OSHITOPOLWA SHOKUKONAKONWA 30
EIMBILO 36 Tonatela omutima gwoye
Iiyilongomwa ya simana mbyoka tatu ilongo kaakwaniilwa yaIsraeli
“Aantu yandje otaa ka koneka ishewe eyooloko pokati komuyuuki nomukolokoshi, pokati komuntu ngoka ta longele ndje naangoka itee shi ningi.” — MAL. 3:18.
SHOKA TATU KA ILONGA
Otatu ka ilonga kombinga yankene Jehova a li a tala ko aakwaniilwa yaIsraeli, shoka tashi ke tu kwathela tu uve ko shoka a tegelela aalongeli ye ya ninge kunena.
1-2. Ombiimbeli oya popya shike kombinga yaakwaniilwa yamwe yaIsraeli?
OMBIIMBELI oya tumbula omadhina gaakwaniilwa mboka ya lela Israeli ga konda po 40.a Oya popya wo kondandalunde iinima yontumba, mbyoka aakwaniilwa mboka ya li ya ningi. Pashiholelwa, nokuli naakwaniilwa, mboka ya li ye shi enditha nawa, oya li ya ningi iinima yontumba iiwinayi. Natu taleni koshiholelwa shomukwaniilwa omudhiginini David. Jehova okwa popi kombinga ye a ti: ‘Omuntu gwandje, David, okwa inekela ndje mwaayihe nokwa ningi ashike shoka nda hokwa.’ (1 Aak. 14:8) Ihe nonando ongawo, omulumentu ngoka, okwa li a yi moluhondelo nomukiintu a hokanwa. David okwa ningi wo ompangela a dhipagithe, Uria molugodhi. — 2 Sam. 11:4, 14, 15.
2 Shimwe ishewe, oyendji yomaakwaniilwa mboka ya li kaaye shi aadhiginini, oya li ya ningi iinima yontumba iiwanawa. Natu taleni koshiholelwa shomukwaniilwa Rehoboam. Okwa “longo uuwinayi” momeho gaJehova. (2 Ondjal. 12:14) Ihe nonando ongawo, Rehoboam okwa li a vulika kelombwelo lyaJehova lyokwaakondjitha omazimo omulongo gaIsraeli noku ga pitika ga hogolole omukwaniilwa gumwe i ili. Oshigwana osha mono wo uuwanawa, sho a li a tungile iilando omadhingililokuma. — 1 Aak. 12:21-24; 2 Ondjal. 11:5-12.
3. Epulo lya simana lini tu na okwiipula, noshike tatu ka kundathana moshitopolwa shino?
3 Shono osha pendutha epulo lya simana kutya: Ngele aakwaniilwa yaIsraeli oya li ya longo uuwanawa nuuwinayi, Jehova okwa li ha tokola shi ikolelela kushike kutya omukwaniilwa omudhiginini nenge hasho? Eyamukulo kepulo ndyoka otali ke tu kwathela tu uve ko kutya otu na okuninga shike, opo Jehova a kale e tu hokwa. Otatu ka kundathana iinima itatu, mbyoka Jehova a li ha tala kuyo, opo a mone kutya omukwaniilwa omwaanawa nenge omwiinayi. Okwa li ha tala kiikala yomutima yomukwaniilwa gwaIsraeli, ngele okwi iyela ombedhi shili nosho wo ngele omudhiginini kelongelokalunga lyashili.
OYA LONGELE JEHOVA NOMUTIMA AGUHE
4. Eyooloko lini li li pokati kaakwaniilwa mboka aadhiginini naamboka ya li kaaye shi aadhiginini?
4 Jehova okwa li a hokwa aakwaniilwa mboka ya li haye mu longele nomutima aguhe.b Ombiimbeli oya ti kutya omukwaniilwa omwaanawa, Jehosafat, okwa “longele Omuwa pankondo dhe adhihe.” (2 Ondjal. 22:9) Oya popi wo kombinga yaJosia tayi ti: “Kakwa li omukwaniilwa e mu tetekela e mu fa, ngoka a longele Omuwa nomutima gwe aguhe.” (2 Aak. 23:25) Ongiini kombinga yaSalomo, ngoka lwanima a ka longa shoka oshiwinayi? Ombiimbeli oya ti: “Ina dhiginina Omuwa.” (1 Aak. 11:4) Ombiimbeli oya popya wo kombinga yomukwaniilwa gulwe, ngoka naye a li kee shi omudhiginini, Abia, ya ti: ‘Ina inekela Omuwa.’ — 1 Aak. 15:3.
5. Yelitha kutya osha hala okutya ngiini, okulongela Jehova nomutima aguhe.
5 Osha hala okutya ngiini okulongela Jehova nomutima aguhe? Omuntu ngoka ha longele Kalunga nomutima aguhe ihe shi ningi owala, molwaashoka e shi kutya osho e na okuninga. Pehala lyaashono, ohe mu longele ta inyengithwa kohole noketilokalunga. Shimwe ishewe, oha tsikile okukala e mu hole nokwe mu simaneka mokukalamwenyo kwe akuhe.
6. Ongiini tatu vulu okulongela Jehova nomutima aguhe? (Omayeletumbulo 4:23; Mateus 5:29, 30)
6 Ongiini tatu vulu okuholela aakwaniilwa, mboka ya li aadhiginini noya longela Jehova nomutima aguhe? Omokuyanda enwethomo ewinayi. Ngaashi owala omainyanyudho inaaga yogoka taga vulu oku tu ningitha tu kale tu na omitima mbali, oku shi popya pathaneko, ookuume aawinayi nosho wo ohole yokuhola omaliko otayi vulu oku tu ningitha tu kale nomitima mbali. Ngele otwa ndhindhilike kutya opu na sha shoka tashi nkundipaleke ohole yetu yokuhola Jehova, otwa pumbwa okukatuka oonkatu meendelelo. — Lesha Omayeletumbulo 4:23; Mateus 5:29, 30.
7. Omolwashike sha simana tu yande enwethomo ewinayi?
7 Inatu etha nando osha shi topole omutima gwetu. Ngele inatu kotoka, otashi vulika tu ifundjaleke kutya inatu pumbwa okuyanda enwethomo ewinayi, shampa owala twa ipyakidhila nokulongela Jehova. Natu shi thaneke ngeyi: Dhiladhila nee andola to ende muutalala wamemememe noku na ombepo esiku ndyoka. Sho wa thiki megumbo, owa zala oonguwo dhuutalala. Oshike tashi ka ningwa po ngele owa thigi omweelo gwondunda gwa eguluka? Ombepo ontalala otayi ya meni. Mbela oshitsa oshini? Ngele otwa hala okukala nekwatathano ewanawa naJehova, otwa pumbwa okuninga oshindji kaashi shi owala okulya iikulya yopambepo. Otwa pumbwa wo okuyanda enwethomo ewinayi, opo tu ikaleke kokule nombepo yuuyuni mbuka, nenge tu tye, opo kaatu ethe iikala iiwinayi yi mene omidhi momitima dhetu, e tayi tu ningitha tu kale tu na omitima mbali. — Ef. 2:2.
OYA IYELE OMBEDHI, OMOLWOMAYONO GAWO
8-9. Omukwaniilwa David nosho wo Hesekiel oya li yi inyenge ngiini, sho ya lombwelwa nkene Jehova e uvitile omapuko gawo? (Tala ethano .)
8 Ngaashi sha popiwa metetekelo, omukwaniilwa David okwa li a yono eyono lya kwata miiti. Ihe sho omuhunganeki Natan e mu lombwele kombinga yeyono lye, David okwa li a iyele ombedhi neifupipiko. (2 Sam. 12:13) Oohapu ndhoka David a nyola mEpisalomi 51 otadhi tu ulukile kutya okwa li a iyela shili ombedhi. David ka li a iningitha a fa a uva nayi, opo ando a uvithe nawa Natan, nenge opo andola kaa geelwe. — Eps. 51:3, 4, 17 enyolo lyopombanda.
9 Omukwaniilwa Hiskia naye okwa li wo a yono kuJehova. Ombiimbeli otayi ti: “Okwi inenepeke ye ina pandula Omuwa, onkee okwa adhika kegeelo pamwe naJuda naJerusalem.” (2 Ondjal. 32:25) Oshike sha li sha ningitha Hiskia a inenepeke? Otashi vulika a li e uvite a simana omolwuuyamba we, sho a sindi Aasiria, nenge sho a aludhwa pashikumithalonga. Otashi vulika uuntsa owo wa li we mu inyengitha a ulukile Aababilonia uuyamba we, shono sha li sha ningitha omuhunganeki Jesaja e mu pukulule. (2 Aak. 20:12-18) Ihe ngaashi David, Hiskia okwa li i iyele ombedhi shili. (2 Ondjal. 32:26) Oshizemo, Jehova okwa li e mu tala ko e li omukwaniilwa omudhiginini, ngoka a kala ta “ningi shoka she mu opalela.” — 2 Aak. 18:3.
Omukwaniilwa David nosho wo Hiskia oya li ya iyele ombedhi neifupipiko sho ya lombwelwa kombinga yomayono gawo (Tala okatendo 8-9)
10. Omukwaniilwa Amazia okwa li a inyenge ngiini sho a pukululwa?
10 Omukwaniilwa Amazia ka li a fa David naHiskia. Amazia okwa longo shoka shi li mondjila, “ihe ine shi longa nomwenyo gwe aguhe.” (2 Ondjal. 25:2) Oshike sha li sha ningwa po? Konima sho Jehova a li e mu kwathele a sinde Aaedom, Amazia okwa a tameke okulongela iikalunga yawo.c Sho omuhunganeki gwaJehova a popi naye, ina pulakena kuye nokwe mu tidha po. — 2 Ondjal. 25:14-16.
11. Shi ikolelela kAakorinto aatiyali 7:9, 11, oshike twa pumbwa okuninga, opo tu dhiminwe po? (Tala wo omathano.)
11 Oshike tatu ilongo kiiholelwa mbika? Otwa pumbwa okwiiyela ombedhi, omolwomayono getu, nokuninga ngaashi tatu vulu kaatu ga endulule. Ongiini ngele otwa pewa omayele kaakuluntugongalo, nokuli nando omokanima hoka tu wete okashona? Inatu pumbwa okukala tu uvite kutya Jehova ke tu hole, nenge kutya aakuluntugongalo oye li ompinge natse. Aakwaniilwa aawanawa yaIsraeli nayo oya li nokuli ya pumbwa okupewa omayele nosho wo okupukululwa. (Heb. 12:6) Uuna twa pukululwa (1) natu taambe ko epukululo neifupipiko, (2) natu ninge omalunduluko ngoka ga pumbiwa nosho wo (3) natu tsikile okulongela Jehova nomutima aguhe. Ngele otwa iyele ombedhi uuna twa yona, Jehova ote ke tu dhimina po. — Lesha 2 Aakorinto 7:9, 11.
Uuna twa pukululwa (1) natu taambe ko epukululo neifupipiko, (2) natu ninge omalunduluko ngoka ga pumbiwa nosho wo (3) natu tsikile okulongela Jehova nomutima aguhe (Tala okatendo 11)f
OYA KALA AADHIGININI KELONGELOKALUNGA LYASHILI
12. Oshike sha li sha yoolola ko unene tuu aakwaniilwa mboka aadhiginini kwaamboka kaaye shi aadhiginini?
12 Aakwaniilwa mboka Jehova a li a hokwa oya li aadhiginini kelongelokalunga lyashili. Oya li wo ya ladhipike aalelwa yawo nayo ya ninge sha faathana. Odhoshili kutya ngaashi twe shi mono, oya li ya ningi omapuko. Ihe oya li ya longele Jehova oye awike noya longo nuudhiginini, opo ya hulithe po iihongwathano moshilongo.d
13. Omolwashike Jehova a li a tala ko omukwaniilwa Ahab kee shi omudhiginini?
13 Omolwashike Jehova a ti kutya aakwaniilwa yamwe kaya li aadhiginini? Odhoshili kutya hakehe shimwe shoka ya ninga sha puka. Omukwaniilwa omukolokoshi, Ahab, okwa li nokuli a ulike uukwatya weifupipiko, nokwa li a uvu nayi sho a dhipagitha Nabot. (1 Aak. 21:27-29) Okwa li wo a tungu iilando nokwa sindi aatondi yAaisraeli. (1 Aak. 20:21, 29; 22:39) Ihe Ahab okwa li a nwethwa mo nayi komukulukadhi gwe, a humithe komeho elongelokalunga lyiifundja. Ahab ka li nando a iyele ombedhi, omolwoshinima shoka. — 1 Aak. 21:25, 26.
14. (a) Omolwashike Jehova a li a tala ko omukwaniilwa Rehoboam kee shi omudhiginini? (b) Uukwatya wa faathana wuni aakwaniilwa mbono kaaye shi aadhiginini ya li ye na?
14 Natu taleni ishewe koshiholelwa shomukwaniilwa gumwe ngoka a li kee shi omudhiginini, Rehoboam. Ngaashi sha popiwa metetekelo, okwa li a ningi iinima iiwanawa oyindji pethimbo lyelelo lye. Ihe konima sho a ningi omukwaniilwa omunankondo okwa etha po okuvulika kOmpango yaJehova e ta tameke okulongela iikalunga. (2 Ondjal. 12:1) Okuza mpono, okwa kala ha longele Jehova nosho wo iikalunga. (1 Aak. 14:21-24) Rehoboam naAhab hayo owala aakwaniilwa mboka ya li ya thigi po elongelokalunga lyashili. Aakwaniilwa oyendji mboka ya li kaaye shi aadhiginini oya li ya ambidhidha elongelokalunga lyiifundja momukalo gwontumba nogwongandi. Osha yela kutya pataloko lyaJehova, okukala omudhiginini kelongelokalunga lyashili, osho unene sha li hashi utha kutya omukwaniilwa omwaanawa nenge omwiinayi.
15. Omolwashike okukala metsokumwe nelongelokalunga lyashili kwa simana kuJehova?
15 Omolwashike oshinima shelongelokalunga sha li sha simanenena kuJehova? Omolwaashoka aakwaniilwa oyo ya li ye na oshinakugwanithwa shokukwathela oshigwana shi longele Jehova momukalo ngoka a hokwa. Shimwe ishewe, okulongela iikalunga okwa li haku ningitha aantu ya yone omayono omakwawo omanene noya longe okwaanuuyuuki. (Hos. 4:1, 2) Kakele kaashono, aakwaniilwa yaIsraeli nosho wo aalelwa yawo oya li ya yapulilwa Jehova. Onkee ano Ombiimbeli oya faathanitha okukutha ombinga kwawo melongelokalunga lyiifundja nokuya moluhondelo. (Jer. 3:8, 9) Ngele omuntu oku li mondjokana e ta hondele oha yono kukuume ke kopandjokana, shono hashi mu yemateke noonkondo. Sha faathana, uuna omupiya gwaJehova ngoka e mu iyapulila a yi melongelokalunga lyiifundja, oha yono kuJehova nohashi mu yemateke noonkondo.e — Deut. 4:23, 24.
16. Oshike unene hashi ninginitha Jehova a yoolole kutya omuntu omwaanawa nenge omwiinayi?
16 Shono otashi tu longo shike? Otwa pumbwa okukala twa tokola toko tu yande elongelokalunga lyiifundja. Ihe otwa pumbwa wo okukala aadhiginini kelongelokalunga lyashili nokukala twa ipyakidhila miilonga yaJehova. Omuhunganeki Maleaki okwa li a yelitha kutya oshike hashi utha kutya omuntu omwaanawa nenge omwiinayi, pataloko lyaJehova. Okwa ti: “[Otamu] ka koneka ishewe eyooloko pokati komuyuuki nomukolokoshi, pokati komuntu ngoka ta longele ndje naangoka itee shi ningi.” (Mal. 3:18) Onkee ano inatu etha nando osha, shi tu teye omukumo e tatu etha po okulongela Kalunga, kutya nduno okwaahagwanenena nenge omapuko getu. Okweetha po okulongela Jehova oku li eyono enene.
17. Okuhogolola kuume kopandjokana ohaku vulu ngiini okuguma ekwatathano lyomuntu naJehova?
17 Ngele ino ya mondjokana noto dhiladhila okuya mo, mbela oohapu dhaMaleaki dhi na ko nasha nokulongela Kalunga itadhi vulu oku ku kwathela wu hogolole pandunge kuume kopandjokana? Omuntu otashi vulika a kale e na omaukwatya omawanawa, ihe ngele iha longele Kalunga kashili, mbela omuyuuki ngaa pataloko lyaJehova? (2 Kor. 6:14) Ngele owa yi mondjokana naye, ote ke ku kwathela ngaa wu kale omudhiginini kuJehova? Dhiladhila kwaashika: Otashi vulika aakulukadhi aapagani yaSalomo ya li ye na omaukwatya gontumba omawanawa. Ihe kaya li haya longele Jehova, nomokweendela ko kwethimbo oya li ya nwetha mo Salomo a longele iikalunga. — 1 Aak. 11:1, 4.
18. Aavali oya pumbwa okulonga oyana shike?
18 Aavali, otamu vulu okulongitha omahokololo gOmbiimbeli ge na ko nasha naakwaniilwa mu kwathele oyana yeni ya longele Jehova nuulaadhi. Ya kwathela ya uve ko kutya Jehova okwa li ha tokola kutya omukwaniilwa omwaanawa, nenge omwiinayi sha ikolelela ku ngele oha humitha komeho elongelokalunga lyashili nenge hasho. Longeni oyana yeni okupitila moohapu nomoku ya tulila po oshiholelwa ya mone kutya omaipyakidhilo gopaKriste, ngaashi okukonakona Ombiimbeli, okukala pokugongala nosho wo okukutha ombinga miilonga yokuuvitha, oyo tu na okupititha komeho mokukalamwenyo kwetu. (Mat. 6:33) Ngele inamu shi ninga, aanona otashi vulika ya dhiladhile kutya ohaya longele owala Jehova, molwaashoka aavali yawo nayo haye mu longele. Oshizemo, otaya ka tula elongelokalunga lyashili pondondo ontiyali monkalamwenyo yawo nenge nokuli ya thige po oshili.
19. Mboka ya etha po okulongela Jehova oye na etegameno lini? (Tala oshimpungu, “Oto vulu okugalukila kuJehova.”)
19 Ngele omuntu okwa etha po okulongela Jehova, mbela shoka otashi ti kutya ke na siku a ka pange uukuume naye? Hasho nando; ota vulu okwiiyela ombedhi e ta galukile melongelokalunga lyashili. Shono otashi pula eifupipiko nokwa pumbwa wo okutaamba ko ekwatho ndyoka ta pewa kaakuluntugongalo. (Jak. 5:14) Oonkambadhala ndhoka omuntu ta ningi itadhi vulu okuyelekwa, nuuthembahenda wokupanga ishewe uukuume naJehova.
20. Jehova ota ka kala e tu tala ngiini, ngele otwa holele aakwaniilwa mboka aadhiginini?
20 Oshike twa ilongo kaakwaniilwa yaIsraeli? Otatu vulu okukala ngaashi aakwaniilwa aadhiginini, ngele otwa tsikile okulongela Jehova nomutima aguhe. Natu ilonge komapuko getu, natu iyele ombedhi nokuninga omalunduluko ngoka ga pumbiwa. Natu dhimbulukwe wo kutya osha simana okukala aadhiginini kelongelokalunga lyashili, tatu longele Kalunga awike kashili. Ngele owa kala omudhiginini kuJehova, ote ke ku tala ko kutya oho longo shoka sha uka momeho ge.
EIMBILO 45 Omadhiladhilo gomomutima gwandje
a Moshitopolwa shino, uutumbulilo “aakwaniilwa yaIsraeli” owu ukithwa kaakwaniilwa ayehe mboka ya li ya lele oshigwana shaJehova kutya nduno oomboka ya pangele muukwaniilwa womazimo gaali gaJuda nenge oomboka ya lele omazimo omulongo gaIsraeli, nenge omazimo agehe 12.
b UUTUMBULILO WA YELITHWA: Olundji Ombiimbeli oya longitha oshitya “omutima” yu ukitha kuuntu womeni, mwa kwatelwa omahalo, omadhiladhilo, iikala, okuvula kwe, omainyengotompelo nosho wo omalalakano ge.
c Osha li omukalondjigilile kaakwaniilwa aapagani okulongela iikalunga yoshigwana shoka ya sinda.
d Omukwaniilwa Asa okwa li a yono omayono ga kwata miiti. (2 Ondjal. 16:7, 10) Nonando ongawo, Ombiimbeli oye mu popile muuwanawa. Nonando petameko okwa li a tindi epukululo, otashi vulika lwanima e ki iyela ombedhi. Okwa li e na omaukwatya omawanawa ogendji okuyelekanitha nomapuko ge. Shoka oshindhindhilikwedhi osho kutya Asa okwa longele owala Jehova, nokwa ningi oonkambadhala a hanagule po iihongwathano muukwaniilwa we. — 1 Aak. 15:11-13; 2 Ondjal. 14:2-5.
e Oshindhindhilikwedhi, iipango iyali yotango mOmpango yaMoses oya indika okulongela oshinima shontumba pehala lyokulongela Jehova. — Eks. 20:1-6.
f SHOKA TASHI ULIKWA METHANO: Omukuluntugongalo omugundjuka ta gandja omayele komumwatate gwontumba kombinga yokunwa kwe. Omumwatate ta taamba ko neifupipiko omayele ngoka a pewa, ta ningi omalunduluko ngoka ga pumbiwa nokutsikila okulongela Jehova nuudhiginini.