OSHITOPOLWA SHOKUKONAKONWA 28
EIMBILO 123 Natu kaleni aadhiginini kuKalunga
Oto vulu ngaa okuyoolola pokati koshili niifundja?
“Kaleni ano omuthika . . . zaleni oshili, yi ninge epaya moombunda dheni.” — EF. 6:14.
SHOKA TATU KA ILONGA
Otatu ka ilonga nkene tu na okuyoolola pokati koshili ndjoka twa longwa kuJehova, nomalongo giifundja ngoka haga humithwa komeho kuSatana nokaapataneki yetu.
1. Owu uvitile ngiini oshili?
OSHIGWANA shaJehova oshi hole oshili, ndjoka tayi adhika mOohapu dhaKalunga. Eitaalo lyetu olya ikolelela kudho. (Rom. 10:17) Otwa itaala kutya Jehova oye a tota po egongalo lyopaKriste li li “[ongudhi] nekankameno okukoleka oshili.” (1 Tim. 3:15) Ohatu vulika wo nehalo ewanawa “kaawiliki,” nenge tu tye kwaamboka taye tu kwatele komeho sho taya yelitha oshili okuza mOmbiimbeli notaye tu wilike metsokumwe nehalo lyaKalunga. — Heb. 13:17.
2. Sha ikolelela kuJakob 5:19, oshike tashi vulu oku tu ningilwa konima ngele twa ilongo oshili?
2 Ihe konima ngele twa taamba ko oshili nosho wo onkandangala ndjoka ehangano lyaJehova tali dhana moku tu pa ewiliko li shi okwiinekelwa, ndyoka twa pumbwa, natango otashi vulika tu puke mo moshili. (Lesha Jakob 5:19.) Satana okwa hala oku tu ningitha kaatu kale we twa inekela mOmbiimbeli nenge mewiliko ndyoka hatu pewa okuza kehangano lyaJehova. — Ef. 4:14.
3. Omolwashike twa pumbwa okukala twa kakatela koshili? (Aaefeso. 6:13, 14)
3 Lesha Aaefeso 6:13, 14. Masiku, Ondiyapoli otayi ka longitha omitotolombo dha nika oshiponga, opo yi pukithe iigwana ayihe yi kale ompinge naJehova. (Eh. 16:13, 14) Otwa tegelela wo Satana a ninge oonkambadhala a mana mo a pukithe oshigwana shaJehova. (Eh. 12:9) Omolwoshinima shoka, osha simana tu idheule tu kale tu shi okuyoolola pokati koshili niifundja notu kale hatu vulika koshili. (Rom. 6:17; 1 Pet. 1:22) Okuninga ngawo, otaku ke tu kwathela tu ka hupe puudhigu uunene!
4. Oshike tatu ka kundathana moshitopolwa shike?
4 Moshitopolwa shika, otatu ka kundathana kombinga yomaukwatya gaali ngoka twa pumbwa ge tu kwathele tu dhimbulule mo oshili yOmbiimbeli notu taambe ko ewiliko okuza kehangano lyaKalunga. Opo nduno otatu ka kundathana iinima itatu mbyoka twa pumbwa okuninga, opo tu tsikile okukala twa dhiginina oshili.
OMAUKWATYA NGOKA TWA PUMBWA TU YOOLOLE POKATI KOSHILI NIIFUNDJA
5. Ongiini okutila Jehova taku tu kwathele tu dhimbulule mo oshili?
5 Okutila Jehova. Okutila Jehova otashi ti kutya okukala tu mu hole noonkondo noitatu ka ninga nando sha shoka tashi mu yemateke. Otwa halelela okwiilonga eyooloko pokati kaashoka sha uka naashoka sha puka, nopokati koshili niifundja, opo tu kale twa hokiwa kuJehova. (Omayel. 2:3-6; Heb. 5:14) Katu na okweetha uumbanda wokutila aantu wu kale wu vule ohole yetu yokuhola Jehova, oshoka shono hashi nyanyudha aantu, olundji ohashi yemateke Jehova.
6. Ongiini uumbanda wa li wa ningitha oondaadhi omulongo dhaIsraeli dhi pengithe oshili?
6 Ngele otwa kala hatu tila aantu shi vulithe puJehova, otashi vulu oku tu fala kokule noshili. Natu taleni koshiholelwa shoondaadhi 12, ndhoka dha li dha ka ndaadha oshilongo shoka Jehova a li a uvanekele Aaisraeli. Oondaadhi omulongo, odha etha uumbanda wokutila Aakaanana wu kale wu vule ohole yadho yokuhola Jehova. Odha lombwele Aaisraeli ooyakwawo dha ti: “Katu na oonkondo oku ya matukila. Aantu mbeyaka oye na oonkondo ye tu vule.” (Num. 13:27-31) Pataloko lyopantu, Aakaanana oya li ye na oonkondo dhi vule dhAaisraeli, naashoka oshoshili. Ihe kehe ngoka a li ta ti kutya Aaisraeli itaya vulu okusinda aatondi yawo, ka li e na Jehova momadhiladhilo. Oondaadhi ndhoka omulongo odha li dhi na okugandja eitulomo kwaashoka Jehova a li a hala Aaisraeli ya ninge. Odha li wo dhi na okutedhatedha kwaashoka e ya ningila monakuziwa. Kungawo, oya li taya vulu okudhimbulula kutya Aakaanana kaye na oonkondo dhi vule dhaJehova, omunankondoadhihe. Mepingathano noondaadhi ndhoka kaadhi shi oondhiginini, Josua naKaleb oya li ya hala okukala ya hokiwa kuJehova. Oya lombwele oshigwana ya ti: “Omuwa ngele okwe tu hokwa, ote tu fala ko e te tu pe evi ndyoka.” — Num. 14:6-9.
7. Opo tu kale hatu tila Jehova shi vulithe shito, otwa pumbwa okuninga shike? (Tala wo ethano.)
7 Opo tu kale hatu tila Jehova shi vulithe nale, otwa pumbwa okugandja eitulomo kwaashoka tashi mu nyanyudha ethimbo kehe tatu ningi omatokolo. (Eps. 16:8) Uuna to lesha omahokololo gomOmbiimbeli, ipula ngeyi, ‘Andola onda li monkalo ya fa ndjoka, ando onda ningi etokolo lya tya ngiini?’ Pashiholelwa, dhiladhila ando to pulakene koondaadhi omulongo dhAaisraeli sho tadhi gandja ehokololo tali teya omukumo. Mbela andola owa itaala shoka tadhi ti, e to igandja kuumbanda wokutila aantu, nenge ando ohole yoye yokuhola Jehova nokukala wa hala oku mu nyanyudha otayi ke ku kwathela wu sinde uumbanda mboka? Epipi alihe lyoshigwana shaIsraeli olya li lya ndopa okumona oshili ndjoka Josua naKaleb ya li taya popi. Oshizemo, oya kanitha ompito yoku ya mEvi lyEuvaneko. — Num. 14:10, 22, 23.
Andola olye wa itaala? (Tala okatendo 7)
8. Otwa pumbwa okulonga nuudhiginini tu koke ke uukwatya wuni nomolwashike?
8 Eifupipiko. Jehova oha hololele aaifupipiki oshili. (Mat. 11:25) Otwa taamba ko neifupipiko okukwathelwa tu ilonge oshili. (Iil. 8:30, 31) Ihe otwa pumbwa okukotoka kaatu kwatwe kuuntsa. Ngele otu wu na, otawu vulu oku tu ningitha tu kale tu wete omataloko getu ge li mondjila, ga fa owala omakotampango gOmbiimbeli nosho wo omalombwelo ngoka ga za kehangano lyaJehova.
9. Ongiini tatu vulu okukaleka po efupipiko lyetu?
9 Opo tu kaleke po eifupipiko lyetu, otwa pumbwa okudhimbulukwa kutya tse aashona lela okuyelekanitha naJehova. (Eps. 8:3, 4) Otatu vulu wo okupula Jehova e tu kwathele tu kokeke eifupipiko notu kale tu na ombepo yokulongwa. Jehova ote ke tu kwathela tu kale twa lenga omadhiladhilo ge, ngoka he tu pe okupitila mOohapu dhe nomehangano lye, pehala lyokukala twa lenga omadhiladhilo getu. Uuna to lesha Ombiimbeli yoye, tala iitsa mbyoka tayi ulike nkene Jehova e hole eifupipiko noku tonde uuntsa nenge einenepeko. Ngele owa pewa oshinakugwanithwa shoka tashi ku ningitha wu kale wa talika ko wa tumbala, kambadhala okukala lela omwiifupipiki.
NKENE TATU VULU OKUKALA TWA DHIGININA OSHILI
10. Jehova okwa li a longitha oolye ya wilike oshigwana she noku shi pa omalombwelo?
10 Natu tsikile okukala twa inekela ewiliko ndyoka hali zi kehangano lyaJehova. MuIsraeli shonale, Jehova okwa li a longitha Moses, nokonima okwa longitha Josua a gandje omalombwelo koshigwana she. (Jos. 1:16, 17) Aaisraeli oya li ya yambekwa sho ya li ya tala ko aalumentu mbaka ye li aakalelipo yaJehova Kalunga. Konima yomimvo omathele, sho egongalo lyopaKriste lya li lya totwa tango, aayapostoli 12 oyo ya li ya gandja omalombwelo. (Iil. 8:14, 15) Konima, mongundu ndjoka omwa li mwa kwatelwa wo aakuluntugongalo yalwe yomuJerusalem. Sho Aakriste ya landula omalombwelo, ngoka ya pewa kaalumentu mboka aadhiginini, “omagongalo oga kolekelwa meitaalo nomwaalu gwooitaali ogwi indjipala esiku kehe.” (Iil. 16:4, 5) Kunena, Jehova ohe tu yambeke wo uuna tatu landula omalombwelo ngoka haga zi kehangano lye. Ihe mbela ota ka kala e uvite ngiini, ngele otwa tindi okuvulika kwaamboka a langeka po? Opo tu yamukuleni epulo ndyoka, natu ka kundathaneni shoka sha li sha ningwa po pethimbo Aaisraeli ya li ya uka mEvi lyEuvaneko.
11. Oshike sha li sha ningilwa Aaisraeli yopethimbo lyonale, mboka ya li ya tsile Moses ondumbo, ngoka a hogololwa kuKalunga e ya wilike? (Tala wo ethano.)
11 Pethimbo Aaisraeli ya li mondjila ya uka kEvi lyEuvaneko, aalumentu mboka ya simana, oya li ya tsile Moses ondumbo noshinakugwanithwa shoka Jehova a li e mu pa. Oya ti: “Iilyo ayihe yegongalo [haMoses owala] oyOmuwa, nOmuwa oku li pamwe natse atuhe.” (Num. 16:1-3) Nonando odhoshili kutya momeho gaKalunga ‘egongalo alihe olyOmuwa,’ Jehova okwa li a hogolola Moses a kwatele komeho oshigwana she. (Num. 16:28) Aanashipotha sho ya li taya sheke Moses, paulelalela oya li taya sheke Jehova. Kaya li taya gandja eitulomo kwaashoka Jehova a li a hala; oya li ya gandja eitulomo kwaashoka ya hala, ano koonkondo nesimano. Kalunga okwa dhipaga mboka ya li ya kwatela komeho uunashipotha nosho wo aantu omayovi mboka ya li taye ya ambidhidha. (Num. 16:30-35, 41, 49) Otatu vulu okukala tu na uushili kutya, kunena Jehova ina hokwa mboka ihaaya vulika komalombwelo ngoka haga zi kehangano lye.
Andola owa gama kombinga yini? (Tala okatendo 11)
12. Omolwashike tatu vulu okukala twa inekela mehangano lyaJehova?
12 Otatu vulu okukala twa inekela mehangano lyaJehova. Uuna sha yela mo kutya opwa pumbiwa okuningwa elunduluko lyontumba meuvoko lyetu lyoshili yOmbiimbeli, nenge kombinga yankene iilonga yUukwaniilwa ya unganekwa, mboka taya kwatele komeho ihaya kakadhala okuninga omalunduluko ngoka ga pumbiwa. (Omayel. 4:18) Ohaya ningi ngaaka, molwaashoka ohaya kala unene ya hala okunyanyudha Jehova. Ohaya ningi wo ngaashi taya vulu, opo omatokolo gawo ga kale ga kankamena kOmbiimbeli, oshiholelwa shono aapiya yaJehova ayehe ya pumbwa okulandula.
13. ‘Oshiholelwa shoohapu dhoshili’ shike, noshike tu na okuninga po shi na ko nasha nasho?
13 ‘Dhiginina [“oshiholelwa,” OB-1954] shoohapu dhoshili.’ (2 Tim. 1:13) Uutumbulilo ‘oshiholelwa shoohapu dhoshili’ owa ukitha komalongo gopaKriste, ngoka ge li mOmbiimbeli. (Joh. 17:17) Omalongo ngoka oge li ekankameno lyiinima ayihe mbyoka twa itaala. Ehangano lyaJehova ohali tu longo tu shilipaleke kutya shoka twa itaala osha kankamena komalongo ngoka. Ngele otwe shi ningi, otatu ka yambekwa.
14. Ongiini Aakriste yamwe ye etha po okukakatela ‘oshiholelwa shoohapu dhoshili’?
14 Oshike tashi ka ningwa po, ngele otwa etha po okulandula ‘oshiholelwa shoohapu dhoshili?’ Natu taleni koshiholelwa shika. Methelemumvo lyotango, Aakriste yamwe oya li taya taandelitha anuwa iifundja mokati kawo kutya esiku lyaJehova olya thika. Otashi vulika pwa li pu na ontumwafo ndjoka ya li tayi popi oshinima shoka, ndjoka aantu ya li taya dhiladhila kutya oya nyolwa komuyapostoli Paulus. Molwaashoka Aakriste yamwe yomuTessalonika kaya li ya kongo ethimbo ya konakone oshinima shoka, oya itaala iifundja mbyoka e taye yi taandelitha nokuli. Andola oya dhimbulukile iinima mbyoka Paulus a li e ya longo sho a li pamwe nayo, ando inaya pukithwa. (2 Tes. 2:1-5) Paulus okwa li a pukulula aamwahe kaaya itaale kehe oshinima taya uvu. Opo Paulus e ya kwathele kaaya ka pukithwe monakuyiwa, montumwafo ye ontiyali ndjoka a nyolela Aatessalonika, okwa hulitha noohapu tadhi ti: “Omakundo ga zi kuPaulus. Nguka ogwo omukalo gwandje gwokushaina ontumwafo kehe; osho handi nyola ngaaka.” — 2 Tes. 3:17.
15. Ongiini tatu vulu okwiigamena kiifundja mbyoka tayi monika ya fa oshili? Gandja oshiholelwa. (Tala wo omathano.)
15 Oshike tatu ilongo koohapu ndhoka Paulus a nyolela Aatessalonika? Uuna twa uvu oshinima shoka kaashi li metsokumwe naashoka twa ilonga mOmbiimbeli, nenge twa uvu ehokololo tali halutha, otwa pumbwa okulongitha oondunge dhokuyoolola. MuSoviet Union shonale, oshikando shimwe aatondi yetu oya li ya pe aamwatate ontumwafo, ndjoka ya li taya ti kutya oya za anuwa koombelewa dhetu oonene muuyuni. Ontumwafo ndjoka oya li tayi ladhipike aamwatate yamwe ya tote po ehangano lilwe, e taya kala kuyo yene. Ontumwafo yoyene oya li tayi monika ya fa tayi popi oshili. Ihe aamwatate mboka aadhiginini kaya li ya pukithwa. Oya li ye shi dhimbulula mo kutya etumwalaka ndyoka li li montumwafo ndjoka kali li metsokumwe naashoka ya longwa. Kunena, aantu mboka ye tonde oshili, omathimbo gamwe ohaya longitha iinima yoshinanena, ngaashi omakwatathano gopaintaneta, nelalakano lyoku tu ngwangwaneka noku tu topola. Pehala ‘lyokweetha, tu piyaganekwe nuupu,’ otwa pumbwa okwiigamena tse yene mokudhiladhila nawa kombinga yaashoka twa uva nenge twa lesha, ngele oshi li ngaa metsokumwe noshili ndjoka twa ilonga nale. — 2 Tes. 2:2; 1 Joh. 4:1.
Ino pukithwa kiifundja mbyoka tayi monika ya fa oshili? (Tala okatendo 15)a
16. Sha ikolelela kAaroma. 16:17, 18, oshike tatu vulu okuninga ngele gumwe ota taandelitha iifundja kombinga yoshili?
16 Kala wa hangana naamboka aadhiginini kuJehova. Kalunga okwa hala tu kale twa hangana sho tatu mu longele. Ngele otwa kala twa kakatela koshili, otatu kala twa hangana. Kehe ngoka ta taandelitha iifundja kombinga yoshili, ota eta etopoko megongalo, onkee ano Kalunga ote tu londodha tu mu “angale.” Ngele itatu shi ningi, natse otatu vulu okufalwa kokule noshili. — Lesha Aaroma. 16:17, 18.
17. Uuwanawa wuni tatu ka mona, ngele otwa dhimbulula kutya ndjino oshili e tatu yi dhiginine?
17 Ngele otwa mono kutya ndjika oyo oshili e tatu yi dhiginine, otatu ka kala popepi naJehova neitaalo lyetu otali ka kola. (Ef. 4:15, 16) Otatu ka kala twa gamenwa komalongo giifundja gaSatana nokomitotolombo, na Jehova ota ka tsikila noku tu gamena pethimbo lyuudhigu uunene. Tsikileni okukala mwa kakatela koshili, “nena Kalunga, ngoka te tu pe ombili, ota kala ihe pamwe nane.” — Fil. 4:8, 9.
EIMBILO 122 Kaleni mwa kola mwaa tenguke!
a SHOKA TASHI ULIKWA METHANO: Ethano tali ulike oshinima sha ningwa shili momimvo omilongo dha ka pita, aamwatate muSoviet Union shonale ya yakula ontumwafo ndjoka tayi ulike ya fa ya za koombelewa dhetu oonene muuyuni, ihe paulelalela oya za kaatondi yetu. Pethimbo lyetu, aatondi yetu otashi vulika ya longithe ointaneta ya taandelithe uuyelele tawu pukitha aantu kombinga yehangano lyaJehova.