Omapulo ga za kaaleshi
Mbela omupisalomi David okwa li ta gwedhele nenge itaa popi oshili, sho a nyola kutya ota tanga edhina lyaKalunga sigo “aluhe,” ngaashi sha nyolwa mEpisalomi 61:8?
Aawe. Shoka David a nyola movelise ndjoka osha li shoshili.
Tala kwaashoka a nyola movelise ndjoka nomudhilwe dha faathana. Okwa ti: “Otandi ke ku imbila aluhe omahambelelo, sho tii ku pe esiku kehe shoka nde shi uvaneke.” “Omuwa Kalunga kandje, otandi ku hambelele nomwenyo aguhe; otandi ka hokolola uunene woye sigo aluhe.” ‘Onda hala okutanga edhina lyoye aluhe sigo aluhe.’ — Eps. 61:8; 86:12; 145:1, 2.
Sho David a nyola oohapu ndhoka, kali ta dhiladhila kutya ke na esiku a se. Okwa li e shi kutya Jehova okwa gandja elombwelo kutya aantu otaya ka sa omoluulunde wawo, na David okwa li e shi zimine kutya ye omulunde. (Gen. 3:3, 17-19; Eps. 51:4, 5) Okwa li e shi kutya naalumentu mboka kwa li a hokwa ngaashi Abraham, Isak nosho wo Jakob, nayo oya sa. David okwa li wo e shi kutya naye ota ka sa. (Eps. 37:25; 39:4) Ihe oohapu dhe ndhoka tadhi adhika mEpisalomi 61:8 otadhi ulike kutya okwa li a hala nokwa tokola toko okutanga Kalunga sigo aluhe, ano manga David e li momwenyo. — 2 Sam. 7:12.
Omathimbo gamwe, David okwa li a nyola kombinga yoonkalo dhimwe moka a pita mudho, ngaashi tu shi wete momanyolo gopombanda gEpisalomi 18, 51 nosho wo 52. MEpisalomi 23, David okwa hokolola Jehova e li omusita ngoka ha gandja ewiliko, etalaleko negameno. David naye okwa li omusita a tya ngaaka. Nokwa li a hala okulongela Kalunga ‘okukalamwenyo kwe akuhe.’ — Eps. 23:6.
Dhimbulukwa wo kutya Jehova oye a li a wilike David a nyole iinima ayihe mbyoka. Shoka a nyola osha li sha kwatela mo omahunganeko kombinga yaashoka sha li tashi ka ningwa konima yethimbo. Pashiholelwa, mEpisalomi 110, David okwa nyola kombinga yethimbo ndyoka Omuwa gwe a li ta ka ‘kuutumba kolulyo [lwaKalunga]’ megulu nokupewa oonkondopangelo oonene. A ninge shike mbela? Oku ka hanagule po aatondi yaKalunga ‘noku ka geela iigwana’ kombanda yevi. David oye a li hekulululwa yaMesiasa, ngoka ta ka pangela okuza megulu nota kala “omuyambi gwaaluhe.” (Eps. 110:1-6) Jesus okwa li e shi koleke kutya ehunganeko ndyoka tali adhika mEpisalomi 110, olya li tali popi kombinga ye nosho wo kutya otali ka gwanithwa monakuyiwa. — Mat. 22:41-45.
Odhoshili kutya Jehova okwa li a wilike David a nyole kombinga yethimbo a li momwenyo nethimbo lyomonakuyiwa, sho ta ka yumudhwa noku ka vule okutanga Jehova sigo aluhe. Shoka otashi tu kwathele tu mone kutya Episalomi 37:10, 11, 29, otali vulu okuuviwa ko kutya otali popi kombinga yoonkalo ndhoka dha li ko muIsraeli shonale nosho wo yoonkalo ndhoka tadhi ka kala kombanda yevi alihe monakuyiwa, sho Kalunga ta ka gwanitha po omauvaneko ge. — Tala okatendo 8 moshitopolwa “Oto ka kala pamwe nangame mOparadisa” shi li moshifo shika.
Onkee Episalomi 61:8 nosho wo dhilwe dha faathana, otadhi ulike kutya David okwa li a hala okusimaneka Jehova pethimbo lyaIsraeli shonale sigo a si. Otadhi ulike wo lela shoka David ta ka ninga monakuyiwa, ngele Jehova e mu yumudha.