3 | Mona uuwanawa miiholelwa yomOmbiimbeli

OMBIIMBELI OYA POPYA KOMBINGA . . . Yaalumentu naakiintu aadhiginini mboka ya li ‘aantu ye tu fa’ nenge ye na omaiyuvo ga fa getu. — JAKOB 5:17.

Shono osha hala okutya ngiini?

MOmbiimbeli omu na omahokololo ogendji gaalumentu naakiintu ya li ko shili, mboka ya li ye na omaiyuvo ga yoolokathana. Sho tatu lesha iimoniwa yawo, otashi vulika tu mone kutya yamwe yomuyo oya li ye na omaiyuvo ga fa getu.

Mbela shono otashi ku kwathele ngiini?

Atuheni ohatu kala twa hala aantu ya kale ye uvite ko onkalo yetu. Shoka osho hashi kala ngawo, unene tuu ngele otatu kondjo nuupyakadhi wopamadhiladhilo. Uuna tatu lesha Ombiimbeli, ohatu ilongo mo kombinga yaantu yamwe mboka omadhiladhilo nomaiyuvo gawo ga fa getu. Uuna tu na iimpwiyu, iiholelwa yawo ohayi tu kwathele tu mone kutya katu li otse atuke muudhigu wetu, oshoka yamwe nayo oya pita moonkalo dha fa dhetu.

MOmbiimbeli omu na oohapu odhindji dha popiwa kwaamboka ya li ye uvite ya ekelwahi noye na omaipulo. Mbela opu na oshikando shimwe wa li wu uvite kutya: ‘Ngaye itandi vulu we oku shi idhidhimikila?’ Moses, Elia nosho wo David nayo osho ya li ye uvite ngaaka. — Numeri 11:14; 1 Aakwaniilwa 19:4; Episalomi 55:4.
Ombiimbeli otayi tu lombwele kombinga yomukiintu gwedhina Hanna ngoka a li e uvite “uudhigu,” molwaashoka ka li ha mono uunona, nokwa li ha hindwa nayi kunyamukwawo omolwoshinima shoka. — 1 Samuel 1:6, 10.
Ombiimbeli otayi tu lombwele kombinga yomulumentu gumwe gwedhina Job, ngoka tashi vulika a li e uvite ngaashi tse. Nonando okwa li e na eitaalo lya kola muJehova, okwa li a gwililwa po noonkondo, noshikando shimwe okwa popile a ti: “Onda vulwa okukala nomwenyo; [inandi hala okukala] nagwo sigo aluhe.” — Job 7:16.

Ngele otwi ilongo nkene aantu mboka ya popiwa mOmbiimbeli ya li ya sindi omadhiladhilo omawinayi, otashi ke tu tsa omukumo tu vule okuungaunga nomaudhigu getu.

Nkene Ombiimbeli tayi kwathele Kevin

Nkene omukithi gwedhina bipolar disorder gwa guma ndje

“Onda li nda monika omukithi gwopamadhiladhilo gwedhina bipolar disorder sho ndi li pokugwanitha omimvo omilongo ntano. Omathimbo gamwe ohandi kala ndi uvite kutya otandi vulu okukandula po uupyakadhi kehe mboka tawu holoka po monkalamwenyo yandje. Ihe poompito dhilwe, ohandi kala ndi uvite kutya oshihwepo ndi se.”

Nkene Ombiimbeli ya kwathele ndje

“Omuntu gumwe a popiwa mOmbiimbeli tandi vulu okutya okwa li e na omaiyuvo ga fa gandje, omuyapostoli Petrus. Okwa li a ningi omapuko ngoka ge mu ningitha a dhiladhile kutya ke na oshilonga. Ihe pehala lyokutsikila okukala e uvite ngawo, Petrus okwa kala ha endathana nookuume ke mboka ye na ko nasha naye. Uuna uuvu wopamadhiladhilo mboka ndi na wa pimbile, okwaagwanena kwandje ohaku gwililile ndje po nohaku ningitha ndje ndi kale ndi uvite kaandi na oshilonga. Ngaashi Petrus, ondi ilonga okukambadhala okukala popepi nookuume kandje mboka ya hala okukwathela ndje ndi pule komeho.

“Omuntu gulwe ishewe a popiwa mOmbiimbeli ngoka oshiholelwa she hashi hekeleke ndje noonkondo, omukwaniilwa David. Olundji okwa li ha kala a polimana omolwonkalo ye, nokwa li i ipe uusama, omolwomapuko ngoka a ninga monakuziwa. Otandi vulu okutya okwa li e na omaiyuvo ga fa gandje, molwaashoka omathimbo gamwe ohandi kala tandi ili ominwe omolwiinima mbyoka nda ninga nenge nda popya. Oohapu dhe ndhoka dhi li mEpisalomi 51 ohadhi hekeleke ndje. Movelise 3, David okwa ti: ‘Omayono gandje onde ga dhimbulula; oondjo dhandje odhi li aluhe momeho gandje.’ Nangame osho naanaa handi kala ndi uvite ngaaka, uuna nda polimana, oshoka ohandi kala tandi idhiladhilile uuwinayi. Ihe ohandi kala wo ndi uvite ngaashi David a popi movelise 10 a ti: ‘Kalunga, shitila ndje omutima omuyogoki, ngu u tule meni lyandje ombepo ompe noyevuliko.’ Ohandi popi oohapu ndhoka megalikano tandi indile Kalunga a kwathele ndje ndi kale itandi idhiladhilile we uuwinayi. Shimwe ishewe, ovelise 17 nayo ohayi hekeleke ndje. Otayi ti: ‘Omutima gwi itedhulula ito gu ekelehi.’ Ovelise ndjika ohayi shilipaleke ndje kutya Kalunga oku hole ndje.

“Okugandja eitulomo kiiholelwa yomOmbiimbeli nokwaashoka Kalunga a pa ndje, ohashi koleke etegameno lyandje lyonakuyiwa. Omauvaneko gomOmbiimbeli ogoshili kungame, naashoka ohashi kwathele ndje ndi pule komeho.”