1 | Egalikano “Mu tsikeni iimpwiyu yeni ayihe”

SHOKA OMBIIMBELI TAYI TI: “Mu tsikeni iimpwiyu yeni ayihe, oshoka oye omusilishimpwiyu gweni.” — 1 PETRUS 5:7.

Shono osha hala okutya ngiini?

Jehova Kalunga ote tu hiya tu mu lombwele uudhigu kehe mboka wa gwilila po omadhiladhilo nomitima dhetu. (Episalomi 55:22) Kashi na nduno mbudhi kutya uupyakadhi wetu owu thike peni, otatu vulu oku wu mu tseyithila megalikano. Iimpwiyu yetu oya simana kuJehova, oshoka oku na ko nasha natse nankene tu uvite. Okugalikana kuye oshi li onkatu ya simana, oshoka ohashi tu etele ombili yopamadhiladhilo. — Aafilippi 4:6, 7.

Mbela shono otashi ku kwathele ngiini?

Uuna tatu kondjo nuuvu wopamadhiladhilo, otashi vulika tu kale tu uvite tu li otse atuke. Aantu yalwe haaluhe haya vulu okutseya oonkalo ndhoka tu li mudho. (Omayeletumbulo 14:10) Ihe ngele otwa mbumbulile Kalunga omaiyuvo getu okupitila megalikano, ote ke tu pulakena nohenda noku uva ko onkalo yetu. Jehova oku shi uudhigu wetu nokwa hala tu galikane kuye kombinga ya kehe shimwe shoka tatu ipula nasho. — 2 Ondjalulo 6:29, 30.

Okupopya naJehova megalikano ohaku tu kwathele tu kale twa tompwa kutya oku na ko nasha natse. Otatu vulu okukala tu uvite ngaashi Omupisalomi ngoka a galikana a ti: “Otandi nyanyukwa nokutanta omolwesilohenda lyoye. Ou wete okuhepekwa kwandje nowa tseya uudhigu wandje.” (Episalomi 31:7) Okukala tu shi kutya Jehova oku wete oonkalo ndhoka tu li mudho, otashi vulu oku tu kwathela tu tsikile nokuungaunga nomaupyakadhi getu. Oku shi omaupyakadhi ngoka hatu piti mugo, e vule kehe gumwe, nohe tu hekeleke noku tu tsa omukumo okupitila mOohapu dhe, Ombiimbeli.

Nkene Ombiimbeli hayi kwathele Julian

Nkene iimpwiyu hayi gumu ndje

“Ohandi kala tandi kondjo nomaipulo nondi na omukithi ngoka hagu ningitha ndje ndi kale nomadhiladhilo omawinayi nonda tila. Ohandi adhika koshizimbi inaandi shi tegelela. Sho ngaa te ti ando ondi uvite nawa, ohandi tameke owala ndi uvite nda gwililwa po. Shono ohashi adha ndje unene tuu ngele ndi li mokati kaantu. Ohandi kala tandi ipula noonkondo kutya otaya dhiladhila shike kombinga yandje.

“Ookuume kandje mboka ye shi uupyakadhi mboka tandi kondjo nawo ohaya ambidhidha ndje lela. Ihe omathimbo gamwe otashi vulika ya popye iinima mbyoka inaandi panda. Ashike ohandi ya pandula sho taya kambadhala okukwathela ndje.

“Omathimbo gamwe, uunkundi wandje ohawu shi ningitha oshidhigu kungame okugalikana. Ohashi pula ndje oonkambadhala dha mana mo, ndi kale nda ngungumana nokupopya naJehova okupitila megalikano. Omadhiladhilo gandje ohaga kala taga ikupagula, nolundji ohashi ngwangwaneke ndje. Uuna tandi nyengwa okupangela omadhiladhilo gandje, ohashi kala oshidhigu okulombwela Jehova shoka tandi dhiladhila nankene ndi uvite.”

Nkene Ombiimbeli ya kwathele ndje

“Sho nda konakona Ombiimbeli ondi ilongo kutya omagalikano getu inaga pumbwa okukala omale nenge ga popiwa nuunkulungu, opo andola ga kale ga hokiwa kuKalunga. Omathimbo gamwe uuna kaandi shi kutya nandi tye shike, ohandi galikana paufupi te ti: ‘Jehova kwathela ndje.’ Nokuli nuuna nda popi owala ngawo, ohandi shi mono kutya Jehova oku uvite ko onkalo yandje, noha pe ndje ekwatho ndyoka nda pumbwa. Kakele kegalikano, ohandi ka konga ekwatho lyopaunamiti. Otandi pandula omakwatho ngoka gopaali, oshoka onkalo yandje oyi li hwepo ngashingeyi. Nonando ohashi pula oonkambadhala ndi popye naTate yetu gwomegulu, ohandi shi ningi molwaashoka ondi shi kutya oku hole ndje nokwa hala okukwathela ndje.”