Oto dhimbulukwa?

Mbela owa lesha ngaa nawa Ooshungolangelo dhomumvo nguka? Tala ngele oto vulu okuyamukula omapulo taga landula:

Uuwanawa wuni tatu ka mona, ngele otwa kala hatu longitha ethimbo tu popye, tu pulakene nokudhiladhila kombinga yaJehova?

Otatu ka ninga omatokolo omawanawa, aalongi aawanawa, tu na eitaalo lya kola shi vulithe nale, nohole yetu yokuhola Jehova otayi ka koka. — w22.01, ep. 30-31.

Otashi ke tu kwathela ngiini ngele otwa ilongo okwiinekela Jehova naakalelipo ye?

Ngashingeyi olyo ethimbo lyokwiinekela momukalo gwaKalunga gwokuninga iinima nokukala ihaatu limbililwa ewiliko nosho wo omatokolo gaakuluntugongalo. Uuna uudhigu uunene wa tameke, otatu ka kala twa ilongekidha okuvulika nokuli nonando omalombwelo ngoka oga ka monike ga fa kaage li pandunge. — w22.02, ep. 4-6.

Omuyengeli okwa li a hala okutya ngiini, sho a lombwele Sakaria kombinga ‘yoshumbungodhi yi li moshikaha [shomunashikandjo] Serubbabel’? (Sak. 4:8-10, yelekanitha OB-1954)

Emoniko ndyoka olya li lya shilipaleke oshigwana shaKalunga kutya otempeli otayi ka pwa okutungwa notayi ka kala ngaashi Kalunga a hala yi kale. — w22.03, ep. 16-17.

Ongiini tatu vulu okukala oshiholelwa oshiwanawa kuyalwe, ngele tashi ya pokupopya? (1 Tim. 4:12)

Popya nombili nonesimaneko muukalele, imba nomutima aguhe, gandja omatyokosha pandjigilile, popya oshili nokutunga yalwe, yanda oohapu dhomatukano. — w22.04, ep. 6-9.

Omolwashike uukwatya wiilikama ine (omapangelo) mbyoka ya tumbulwa montopolwa 7 yaDaniel wu li koshilikama shimwe shoka sha popiwa mEhololo 13:1, 2?

Oshilikama shoka shi li mEhololo 13 kashi lile po epangelo limwe kondandalunde, ngaashi Roma. Pehala lyaashono, otashi thaneke omapangelo agehe gopapolotika ngoka ga kala nokupangela aantu. — w22.05, ep. 9.

Omomukalo guni lela to vulu okuulika kutya owi inekela muuyuki waKalunga?

Uuna gumwe e tu tuku, e tu hindi nenge a yono kutse, ohatu kambadhala kaatu mu geele noku mu kwatela onkone nokweethela iinima momake gaJehova. Ota ka hulitha po iinima ayihe mbyoka ye etithwa kuulunde. — w22.06, ep. 10-11.

Omumwatate ngoka ta galikana pokugongala oku na okukaleka shike momadhiladhilo?

Ke na okugalikana ta gandja omayele kegongalo nenge ta ningi etseyitho. Ina pumbwa ‘okupopyagana,’ unene tuu megalikano lyopetameko lyokugongala. (Mat. 6:7) — w22.07, ep. 24-25.

Omeityo lini mboka “ya longo uuwinayi” taya ka “yumudhwa e taa ka pangulwa”? (Joh. 5:29)

Itaya ka pangulwa momukalo omwiinayi shi ikolelela konkalamwenyo yawo yonale. Otaya ka konakonwa shi ikolelela kiikala yawo nokeihumbato lyawo konima sho ya yumudhwa. — w22.09, ep. 18.

Elombwelo lini tali nyanyudha J. F. Rutherford a li a gandja poshigongi shoshitopolwa muSeptemba 1922?

Poshigongi shoshitopolwa shoka sha li sha ningilwa moCedar Point, Ohio, moAmerika, okwa li a popi a ti: “Tseyeni kutya Omukwaniilwa ota pangele nale! One aakalelipo yoku mu tseyitha. Onkee ano, uvitheni, uvitheni, uvitheni shi na ko nasha nOmukwaniilwa nonUukwaniilwa we!” — w22.10, ep. 3-5.

Ontopolwa 30 yaJesaja oya popya omikalo ndatu dhini, moka Kalunga he tu kwathele tu idhidhimike?

Ontopolwa ndjika otayi ulike kutya (1) oha pulakene nokuyamukula omagalikano getu, (2) ohe tu wilike (3) ohe tu pe iinima mbyoka twa pumbwa ngashingeyi nosho ta ka ninga ngaaka monakuyiwa. — w22.11, ep. 9.

Omolwashike tatu vulu okuthika pehulithodhiladhilo kutya oohapu ndhoka dhi li mEpisalomi 37:10, 11, 29, odha gwanithwa nale monakuziwa notadhi ka gwanithwa monakuyiwa?

Oohapu dhaDavid otadhi ulike oonkalo oombwanawa ndhoka dha li muIsraeli pethimbo lyelelo lyomukwaniilwa Salomo. Jesus okwa li a popi kombinga yoparadisa yomonakuyiwa nokwa li a totha movelise 11. (Mat. 5:5; Luk. 23:43) — w22.12, ep. 8-10, 14.