Shoka tashi vulu oku ku kwathela, wu ninge ekonakonombiimbeli lyoye pandjigilile
MBELA oho mono oshidhigu okuninga ekonakonombiimbeli lyopaumwene pandjigilile notali hokitha? Omathimbo gamwe, atuheni osho hatu kala tu uvite ngaaka. Ihe dhiladhila kiinima yimwe mbyoka hatu ningi pandjigilile, ngaashi okwiiyoga. Ohaku pula ethimbo noonkambadhala, ihe ohatu kala tu uvite twa pepelelwa ngele twa mana! Ekonakonombiimbeli nalyo otali vulu oku tu talaleka. (Ef. 5:26) Tala komaetopo gamwe ngoka taga vulu oku ku kwathela:
Ninga elandulathano. Ekonakonombiimbeli, limwe ‘lyomiinima yi na oshilonga,’ mbyoka Omukriste kehe e na okuninga. (Fil. 1:10) Opo wu kale to li ningi pandjigilile, tula elandulathano lyoye pehala mpoka to li mono nuupu, ngaashi koshipelende nenge komweelo gwokila yoye. Nenge wu kale ho tula oalalama koshikwaelektronika shoye, opo shi ku dhimbulukithe, uuna ethimbo li li pokuthika.
Dhiladhila kwaashoka tashi vulu oku ku kwathela, wu vule okugandja eitulomo. Mbela oho gandja eitulomo, uuna to konakona ethimbo ele, nenge uuna to shi ningi uule wethimbo efupi? Omusita golutu omwene. Onkee itulila po ethimbo lyokukonakona sha ikolelela koonkalo dhoye. Ngele iho kala wa hala okuninga ekonakono lyoye, uuna ethimbo ndyoka wa itulila po lya thiki, omolwashike itoo ningi owala ekonakono lyoye uule wominute nando omulongo? Okukonakona owala nando ethimbo efupi, oto vulu okwiilonga oshindji, shi vulithe okukala inoo ninga sha. Otashi vulu wo oku ku inyengitha wu tsikile. — Fil. 2:13.
Hogolola komeho yethimbo shoka to ka lesha. Ngele owa kuutumba e to dhiladhila kushoka to ka konakona, otashi vulika wu kale itoo ‘longitha nawa ethimbo’ lyoye. (Ef. 5:16) Omolwashike itoo ningi omusholondondo gwiitopolwa, nenge gwiipalanyolo mbyoka wa hala okukonakona? Ngele momadhiladhilo goye omwe ya epulo lyontumba, li nyola. Pehulilo lyekonakonombiimbeli lyoye, otashi vulika wu kale wu na omaetopo ogendji gaashoka wa hala okukonakona.
Kala ho tifuka. Ngele tashi ya pethimbo ndyoka ho konakona nenge iipalanyolo mbyoka wa hogolola, oto vulu okuninga omalunduluko. Shoka sha simanenena, okukonakona pandjigilile, ihe kashi shi kutya oho konakona pongapi, ethimbo li thike peni, nenge shoka to konakona.
Ohatu mono shili uuwanawa, uuna tatu ningi ekonakonombiimbeli lyetu pandjigilile. Ohatu hedha popepyeelela naJehova, ohatu ilongo okukatuka pandunge, nohatu kala tu uvite twa pepelelwa. — Jos. 1:8.