NKENE TO VULU OKUYANDA UUTONDWE

3 | Vudha mo uutondwe momadhiladhilo goye

Shoka Ombiimbeli tayi ti:

“Inamu faathana nonkalo yuuyuni mbuka, aawe, Kalunga ne mu shitulule meni lyeni nomomadhiladhilo geni. Nena otamu vulu ihe okutseya ehalo lyaKalunga naashoka oshiwanawa, she mu opalela nosha gwana.” — AAROMA 12:2.

Shoka tatu ilongo menyolo ndika:

Shoka hatu dhiladhila osha simana kuKalunga. (Jeremia 17:10) Otwa pumbwa okuninga oshindji kaashi shi owala okuyanda okupopya nenge okuninga sha shoka tashi eta uutondwe. Uutondwe ohawu etwa kwaashoka hatu dhiladhila nenge kwaashoka shi li momitima dhetu. Onkee otwa pumbwa okuvudha mo nziya omadhiladhilo ngoka taga vulu oku tu ningitha tu kale tu na uutondwe. Kungawo, opo owala tatu vulu ‘okushitululwa’ nokuyanda uutondwe.

Shoka to vulu okuninga:

Dhiladhila nawa kombinga yankene wu uvitile yalwe, unene tuu mboka yomuhoko gulwe nenge yokoshilongo shilwe. Ipula to ti: ‘Onde ya tala ko ngiini? Mbela etaloko lyandje olyi ikolelela kwaashoka ndi shi kombinga yawo nenge olyi ikolelela kokatongo?’ Yanda okulesha nenge okutala iifokundaneki kointaneta, oomuvi nenge omainyanyudho galwe ngoka taga humitha komeho uutondwe nelongithonkondo.

Oohapu dhaKalunga otadhi vulu oku tu kwathela kaatu kale tu na uutondwe momitima dhetu nomomadhiladhilo getu

Ihashi kala aluhe oshipu okwiimona kutya ohatu dhiladhila ngiini notu uvite ngiini. Ihe Oohapu dhaKalunga otadhi vulu ‘okuholola puuyelele omahalo nomadhiladhilo gomomitima’ dhetu. (Aahebeli 4:12) Onkee ano, tsikila okukonakona Ombiimbeli. Yelekanitha shoka tayi ti nokudhiladhila kwoye, e to kambadhala okukala ho dhiladhila momukalo ngoka gwa hokiwa kuKalunga. Oohapu dhaKalunga otadhi vulu oku tu kwathela tu ethe po uutondwe mboka wu li “omaifundjaleko” momadhiladhilo nomomitima dhetu. — 2 Aakorinto 10:4, 5.

Iinima ya ningwa shili—STEPHEN

Okwa lundulula omukalo gwe gwokudhiladhila

Stephen noyaandjawo oya li ye tondike kaatiligane. Omolwoshinima shono, okwa li a nwethwa mo kongundu yimwe yopapolotika ndjoka ya li tayi kondjele uuthemba waantu. Mokweendela ko kwethimbo, okwa tameke okulonga omiyonena omolwuutondwe. Stephen ota ti: ‘Oshikando shimwe ngame nookuume kandje otwa li tatu tala ofilima tayi ulike aapika Aayafrika, taya monithwa iihuna moAmerika. Otwa li tu uvithwa nayi komahepeko ngoka gaahe li pauyuuki notwa ponokele aagundjuka yiilumbu mboka ya li mehala moka. Otwa yi momagumbo giilumbu gopomudhingoloko tu ke yi dhenge.’

Etaloko lyaStephen olya li lya lunduluka thiluthilu, sho a tameke okukonakona Ombiimbeli nOonzapo dhaJehova. Ota ti: “Sho nde etha po ombepo yokatongotongo, onda li nda kuminwa iinima mbyoka Oonzapo hadhi ningi. Pashiholelwa, sho Onzapo yimwe yoshilumbu ya li ya zi po, oya thigi oyana pegumbo lyOnzapo yomuluudhe. Shimwe ishewe, aanegumbo yamwe yOonzapo aatiligane oya li ye edhilile megumbo lyawo omugundjuka omuluudhe ngoka a li kee na mpoka ta kala.” Stephen okwa mono kutya Oonzapo dhaJehova odha fa uukwanegumbo mboka wu holathane, naashika oshe mu kwathele a uve ko kutya otadhi gwanitha po euvaneko lyaJesus ndyoka tali ti kutya aalanduli ye otaya ka kala ye holathane shili. — Johannes 13:35.

Oshike sha kwathele Stephen a ethe po omalugodhi nuutondwe? Aaroma 12:2 oyo ya li ye mu kwathele. Ota ti: “Onda mono kutya ondi na okulundulula iikala yandje. Ondi na okushitukitha omadhiladhilo gandje, sha hala okutya, oku ga lundulula ndi kale omunambili nondi mone wo kutya ndjika oyo onkalamwenyo ya dhenga mbanda.” Ngashingeyi Stephen okwa kala uule womimvo dhi vulithe 40 a etha po uutondwe nokwa nyanyukwa.