Nkene Tatu Vulu Okulongitha Epandja Lyetu Lyokointaneta

Okumona iitopolwa mbyoka ya tulwa ko

Aamwatate naamwameme oyendji ohaya longitha iitopolwa mbyoka hayi tulwa kepandja lyotango lyokointaneta, jw.org, miilonga yokuuvitha. Iipu okutumina yalwe paelektronika, nolundji ohayi kala tayi popi kombinga yiiningwanima yongashingeyi mbyoka tayi gwanitha omahunganeko gOmbiimbeli. Ngaashi omumwatate gumwe a nyola, iitopolwa mbyoka hayi kala kepandja lyotango, “oyo lela ya kala tayi opalele okulongithwa momukalo ngoka hatu uvithile aantu kunena.”

Ihe molwaashoka iitopolwa mbyoka hayi tulwa kepandja lyotango olundji ohayi lundululwa, ongiini to vulu okumona mbyono kaayi ko we?

• Uuna wu li pepandja ndyoka lyotango lyokointaneta, jw.org, thinda mpoka pwa nyolwa “See More” lwopombanda yepandja. O-linka ndjoka otayi ku fala pepandja lya nyolwa “Recently Featured on the Home Page,” hoka to adha omusholondondo gwiitopolwa mbyoka ya li nale kepandja lyotango.

• Kepandja jw.org thinda mpoka pwa nyolwa “Iileshomwa,” e to thindi mpoka pwa nyolwa “Omusholondondo gwiikundathanwa,” opo nduno thinda mpoka pwa nyolwa “Iikundathanwa yilwe.” Omanga mopolohalama JW Library^®, thinda mpoka pwa nyolwa “Library,” e to thindi mpoka pwa nyolwa “Article Series,” opo nduno thinda mpoka pwa nyolwa “Iikundathanwa yilwe.” Oshitopolwa shika oshi na iitopolwa mbyoka ya li ya tulwa kepandja lyotango.