ke mu pulakena.”

² Aantu oyendji yomethelemumvo lyotango oya li yu uvu Jesus sho te ya longo noye mu mono sho ta longo iikumithalonga, ihe oya tindi oku mu itaala. Omolwashike mbela? Moshitopolwa sha tetekele otwa tala omatompelo gane kutya omolwashike aantu ya li ya pundukithwa kwaashoka Jesus a popi nokwa ningi. Ngashingeyi natu ka taleni komatompelo galwe gane. Sho tatu shi ningi, otatu ka tala kutya omolwashike aantu ihaaya pulakene kaalanduli yaJesus kunena, nankene tatu vulu okushilipaleka kutya kapu na shoka tashi vulu oku tu imba tu longele Jehova.

(1) JESUS KALI E NA OKATONGO

3. Jesus okwa li a ningi shike shoka sha ningitha yamwe kaaye mu taambe ko?

³ Sho Jesus a li kombanda yevi, okwa li he endathana naantu ayehe. Okwa li ha li pamwe naayamba nosho wo mboka ye na oondondo dha simana, nokwa li wo hi itulile po ethimbo a kale pamwe naathigona nosho wo mboka taya mono iihuna. Shimwe ishewe, okwa li hu ungaunga nolukeno naamboka ya li ya talika ko ye li “aalunde.” Yamwe mboka yi ishi uuyuuki kaya li haya kala yu uvitile ombili shoka Jesus a li ha ningi. Oya li ya pula aalongwa ye, ya ti: ‘Omolwashike hamu li nohamu nu pamwe naafendelithi naalunde?’ Jesus okwe ya yamukula, a ti: “Aandjolowele inaya pumbwa omwaaludhi, ihe aavu tuu ayeke. Oshoka ngame inandi ya okwiithana mboka yi iwete aayuuki, ihe aalunde tuu, yi itedhulule.” — Luk. 5:29-32.

4. Shi ikolelela kwaashoka sha popiwa komuhunganeki Jesaja, Aajuda oya li ye na okutegelela aantu yi ihumbatele ngiini Mesiasa?

⁴ Omanyolo otaga ti ngiini? Manga nokuli Mesiasa inee ya kombanda yevi, omuhunganeki Jesaja okwe mu popi kutya ita ka taambwa ko kaantu. Ehunganeko ndyoka olya ti: “Okwa li a dhinwa nokwe ekelwahi kaantu . . . Okwa li a fa ngoka aantu ye mu isiikilila iipala yawo, yaaye mu tale. Okwa li a dhinwa, natse inatu mu simaneka nando.” (Jes. 53:3) Mesiasa okwa li te ke ekelwahi “kaantu,” onkee ano Aajuda yomethelemumvo lyotango oya li ye na okukala ye shi kutya aantu oyendji itaye ke mu taamba ko.

5. Aantu oyendji kunena oya tala ko ngiini aalanduli yaJesus?

⁵ Mbela nokunena aantu osho ye li ngawo? Eeno. Aawiliki yoongeleka oyendji ohaya nyanyukilwa okutaamba moongeleka dhawo aantu mboka ya simana, aayamba nosho wo mboka ya talika ko aanandunge kaantu muuyuni. Aawiliki mboka ohaye shi ningi, nonando olundji eihumbato nokukalamwenyo kwaantu mboka haya taamba moongeleka dhawo ihaku kala metsokumwe nomithikampango dhaKalunga. Aawiliki mboka oya dhina aapiya yaJehova aalaadhi sho ye na eihumbato lya yogoka, naasho aantu oyendji inaaye ya tala ko ya simana. Ngaashi sha popiwa kuPaulus, Kalunga oha hogolola mboka uuyuni wa “tala ko yopevilela.” (1 Kor. 1:26-29) Osha yela kutya aapiya ayehe aadhiginini yaJehova oye na ondilo momeho ge.

6. Jesus okwa popi shike muMateus 11:25, 26, nongiini tatu vulu oku mu holela?

⁶ Oshike tashi vulu oku tu kwathela kaatu ethe po okulongela Jehova? (Lesha Mateus 11:25, 26.) Ino etha wu nwethwe mo ketaloko lyuuyuni kombinga yoshigwana shaKalunga. Kala wu shi kutya Jehova oha longitha owala aantu aaifupipiki a gwanithe po ehalo lye. (Eps. 138:6) Dhiladhila wo kwaashihe shoka Jehova a tompola po, mokulongitha aantu mboka uuyuni wa tala ko kaaye shi aanandunge nenge inaaya simana.   

(2) JESUS OKWA LI HA ANEKE POMUTENYA OMALONGO GA PUKA

7. Omolwashike Jesus a li i ithana aafarisayi aafudhime, noya li yi inyenge ngiini?

⁷ Jesus okwa li a aneke nuulaadhi pomutenya iilonga yaakwatelikomeho yomalongelokalunga aafudhime yopethimbo lye. Pashiholelwa okwa aneke pomutenya uufudhime wAafarisayi, mboka ya li ya simaneka unene okwiiyoga kiikaha shi vulithe okusila oshimpwiyu aavali yawo. (Mat. 15:1-11) Aalongwa yaJesus otashi vulika ya li ya kuminwa oohapu dhe. Oya li nokuli ye mu pula ya ti: ‘Owu shi shi tuu kutya aafarisayi sho yu uvu oohapu ndhoka, oya ningi omwenyo omwiinayi?’ Jesus okwe ya yamukula, a ti: ‘Okehe tuu ontsika inaayi tsikwa kuTate gwomegulu, otayi ka vudhwa mo nomidhi dhayo. Ya etheni, oyo aakwatiketi lyaaposi aakwawo. Ngele ku na omuposi ta kwata keti lyomuposi omukwawo, nena ayehe yaali otaya gwile moshilambo.’ (Mat. 15:12-14) Jesus kali e etha ongeyo yaakwatelikomeho yomalongelokalunga yi mu imbe a popye oshili.

8. Jesus oku ulike ngiini kutya hamalongelokalunga agehe ga taambwa ko kuKalunga?

⁸ Jesus okwa li wo a aneke pomutenya omalongo giifundja gomalongelokalunga. Kali a ti kutya omaitaalo agehe oga taambiwa ko kuKalunga. Pehala lyaashono, okwa popi kutya aantu oyendji otaya ka hogolola okweenda mondjila ya mbwalangandja ndjoka tayi fala mekano, omanga ondjila ndjoka ya thinana notayi fala komwenyo tayi ke endwa owala kaantu aashona. (Mat. 7:13, 14) Okwe shi yelitha kutya aantu yamwe otaya ka kala ya fa taya longele Kalunga, ihe paushili wo wene haye taya longele. Okwa gandja elondodho, a ti: “Angaleni aahunganeki aafundja mboka taye ya kune molupe lwoonzi, ihe meni lyawo omambungu haga lyana. Otamu ya dhimbulula kiiyimati yawo.” — Mat. 7:15-20.

9. Omalongo giifundja gamwe geni Jesus a li a aneke pomutenya?

⁹ Omanyolo otaga ti ngiini? Ombiimbeli oya hunganeka kutya Mesiasa ota ka longela Otempeli yaJehova nuulaadhi. (Eps. 69:9; Joh. 2:14-17) Uulaadhi mboka owo wi inyengitha Jesus a aneke pomutenya omalongo giifundja nosho wo omikalondjigilile kaadhi li pamanyolo. Pashiholelwa, aafarisayi oya li yi itaala kutya omwenyo ihagu si, omanga Jesus a longo aantu kutya oonakusa oya kotha. (Joh. 11:11) Aasadukayi kaya li yi itaala kutya oonakusa otaya ka yumuka, ihe Jesus okwa li a yumudha kuume ke Lasarus. (Joh. 11:43, 44; Iil. 23:8) Aafarisayi oya li haya longo aantu kutya kehe shoka omuntu ta ningi monkalamwenyo ye, osha nunwa nale kuKalunga, ihe Jesus okwa li a longo aantu kutya otaya vulu okutokola ngele oya hala okulongela Kalunga nenge hasho. — Mat. 11:28.

10. Omolwashike aantu oyendji kaaye hole etumwalaka lyetu?

¹⁰ Mbela nokunena aantu osho ye li ngawo? Eeno. Aantu oyendji ihaye tu taamba ko, molwaashoka oshili ndjoka hatu longo aantu ohayi aneke pomutenya omalongo gawo giifundja. Aakwatelikomeho yomalongelokalunga ohaya longo aantu yawo kutya otaya ka pya moheli ngele otaya longo uukolokoshi. Ohaya tilitha aantu nelongo ndyono, opo ya kale haye ya kongeleka. Tu li aalongeli yaJehova, Kalunga kohole, ohatu kwathela aantu ya tseye kutya elongo ndyoka olyiifundja. Aakwatelikomeho yomalongelokalunga ohaya longo wo aantu kutya omwenyo ihagu si. Ohatu yelithile aantu kutya ando elongo ndyoka olya li lyoshili, ando eyumuko inali pumbiwa. Shimwe ishewe, mepingathano nomalongelokalunga ngoka haga longo aantu kutya kehe shoka omuntu ta ningi nenge ta ka ningilwa monkalamwenyo osha nunwa nale kuKalunga, tse ohatu kwathele aantu yi ilonge oshili kutya Kalunga okwe tu pa emanguluko lyokuninga omatokolo. Mbela aawiliki yomalongelokalunga ohaya kala yu uvite ngiini sho hatu aneke pomutenya iifundja ayihe mbyoka? Olundji ohaya kala ya geya noonkondo!

11. Ngaashi sha popiwa moohapu dhaJesus ndhoka tadhi adhika muJohannes 8:45-47, Kalunga okwa tegelela oshigwana she shi ninge shike?

¹¹ Oshike tashi vulu oku tu kwathela kaatu ethe po okulongela Jehova? Ngele otu hole oshili, otu na okwiitaala nokuvulika komalombwelo gaKalunga. (Lesha Johannes 8:45-47.) Mepingathano naSatana Ondiyapoli ngoka a li inaa dhiginina oshili, tse katu na esiku tu yi thige po. Ihatu ningi iinima mbyoka itaayi tsu kumwe naashoka twi itaala. (Joh. 8:44) Kalunga okwa tegelela oshigwana she shi kale shi ‘tonde shaa shoka oshiwinayi’ noshi “dhiginine shoka oshiwanawa,” ngaashi Jesus a li a ningi. — Rom. 12:9; Heb. 1:9.

(3) JESUS OKWA LI A HEPEKWA

12. Omolwashike Aajuda oyendji ya li ya tindi okwiitala muJesus omolwomukalo moka a dhipagwa?

¹² Omolwetompelo lilwe lini Aajuda yamwe yopethimbo lyaJesus kaaya li ye mu taamba ko? Paulus okwa ti: “Tse otatu uvitha Kristus omwaalelwa [komuti gwomahepeko, NW]. Ohapu ndjika oya tsikitha Aajuda.” (1 Kor. 1:23) Omolwashike Aajuda oyendji ya li ya tindi okwiitaala muJesus omolwomukalo moka a dhipagwa? Kuyo, sho Jesus a dhipagelwa komuti gwomahepeko oshe mu ningitha a kale a fa omukolokoshi nomulunde, onkene oya tindi oku itaala kutya oye Mesiasa. — Deut. 21:22, 23.

13. Mboka ya li inaaya hala okwiitaala muJesus oya li ya ndopa okundhindhilika shike?

¹³ Aajuda mboka ya li ya tindi okwiitaala muJesus oya li ndopa oku shi ndhindhilika kutya Jesus kali e na ondjo yasha, okwa lundilwa nosho wo kutya oku ungaungiwa naye kaashi li pauyuuki. Mboka ya li taye mu pangula kaya li ye na ko nasha nokupangulwa kwe kaaku li pauyuuki. Ompangu yopombanda yOshijuda oya pangula Jesus osheendelela, nokaya li ya landula omilandu dhokupangula. (Luk. 22:54; Joh. 18:24) Pehala lyokupulakena koshipotha she kaapu na okugama ombinga, aapanguli oya kongo po “omalundilo ya lundile Jesus, opo ye mu dhipage.” Sho ondunge yawo ndjono inaayi longa, omuyambi omukuluntu okwa kambadhala okuningitha Jesus a popye iinima haayo, opo e mu mone ondjo. Shoka kasha li nando tashi tsu kumwe nomilandu dhokupangula. (Mat. 26:59; Mark. 14:55-64) Sho Jesus a yumuka kuusi, aapanguli mboka oya futu aakwiita Aaroma mboka ya li ya langela ombila ye “iimaliwa oyindji,” opo ya taandelithe iifundja kutya omolwashike ombila ye yi li owala. — Mat. 28:11-15.

14. Omanyolo oga hunganeke shike kombinga yeso lyaMesiasa?

¹⁴ Omanyolo otaga ti ngiini? Nonando Aajuda oyendji yopethimbo lyaJesus kaya li ya tegelela Mesiasa a se, Omanyolo oga adhika nale ga hunganeka kutya: “Omwenyo gwe okwe gu yambele meso, nokwa yalulilwa maakolokoshi. Okwa humbata po oondjo dhoyendji nokwa galikanene aayonaguli.” (Jes. 53:12) Onkene Aajuda kaya li taya vulu okutinda okwiitaala Jesus, molwaashoka owala a dhipagwa eso lya fa lyomukolokoshi.

15. Omalundilo geni ga li ga ningilwa Oonzapo dhaJehova ngoka ga ningitha yamwe ya kale ye li ompinge nadho?

¹⁵ Mbela nokunena aantu osho ye li ngawo? Osho lela! Jesus okwa li a pangulwa kaashi li pauyuuki, shoka wo hashi ningilwa Oonzapo dhaJehova nokunena. Natu taleni kiiholelwa yimwe po. Pokati komimvo 1930 no 1950, aamwatate moAmerika oya li ye na okupopila emanguluko lyawo lyokulongela Kalunga miipotha oyindji. Aapunguli yamwe oya li ye shi ulike kutya kaye tu hole. Moshitopolwa shaQuebec, moCanada, Ongeleka nEpangelo oya li tayi longele kumwe, opo iilonga yetu yi indikwe. Aauvithi oyendji oya li ya tulwa mondholongo, molwaashoka owala ya popya naashiinda shawo kombinga yUukwaniilwa waKalunga. MuNdowishi, epangelo lyaNazi olya li lya dhipaga aamwatate yetu oyendji aagundjuka aadhiginini. Omimvo opo dha zi ko, aamwatate yetu oyendji moRusia oya kwatwa po noya tulwa mondholongo, molwaashoka owala ya popya nomuntu kombinga yOmbiimbeli, oshinima shoka epangelo ndyoka lya tala ko aniwa “sha nika oshiponga.” Nokuli Ombiimbeli yetu yo-New World Translation of the Holy Scriptures melaka lyOshirusia oyi indikwa noya talika ko yi li oshileshomwa shi na “uuyelele wa nika oshiponga,” molwaashoka owala ya longitha edhina Jehova.

16. Ngaashi sha popiwa muJohannes gwotango 4:1, omolwashike kaatu na okweetha tu pukithwe komapopyo giifundja kombinga yoshigwana shaJehova?

¹⁶ Oshike tashi vulu oku tu kwathela kaatu ethe po okulongela Jehova? Ninga oonkambadhala wu kale wu na uushili wi ihwapo kombinga yaashoka tashi popiwa. MEuvitho lye lyokOndundu, Jesus okwa li a londodha aapulakeni ye kutya aantu yamwe otaye ke ya ‘popila muuwinayi awuhe nokufundja.’ (Mat. 5:11) Satana oye ha hwahwameke iifundja mbyoka. Oha nwetha mo aapataneki ya taandeleke iifundja kombinga yaamboka ye hole oshili. (Eh. 12:9, 10) Katu na okupulakena komapopyo gawo ngoka giifundja. Inatu etha nando iifundja ya fa mpoka yi tu tilithe nenge yi nkundipaleke eitaalo lyetu. — Lesha 1 Johannes 4:1.

(4) JESUS OKWA LI A GWAALEKWA NOKWA THIGWA PO KAALANDULI YE

17. Omomukalo guni iiningwanima mbyoka ya tetekele eso lyaJesus ya li tayi vulu okuningitha yamwe kaaya kale ya hala okukala aalanduli ye?

¹⁷ Nziya manga inaa sa, Jesus okwa gwaalekwa kugumwe gwomaayapostoli ye 12. Omuyapostoli gulwe okwe mu idhimbike iikando itatu, naayapostoli ye ayehe oya li ye mu thigi po ongulohi ndjoka ya tetekele eso lye. (Mat. 26:14-16, 47, 56, 75) Ashihe shoka kasha li sha kumitha Jesus. Okwa li nokuli a hunganeke kutya shoka otashi ka ningwa. (Joh. 6:64; 13:21, 26, 38; 16:32) Sho ashihe shoka sha ningwa, yamwe oya li taya vulu okutokola kaaya kale we aalanduli yaJesus, mokupopya taya ti: ‘Ngele aayapostoli yaJesus osho tayi ihumbata ngeyi, inandi hala okukala gumwe gwomaalanduli ye!’

18. Omahunganeko geni ga li ga gwanithwa manga Jesus inaa sa?

¹⁸ Omanyolo otaga ti ngiini? Omathelemimvo ogendji manga Jesus inee ya kombanda yevi, Jehova okwa holola mOohapu dhe kutya Mesiasa ota ka gwaalekwa niimaliwa iisiliveli 30. (Sak. 11:12, 13) Ngoka a li te ke mu gwaaleka okwa li ta ka kala gumwe gwomookuume ke kopothingo. (Eps. 41:9) Omuhunganeki Sakaria okwa nyola wo kutya: ‘Dhipaga omusita, nena oonzi otadhi ka halakana.’ (Sak. 13:7) Pehala lyokweetha po okulandula Jesus omolwiiningwanima mbyoka, eitaalo lyaanamitima omiwanawa olya li lya kolekwa sho ye wete omahunganeko ngoka taga gwanithilwa Jesus.

19. Oshike shoka aanamitima omiwanawa ye shi?

¹⁹ Mbela nokunena aantu osho ye li ngawo? Eeno. Pethimbo lyetu, yamwe mboka ya li Oonzapo ye shiwike nawa oye etha po oshili noya ningi aashunimonima, e taya kambadhala okuningitha yalwe nayo ya ninge sha faathana. Ohaya taandeleke uuyelele kaawu li paushili, oshili inaayi ihwa po nokupopya iifundja kombinga yOonzapo dhaJehova okupitila miikundaneki nokointaneta. Ihe aanamitima omiwanawa ihaye etha ya pukithwe kuyo. Mepingathano naashono, oye shi kutya Ombiimbeli oya hunganeka kutya ota ku ka kala aantu ya tya ngawo. — Mat. 24:24; 2 Pet. 2:18-22.

20. Ongiini tatu vulu okuyanda okweethithwa po okulongela Jehova kwaamboka ya thiga po oshili? (2 Timoteus 4:4, 5)

²⁰ Oshike tashi vulu oku tu kwathela kaatu ethe po okulongela Jehova? Otwa pumbwa okukaleka eitaalo lyetu lya kola, mokukonakona aluhe Oohapu dhaKalunga, mokugalikana pandjigilile nomokukala twi ipyakidhila niilonga mbyoka Jehova e tu pa longe. (Lesha 2 Timoteus 4:4, 5.) Ngele otu na eitaalo tali longo, itatu ka kwatwa kuumbanda, uuna tu uvu omahokololo giifundja kombinga yOonzapo dhaJehova. (Jes. 28:16) Ohole yetu yokuhola Jehova, Oohapu dhe naamwatate, otayi ke tu kwathela kaatu ethithwe po okulongela Jehova kwaamboka ya thiga po oshili.

21. Nonando aantu oyendji kunena ohaya tindi okupulakena ketumwalaka lyetu, uushili washike tu na?

²¹ Methelemumvo lyotango, aantu oyendji oya li ye etha po okulandula Jesus, nokaya li ye mu taamba ko. Nando ongawo, oyendji oya li wo ye mu taamba ko. Yamwe yomuyo ongaashi omulumentu gumwe ngoka a li oshilyo shOmpangu yopombanda yAajuda nosho wo ‘ongundu onene yaayambi.’ (Iil. 6:7; Mat. 27:57-60; Mark. 15:43) Nokunena aantu omamiliyona oya tokola okulandula Jesus. Omolwashike mbela? Omolwaashoka oye shi noye hole oshili ndjoka tayi adhika mOohapu dhaKalunga. Oohapu dhaKalunga otadhi ti: “Mboka ye ku hole, oye na ombili, nokaku na shoka tashi ya pukitha.” — Eps. 119:165.