NKENE TO VULU OKUYANDA UUTONDWE

2 | Ino kwatela onkone

Shoka Ombiimbeli tayi ti:

“Ngele ku na ngoka te mu ningile uuwinayi, inamu mu shunithila uuwinayi. . . . Ne yene kombinga yeni ningeni ashihe tamu shi vulu, mu kale nombili naantu ayehe. . . . Inamu shunithila omuntu uuwinayi. Oshoka enyolo otali ti: ‘Egeelo olyandje, ongame mwene tandi ka geela, Omuwa osho ta ti.’” — AAROMA 12:17-19.

Shoka tatu ilongo menyolo ndika:

Nonando oshi li paunshitwe okugeya uuna wu uvithwa nayi kugulwe, Kalunga ina pitika wu shunithile omuntu ngoka uuwinayi. Pehala lyaashono, ote tu ladhipike tu idhidhimike, molwaashoka masiku ote ku ukitha iinima. — Episalomi 37:7, 10.

Shoka to vulu okuninga:

Uuna twa kwatela yalwe onkone, ohashi tu ningitha tu kale tu na uutondwe, molwaashoka inatu gwanenena. Onkee uuna gumwe e ku uvitha nayi, ino mu shunithila uuwinayi. Kambadhala okupangela omaiyuvo goye, e to ungaunga naye nombili. Poompito dhimwe, oshi li nawa wu dhimbwe shoka wa ningilwa. (Omayeletumbulo 19:11) Ihe omathimbo gamwe oshi li nawa oku shi lopota. Pashiholelwa, ngele owa longelwa omuyonena, oto vulu oku ke shi lopota kopolisi nenge kuyalwe mboka ye na oonkondopangelo.

Okukwatela yalwe onkone, eipopilo

Ongiini ngele otashi monika sha fa itaamu vulu okukandula po uupyakadhi nombili? Nenge ongiini ngele owa kambadhala nale ngaashi to vulu wu kandule po uupyakadhi nombili? Ino kwatela onkone. Oshoka ngele owe shi ningi otashi ka nayipaleka onkalo. Onkee yanda uutondwe. Oto vulu okukala wi inekela muKalunga oye a pongolole po uupyakadhi. Ombiimbeli otayi ti: “Igandja kOmuwa; mu inekela, oye te ku kwatha.” — Episalomi 37:3-5.

Iinima ya ningwa shili—ADRIÁN

Okwe etha po onkone

Adrián sho a li e na omimvo omulongo nasha, okwa li e hole omalugodhi nokwa li lela e na uutondwe. Ota ti: “Olundji onda li handi kutha ombinga momalugodhi gokukondja noondjembo, niikando oyindji onda li handi thigwa metente lyombinzi mepandaanda te hala okusa.”

Adrián okwa tameke okukonakona Ombiimbeli sho a li e na omimvo 16. Okwa gwedha ko a ti: “Sho nda tsikile nekonakonombiimbeli lyandje, onda mono kutya onda pumbwa okuninga omalunduluko monkalamwenyo yandje.” Okwa li e na okweetha po uutondwe nomalugodhi. Shoka i ilongo mAaroma 12:17-19 kombinga yokukala ihaatu shunithile yalwe uuwinayi, osho unene she mu kwathele. Ota ti: “Onde shi zimine kutya Jehova ota ka hulitha po okwaanuuyuuki momukalo gwe nopethimbo lye. Onde ende tandi etha po elongithonkondo kashonanakashona.”

Ongulohi yimwe manga Adrián a li ta shuna kegumbo, ongundu yaagundjuka yaalongi yomuyonena moka a li nale oye mu ponokele. Omuwiliki gwongundu ndjoka okwi igidha ta ti: “Igamena mwene!” Adrián ota ti: “Onda li ndu uvite lela nda hala oku ya shunithila uuwinayi.” Ihe pehala lyoku ya shunithila uuwinayi, okwa galikana paufupi kuJehova, e ta zi po puyo.

Adrián okwa tsikile ko ta ti: “Esiku lya landula onda tsakanene nomuwiliki gwongundu ndjoka. Onda kwatwa kongeyo nonda li nda hala oku mu shunithila uuwinayi, ihe onda galikana ishewe momwenyo kuJehova a kwathele ndje ndi ipangele. Onda li nda kumwa sho omugundjuka ngoka e ya kungame e ta ti: ‘Dhimina ndje po sho nde ku hindile ongulohi. Uushili owo kutya onda hala okukala nde ku fa. Onda hala okukonakona Ombiimbeli.’ Onda li nda nyanyukwa sho nda li nda pangele ongeyo yandje. Onda pandula sho naye a hala okukonakona Ombiimbeli.”