Nkene mu na oku shi pondola mokweendelathana

1-2. Yamwe ohaya kala ye uvitile ngiini okweendelathana?

OKWEENDELATHANA otaku vulu okukala ethimbo linyanyudha nolituntula. Ngele oto endelathana nagumwe ngashingeyi, kapu na omalimbililo kutya owa hala shi mu endele nawa. Kuyamwe oyendji mboka taya endelathana, ohashi ende nawa. Tsion,a omumwameme gwokoEtiopia, okwa ti: “Limwe lyomomathimbo ga dhenga mbanda ngoka nda nyanyukilwa monkalamwenyo yandje, oosho ngame nomusamane gwandje twa li tatu endelathana. Otwa li hatu kundathana iinima ya simana nohatu yolo pamwe. Onda li nda nyanyukwa sho nda mono kutya onda mona gumwe e hole ndje, nondi mu hole wo.”

² Ihe nando ongawo, Alessio, omumwatate a za koHolanda, okwa ti: “Osha li shinyanyudha okutseya nawa omukulukadhi gwandje, sho twa li tatu tseyathana, ihe opwa li wo omashongo gontumba.” Moshitopolwa shika otatu ka kundathana omashongo gamwe nosho wo omakotampango gamwe gOmbiimbeli, ngoka taga vulu okukwathela mboka taya endelathana ya pondole. Otatu ka tala wo nkene yalwe megongalo taya vulu okukwathela mboka taya endelathana.

ELALAKANO LYOKWEENDELATHANA

3. Elalakano lyokweendelathana olyashike? (Omayeletumbulo 20:25)

³ Nonando okweendelathana otaku vulu okukala oshinima shinyanyudha, oku li wo onkatu ya kwata miiti, ndjoka tayi vulu okufala mondjokana. Esiku lyohango yawo, aaihokani ohaya gana kuJehova kutya otaya kala ye holathane noya simanekathana onkalamwenyo yawo ayihe. Manga inaaya ninga egano, oya pumbwa okutala nawa iinima ayihe nuukeka. (Lesha Omayeletumbulo 20:25.) Shoka oshi li oshinima shoshili shi na ko nasha negano lyondjokana. Okweendelathana ohaku pe oonakwiikonga ompito ya tseyathane noya ninge etokolo lyomondjila. Omathimbo gamwe etokolo ndyoka ohali fala sigo omondjokana; go omathimbo gamwe ohali hulitha po okweendelathana. Ngele oonakwiikonga oya ethathana po, shoka itashi ti kutya oya ninga epuko. Pehala lyaashono, oya ninga shono shi na okuningwa, noshe ya kwathela ya ninge etokolo li li mondjila.

4. Omolwashike tatu vulu okukala tu na etaloko ewanawa shi na ko nasha nokweendelathana?

⁴ Omolwashike sha simana okukala tu na etaloko li li nawa li na ko nasha nokweendelathana? Ngele mboka inaaya ya mondjokana natango oya kala ye na etaloko li li nawa, itaya ka endelathana nagumwe ngoka kee na edhiladhilo lyokuya mondjokana nayo. Ihe nando ongawo, mboka inaaya ya mondjokana hayo awike ya pumbwa okukala ye na etaloko li li mondjila. Atuheni otwa pumbwa okukala tu li na. Pashiholelwa, yamwe ohaya dhiladhila kutya ngele aantu otaya endelathana, oye na okuhokanathana po. Mbela iikala ya tya ngawo ohayi gumu ngiini Aakriste mboka inaaya ya mondjokana? Melissa, omumwameme inaa hokanwa gwokoAmerika, okwa ti: “Oonzapo odhindji ndhoka tadhi endelathana, ohadhi piti momathininiko ogendji. Oshizemo, yamwe mboka taya endelathana ohaya yanda okuhulitha po ekwatathano lyawo, nonando inaya opalelathana. Yalwe mboka inaaya ya natango mondjokana ohaya yanda okweendelathana nagumwe. Oshinima shoka ohashi vulu oku ya etela omaipulo ogendji.”

TSEYATHANENI NAWA

5-6. Mboka taya endelathana kehe gumwe oku na okutala shike mumukwawo? (1 Petrus 3:4)

⁵ Ngele ngoye oto endelathana nagumwe, oshike tashi ke ku kwathela wu tale ngele oto yi naye mondjokana nenge hasho? Tseyathaneni nawa naye. Oto vulu okwiilonga iinima yontumba komuntu ngoka, manga inaamu tameka okweendelathana naye. Ihe ngashingeyi owu na ompito ‘yokwiilonga omuntu gwe gwokomwenyo.’ (Lesha 1 Petrus 3:4, OB-1954.) Oto vulu okwiilonga iinima yontumba kombinga yuupambepo we, yuukwatya we noyokudhiladhila kwe. Mokweendela ko kwethimbo, oto ka vula okuyamukula omapulo ngaashi: ‘Mbela omuntu ngoka ota ka vula ngaa okukala kuume kandje kopandjokana e li nawa?’ (Omayel. 31:26, 27, 30; Ef. 5:33; 1 Tim. 5:8) ‘Mbela otandi vulu ngaa okukala ndi mu hole noku mu pa eitulomo ndyoka a pumbwa, nota vulu ngaa okukala e hole ndje nokupa ndje eitulomo ndyoka nda pumbwa? Otashi ka kala ngaa oshipu kungame okukala itaandi konenene omapuko ge?’ (Rom. 3:23) Sho tamu ende tamu tseyathana, dhimbulukweni kutya shoka sha simanenena haku kala mwa faathana momaukwatya, ihe okwiidhidhimikila omaunkundi geni.

⁶ Iinima yilwe yini wa hala okwiilonga kombinga yaangoka tamu endelathana naye? Manga ohole inaayi ya muule, otashi vulika mu kale mwa hala okukundathana iinima yimwe ya simana, ngaashi omalalakano gomuntu ngoka to endelathana naye. Ihe ongiini shi na ko nasha niinima yopaumwene, ngaashi uukolele, uuhupilo nenge iinima mbyoka a ninga monakuziwa? Hainima ayihe ya pumbwa okukundathanwa petameko lyokweendelathana. (Yelakanitha Johannes 16:12.) Ngele owu uvite kutya onziya unene nokuyamukula omapulo ge na ko nasha niinima yopaumwene, mu lombwela kutya ito vulu. Ihe nando ongawo, mokweendela ko kwethimbo, ngoka ta ka kala kuume koye kopandjokana ota ka kala a hala okutseya uuyelele kombinga yoye, opo a ninge omatokolo omawanawa. Onkee owa pumbwa okupopya kutya owu na uupyakadhi washike.

7. Mboka taya endelathana oye na okutseyathana ngiini? (Tala wo oshimpungu “Uuna tamu endelathana nagumwe ngoka mu lyaathane kokule naye.”) (Tala wo omathano.)

⁷ Ongiini to vulu okutseyathana naangoka to endelathana naye kutya omuntu naanaa a tya ngiini? Omukalo gumwe gwomomikalo dha dhenga mbanda tamu vulu okukala hamu popi mwa mangulukilathana nokulombwelathana oshili, ogwo okupulathana omapulo nokupulakena nawa sho mukweni ta yamukula. (Omayel. 20:5; Jak. 1:19) Otamu vulu okutokola okukala hamu ningi iinima pamwe, shoka tashi ke shi ninga oshipu okupopya sho tamu li pamwe, tamu ende momahala gaayehe nuuna tamu uvitha. Shimwe ishewe, longekidhii po omaipyakidhilo ngoka taga ka ulika kutya ngoka wa hala okuya naye mondjokana oha inyenge ngiini moonkalo dha yoolokathana nongele e li naantu ya yoolokathana. Tala shoka Aschwin, ngoka a za koHolanda, a kambadhala okuninga. Okwa li a popi kombinga yokweendelathana kwawo naAlicia, a ti: “Otwa li hatu kongo omaipyakidhilo ngoka tage ke tu kwathela tu tseyathane. Olundji otwa li hatu ningi iinima ya nathangwa, ngaashi okwiilongekidhila okugongala pamwe, nenge okwiimba pamwe. Pethimbo ndyoka, kehe gumwe okwa li ha mono omaukwatya omawanawa gamukwawo nosho wo okwaagwanenena kwe.”

8. Mboka taya endelathana ohaya mono ngiini uuwanawa mokukonakona pamwe iinima yopambepo?

⁸ Otamu vulu wo okutseyathana mokukala hamu konakona pamwe iitopolwa ya kankamena kOmbiimbeli. Ngele mwa hokana, otamu ka pumbwa okukonga ethimbo lyokuninga elongelokalunga lyuukwanegumbo, opo Kalunga a kale oshitopolwa sha simanenena mondjokana yeni. (Omuuv. 4:12) Onkee ano omolwashike itaamu kongo ethimbo mu kale hamu konakona pamwe sho tamu endelathana? Odhoshili kutya sho tamu endelathana inamu ninga natango uukwanegumbo, nomumwatate ke shi natango omutse gwomumwameme. Ihe nando ongawo, sho tamu konakona pandjigilile pamwe, otamu vulu okwiilonga nkene kehe gumwe e uvite shi na ko nasha naJehova. Oonakweendelathana Max naLaysa, ya za koAmerika, oya li ya mono uuwanawa wulwe muko. Max okwa ti: “Petameko lyokweendelathana kwetu, otwa li hatu konakona iileshomwa tayi popi kombinga yokweendelathana, yondjokana noyonkalamwenyo yuukwanegumbo. Iileshomwa mbyoka oya li ye tu egululile ompito yokukundathana kombinga yiinima oyindji ya simana mbyoka sha li oshidhigu okutameka okukundathana kombinga yayo.”

IINIMA YILWE MBYOKA MWA PUMBA OKUPOPYA KOMGINGA YAYO

9. Iinima yini mboka taya endelathana ye na okudhiladhila kuyo, uuna taya tokola kutya oolye ye na okulombwela kombinga yokweendelathana kwawo?

⁹ Oolye mwa pumbwa okulombwela kutya otamu endelathana? One mu na okutokola kutya oolye tamu lombwele. Petameko lyokweendelathana kweni otamu vulu okutala kutya aantu ye thike peni tamu vulu oku shi lombwela. (Omayel. 17:27) Ngele omwe shi ningi, otamu ka yanda omaupyakadhi inaaga pumbiwa nosho wo okupulwa iihuna. Ihe ngele inamu shi lombwela gumwe, otashi vulika mu ka iyadhe mu ilile, molwaashoka mwa tila aantu ye shi mone mo. Oshinima shoka osha nika oshiponga. Otashi ka kala pandunge ngele omwa lombwele mboka taya vulu oku mu pa omayele omawanawa nekwatho li na oshilonga. (Omayel. 15:22) Pashiholelwa, otamu vulu okulombwela yaandjeni, ookuume keni ya pyokoka, nenge aakuluntugongalo.

10. Oshike mboka taya endelathana taya vulu okuninga, opo okweendelathana kwawo ku kale kwa hokiwa kuJehova? (Omayeletumbulo 22:3)

¹⁰ Ongiini tamu vulu okukaleka okweendelathana kweni taku simanekitha Jehova? Sho omaiyuvo geni taga ende taga koko, otamu ka kala mu uvite mu holathane. Oshike tashi vulu oku mu kwathela mu kale mwa yogoka pamikalo? (1 Kor. 6:18) Yandeni oonkundathana inaadhi yogoka, okukala one amuke, nenge okunwa sha pitilila. (Ef. 5:3) Iinima mbyoka otayi ka pendutha omahalo gopamilalo notayi ke shi ninga oshidhigu okuninga shoka shi li mondjila. Otashi ka kala pandunge okukundathana pandjigilile shoka mu na okuninga, opo mu kale mwa simanekathana nosho wo omithikampango dhaJehova. (Lesha Omayeletumbulo 22:3.) Ndhindhilika shoka sha li sha kwathele Dawit nosho wo Almaz gwokoEtiopia. Oya ti: “Otwa li hatu kala pamwe momahala moka hamu kala aantu oyendji, nenge hatu kala nookuume ketu. Katu na siku twa li tu li otse atuke mohauto nenge megumbo. Kungawo otwa li twa yanda oonkalo ndhoka tadhi vulu oku tu tula momamakelo.

11. Iinima yini mboka taya endelathana ye na okutala, uuna taya tokola okuulukilathana ohole?

¹¹ Ongiini shi na ko nasha nokuulukilathana ohole? Sho ohole yeni tayi ende tayi koko, otashi vulika mu tokole okuulukilathana ohole momikalo dhi li nawa. Ihe ngele omahalo gopamilalo oga tameke oku mu pangela, otashi vulika shi kale oshidhigu mu ninge omatokolo gopandunge. (Ondjimb. 1:2; 2:6) Uuna tamu ulukilathana ohole, oshipu okukala itaamu vulu okwiipangela e tamu ningi shoka itaashi nyanyudha Jehova. (Omayel. 6:27) Onkee ano petameko lyokweendelathana kweni, kundathaneni kutya oshike tamu ka kala itaamu ningi, metsokumwe nomithikampango dhOmbiimbeli.b (1 Tes. 4:3-7) Mu li aaikongi, otamu vulu okwiipula ngeyi: ‘Aantu yomoshitopolwa moka hatu zi ohaye tu tala ko ngiini, uuna tatu ulukilathana ohole? Mbela eihumbato ndyoka otali vulu okupendutha omahalo gopamilalo mutse?’

12. Mboka taya endelathana oye na okukotokela omaupyakadhi geni nosho wo okwaauvathana pethimbo taya endelathana?

¹² Ongiini tamu vulu okuungaunga nomaupyakadhi ngoka taga holoka po nosho wo okwaauvathana? Ongiini ngele tapu holoka okwaauvathana omathimbo nomathimbo pokati keni? Mbela shono otashi ka ulika kutya ekwatathano lyeni itali ka longa? Hasho nando, mboka taya endelathana ihaya tsu aluhe kumwe miinima yontumba. Ondjokana ya kola oya thikama po maantu yaali mboka taya vulu okulongela kumwe, opo ya tse kumwe. Omukalo moka hamu kandula po omaupyakadhi ngashingeyi, otagu vulu okuulika kutya ondjokana yeni otayi ka pondola. Mu li aaikongi, otamu vulu okwiipula ngeyi: ‘Mbela ohatu kundathana iinima twa ngungumana nonesimanekathano? Mbela otu na ehalo lyokuzimina omapuko getu nokuninga omalunduluko? Mbela ohatu endelele okupula edhiminopo nosho wo okudhimina po yalwe?’ (Ef. 4:31, 32) Shimwe ishewe, ngele ihamu tsu aluhe kumwe, nenge hamu nyenyeta sho tamu endelathana, onkalo ndjono otashi vulika kaayi ka lunduluke ngele mwa yi mondjokana. Ngele owa mono kutya omuntu ngoka tamu endelathana naye ine ku opalela, okuhulitha po eendelathano lyeni otaku ka kala etokolo itoo li pewa komuntu kune amuhe yaali.c

13. Iinima yini yi na okukwathela mboka taya endelathana ya tokole kutya uule wethimbo li thike peni ye na okweendelathana?

¹³ Mbela omu na okweendelathana uule wethimbo li thike peni? Okuninga omatokolo meendelelo olundji ohaku eta iizemo iiwinayi. (Omayel. 21:5) Onkee ano okweendelathana kweni oku na okukutha ethimbo, opo mu tseyathane nawa naangoka tamu endelathana naye. Ihe inamu pumbwa okweendelathana uule wethimbo eleeleka inaashi pumbiwa. Ombiimbeli oya ti wo kutya: ‘Okutegelela ethimbo eleeleka ohaku gombokitha omwenyo.’ (Omayel. 13:12) Shimwe ishewe, sho mu li metifa lyokweendelathana, otashi vulika shi kale oshidhigu okukondjitha omahalo gopamilalo. (1 Kor. 7:9) Pehala lyokugandja eitulomo kethimbo ndyoka mwa kala tamu endelathana, ipula ngeyi, ‘Mbela onda pumbwa okuninga shike shi na ko nasha naangoka tatu endelathana naye, opo ndi ninge etokolo lyomondjila?’

ONGIINI YALWE TAYA VULU OYAMBIDHIDHA MBOKA TAYA ENDELATHANA?

14. Omomikalo dhini tadhi longo yalwe taya vulu okukumika mboka taya endelathana? (Tala wo ethano.)

¹⁴ Ngele otu shi mboka taya endelathana, ongiini tatu vulu oku ya kwathela? Otatu vulu oku ya hiya ye ye ya lye pamwe natse, ye tu wayimine pelongelokalunga lyetu lyuukwanegumbo, nenge komainyanyudho. (Rom. 12:13) Poompito dha tya ngawo, otashi vulika ya ende taya itseya nawa shi vulithe nale. Mbela oya pumbwa omuntu omutitatu a kale ha ende nayo ngele ye na mpoka taya yi, nenge uuna ye li pehala mpoka taya vulu okupopya iinima yawo ye li kokule kashona? Ngele osho, mbela otatu vulu okukwathela? (Gal. 6:10) Alicia, ngoka a tumbulwa metetekelo, ota dhimbulukwa shoka ye naAschwin ya li ya pandula sho taya endelathana. Alicia okwa ti: “Otwa li twa nyanyukwa noonkondo sho aamwatate yamwe naamwameme ye tu lombwele kutya otatu vulu oku ya talela po, uuna twa pumbwa ehala lyokukala tu li pamwe kaatu li otse atuke.” Ngele owa pulwa kwaamboka taya endelathana wu kale omuntu omutitatu, omolwashike itoo shi tala ko shi li uuthembahenda? Kala wa kotoka kuu ya thige po ye li oyo ayeke tiinini, ihe longitha wo oondunge dhokuyoolola, wu ya pe ompito nethimbo lyokupopya iinima yawo. — Fil. 2:4.

15. Oshike ishewe ookuume taya vulu okuninga ya kwathele mboka taya endelathana? (Omayeletumbulo 12:18)

¹⁵ Otatu vulu wo okuyambidhidha mboka taya endelathana, okupitila mwaashoka tatu popi, nenge tatu ningi. Omathimbo gamwe otwa pumbwa okukala tu na eipangelo. (Lesha Omayeletumbulo 12:18.) Pashiholelwa, otashi vulika tu kale twa halelela okulombwela yalwe kutya ntumba nantumba otaya endelathana, ihe mboka taya endelathana otashi vulika ya kale ya hala oyo ye shi lombwele yalwe yo yene. Katu na oku ya hokola nenge oku ya pa uusama miinima yawo yontumba yopaumwene. (Omayel. 20:19; Rom. 14:10; 1 Tes. 4:11) Shimwe ishewe, inatu pumbwa okupopya, nenge okupula mboka taya endelathana iinima mbyoka tayi vulu oku ya ningitha ya kale ye uvite taya thininikwa ya hokane. Omumwameme Elise nosho wo omusamane gwe, oya ti: “Otwa li twa kumwa sho aantu yamwe ye tu pula kutya uunake tatu hokana tse kaatwa li twe shi kundathana natango.”

16. Otu na okwiinyenga ngiini ngele mboka taya endelathana ya etha po okweendelathana kwawo?

¹⁶ Ongiini ngele mboka taya ikongo oya tokola okweetha po okweendelathana? Otu na okuyanda okupula iinima yopaumwene, nenge oku ya pa uusama sho ya etha po okweendelathana. (1 Pet. 4:15) Omumwameme gwedhina Lea okwa ti: “Onda li nda uvu aantu yamwe taya fofodhola kutya omolwashike twa iyetha po. Osha li sha uvitha ndje nayi.” Ngaashi sha popiwa metetekelo, ngele mboka ya li taya ikongo oya ethathana, inatu tya kutya oya ninga etokolo ewinayi. Shoka osha hala okutya mboka ya li taya ikongo oya adha elalakano lyawo, noshe ya kwathela ya ninge etokolo li li mondjila. Ihe etokolo ndyoka otashi vulika li ya ningithe ya kale yu uvite ya yemata notashi vulika li ya thige ye li oyo ayeke. Onkee otatu vulu okukonga omikalo moka tatu vulu oku ya kumika. — Omayel. 17:17.

17. Oshike mboka taya endelathana ye na okutsikila okuninga?

¹⁷ Ngaashi twe shi mona, okweendelathana otaku vulu okukala ku na omashongo, ihe otaku vulu wo okukala kunyanyudha. Jessica okwa ti: “Okupopya oshili, sho twa li tatu endelathana, opwa li iilonga oyindji. Ihe onda li nda nyanyukwa sho twa longitha ethimbo noonkondo dhetu tu itseye nawa.” Ngele otamu endelathana, tsikileni okweenda tamu itseya nawa. Ngele omwe shi ningi, okweendelathana kweni otaku ka kala taku pondola notashi ke mu kwathela amuhe mu ninge etokolo li li mondjila.