2 | ‘Omukumo okuza mOohapu dhaKalunga’

OMBIIMBELI OTAYI TI: “Ashihe shoka sha nyolwa mOmanyolo, osha nyolwa shi tu longe, opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.” — AAROMA 15:4.

Shono osha hala okutya ngiini?

Ombiimbeli oyi na oohapu ndhoka hadhi tu hekeleke nohadhi vulu oku tu kwathela tu idhidhimike, uuna mutse mu na omadhiladhilo omawiinayi. Etumwalaka lyOmbiimbeli ohali tu pe wo etegameno kutya uuwehame wopamadhiladhilo otawu ka hula po.

Mbela shono otashi ku kwathele ngiini?

Atuheni ohatu uvu nayi omathimbo gamwe, ihe mboka ye na ethindakano lyopamadhiladhilo nenge ye na iimpwiyu ohaya kala ya gwililwa po noonkondo. Ombiimbeli otayi vulu oku ya kwathela ngiini?

MOmbiimbeli omu na oohapu oombwanawa ndhoka tadhi vulu oku tu kwathela tu sinde omadhiladhilo omawinayi. (Aafilippi 4:8) Otayi vulu shili okuudhitha omadhiladhilo getu noohapu tadhi tu hekeleke notadhi tu ngungumaneke, ndhoka tadhi tu kwathele tu pangele omaiyuvo getu. — Episalomi 94:18, 19.
Ombiimbeli otayi vulu oku tu kwathela tu ekelehi omadhiladhilo gokukala tu uvite kutya katu na oshilonga shasha. — Lukas 12:6, 7.
MOmbiimbeli omu na oovelise odhindji tadhi tu shilipaleke kutya katu li otse atuke nosho wo kutya Kalunga, Omushiti gwetu, oku uvite ko thiluthilu omaiyuvo getu. — Episalomi 34:18; 1 Johannes 3:19, 20.
Ombiimbeli oya uvaneka kutya Kalunga ota ka hulitha po uuwehame wopamadhiladhilo. (Jesaja 65:17; Ehololo 21:4) Ngele otatu hepekwa komadhiladhilo omawinayi, otatu vulu okukala tu na uushili kutya euvaneko ndyoka otali tu tsu omukumo tu pule komeho.

Nkene Ombiimbeli tayi kwathele Jessica

Nkene epolimano lya guma ndje

“Sho ndi na omimvo 25 onda li nda adhika kuupyakadhi wopamadhiladhilo nonda monika epolimano lya kwata miiti. Onda li handi hepekwa komadhiladhilo haga adha ndje ombadhilila giinima iiwinayi mbyoka nda ningilwa monakuziwa nokanda li handi vulu oku ga pangela. Oondohotola odha kwathele ndje ndi uve ko kutya epolimano lyandje olya li lye etithwa kokukala tandi dhiladhila iinima iiwinayi mbyoka ya ningwa monkalamwenyo yandje. Kakele kepango lyopaunamiti tali opalele, onda li wo nda pumbwa ehungomwenyo, opo ndi kwathelwe ndi mone kutya omukalo omwiinayi guni gwokudhiladhila ndi na, nankene ndi na oku gu etha po.”

Nkene Ombiimbeli ya kwathele ndje

“Sho nda li nda polimana unene, onda li handi kala tandi ningi omahaluhalu, ndi na iimpwiyu ya pitilila nokanda li handi kotha. Olundji kongulohi onda li handi kwatwa komadhiladhilo omawinayi ngoka nda li ihaandi vulu okupangela. Ngaashi Episalomi 94:19 tali shi popi, Kalunga ota vulu oku tu hekeleka noku tu nyanyudha uuna tu na iimpwiyu. Onkee onda li nda tula lwopooha dhombete yandje Ombiimbeli nokambo nda nyola mo oovelise tadhi tsu ndje omukumo. Uuna nda londokwa koomposi, onda li handi lesha oovelise dhimwe mOmbiimbeli, kungawo, onde etha oohapu dhaKalunga dhi hekeleke ndje.

“Ombiimbeli otayi tu ladhipike tu kumune po omadhiladhilo ngoka kaage li metsokumwe naashoka tu shi kombinga yaKalunga. Nale onda li ndi uvite lela kutya kandi na oshilonga, kandi holike nondi li omuntu gwowala. Ihe ondi ilongo kutya okukala ndi itala ko ngawo kaku li metsokumwe nOmbiimbeli, ndjoka tayi popi kutya Kalunga oku li Tate yetu omunahole nomunahenda ngoka e na ko nasha natse pauhandimwe. Onda tameke okupangela omaiyuvo gandje kashona nakashona, pehala lyokweetha ga pangele ndje. Ondi ilonga okwiitala ko ngaashi Kalunga ha tala ndje ko. Ndjika oyo onkatu ya simana ya kwathele ndje ndi ethe po okwiitala ko momukalo omwiinayi.

“Onda tegelela nondjuulukwe ethimbo ndyoka omadhiladhilo omawinayi nosho wo okudhiladhila momukalo omwiinayi taku ka hulithwa po. Okukala ndi shi kutya monakuyiwa itaku ka kala we uupyakadhi wopamadhiladhilo ohashi kwathele ndje ndi idhidhimike ngashingeyi, nokukala nda tegelela nondjuulukwe onakuyiwa moka itaandi ka kala we ndi na epolimano.”