4 | Ombiimbeli ohayi gandja omayele taga kwathele

Shono osha hala okutya ngiini?

Nonando Ombiimbeli kayi shi embo lyopaunamiti, oyi na omayele taga kwathele notaga etele aantu uuwanawa. Omayele ngoka otaga vulu okukwathela omuntu ngoka e na uupyakadhi wopamadhiladhilo. Tala kiiholelwa yimwepo.

Mbela shono otashi ku kwathele ngiini?

“Aandjolowele itaa pumbwa omwaaludhi, ihe aavu tuu ayeke.” — MATEUS 9:12.

Ombiimbeli otayi shi koleke kutya omathimbo gamwe otwa pumbwa oku ka konga epango lyopaunamiti. Aantu oyendji mboka ye na uuvu wopamadhiladhilo sho ya mono uuyelele kombinga yuupyakadhi wawo moonzo dhi shi okwiinekelwa noku ka konga ekwatho koondohotola, oya kwathelwa.

“Eidheulo lyopalutu oli na ekwatho.”— 1 TIMOTEUS 4:8.

Okuninga iinima mbyoka tayi hwepopaleke uukolele woye wopalutu, otaku vulu okuhwepopaleka uukolele woye wopamadhiladhilo. Miinima mbyoka omwa kwatelwa okuninga omadhewo pandjigilile, okulya iikulya yi na uukolele, nokukotha sha gwana.

“Omutima gwa nyanyukwa otagu eta uundjangandjele, ihe omwenyo gwa nyanyagulwa otagu thipula omasipa.”— OMAYELETUMBULO 17:22.

Okulesha mOmbiimbeli oovelise tadhi tsu omukumo, nokwiitulila po omalalakano ngoka to vulu okwaadha, otashi vulu oku ku kwathela wu kale wa nyanyukwa. Ngele owa kala wu na etaloko ewanawa monkalamwenyo, nokwiitaala kutya iinima otayi ke ya kondjila monakuyiwa, otashi vulu oku ku kwathela wu idhidhimikile uupyakadhi woye wopamadhiladhilo.

“Eishonopeko olyo owino.” — OMAYELETUMBULO 11:2.

Otashi vulika wu mone kutya ito vulu okuninga kehe shimwe shoka wa hala okuninga, onkee kala wu na ehalo lyokutaamba ko ekwatho lyayalwe. Ookuume naakwanezimo otashi vulika ya kale ya hala oku ku kwathela, ihe otashi vulika ya kale kaaye shi kutya naya ninge shike. Ya lombwela kutya owa hala ye ku kwathele lela mushike. Ino kala wa tegelela ye ku ningile oshindji shi vulithe pwaashoka taya vulu, kala wo aluhe ho ya pandula omolwekwatho ndyoka haye ku pe.

Omayele gOmbiimbeli otaga vulu okukwathela ngiini mboka ye na uupyakadhi wopamadhiladhilo?

Nicole,a ngoka e na uuvu wopamadhiladhilo wedhina bipolar disorder okwa ti: “Onda li ndi uvite kutya mungame omu nasha sha puka, onkee onda yi kundohotola. Okwa li a mono kutya ondi na uupyakadhi washike. Shoka osha kwathele ndje ndi taambe ko onkalo yandje, nonda lombwelwa wo kutya omapango geni gopaunamiti tandi vulu okulongitha, opo ndi kaleke po uukolele wandje.”

Peter, ngoka e na epolimano okwa ti: “Onde shi mona kutya okulesha Ombiimbeli pandjigilile nomukulukadhi gwandje, ohashi kwathele ndje ndi kale ndi na omadhiladhilo omawanawa notaga tungu, momukokomoko gwesiku. Shimwe ishewe, opu na ovelise yontumba ndjoka hayi hekeleke ndje, uuna kaandi uvite nawa pamadhiladhilo.”

Ji-yoo, ngoka e na uunkundi wokulya sha pitilila okwa ti: “Osha li oshidhigu noonkondo okulombwela yalwe kombinga yuuvu wandje, molwaashoka onda li lela nda sa ohoni. Ihe kuume kandje gumwe kopothingo okwa li a pulakene kungame neitulomo nokwa kambadhala okuuva ko nkene nda li ndi uvite. Okwa li a kwathele ndje lela ndi kale ndi uvite ndi li hwepo nokukala ndi uvite kaandi li ongame awike.”

Timothy, ngoka e na uuvu wopamadhiladhilo wedhina obsessive-compulsive disorder okwa ti: “Ombiimbeli oya kwathela ndje ndi kale ndi na ondjele, ngele tashi ya pokuvululukwa niilonga. Uunongo wayo owa kwathela ndje ndi ungaunge nuupyakadhi wandje wopamadhiladhilo.”