Omolwashike iita nelongithonkondo tayi tsikile?
Ombiimbeli oya popya kombinga yaashoka hashi etitha iita nelongithonkondo, nonokutya omolwashike iiningwanima mbyoka iiwinayi tayi tsikile nokuningwa.
UULUNDE
Kalunga okwa shita aavali yetu yotango Adam naEva, oshifetha she. (Genesis 1:27) Shono osha hala okutya, molwaashoka oya shitwa oshifetha shaKalunga, oya li taya vulu okuholela omaukwatya ge, mwa kwatelwa ombili nosho wo ohole. (1 Aakorinto 14:33; 1 Johannes 4:8) Ihe Adam naEva inaya vulika kuKalunga, noya li ya yono. Onkee ano atuheni otwa thigulula uulunde neso kuyo. (Aaroma 5:12) Uulunde mboka twa thigulula, ohawu tu ningitha tu kale tu na omadhiladhilo omawinayi nokuninga iinima iiwinayi. — Genesis 6:5; Markus 7:21, 22.
OMAPANGELO GOPANTU
Kalunga ine tu shita tu ipangele tse yene. Ombiimbeli otayi ti: “Kaku na omuntu hu utha okukalamwenyo kwe.” (Jeremia 10:23) Omolwetompelo ndyono ngawo, omapangelo gopantu itaga vulu okuhulitha po thiluthilu iita nosho wo elongithonkondo.
SATANA NOONDEMONI DHE
Ombiimbeli otayi ti kutya “uuyuni auhe ou li mepangelo lyomuhindadhi.” (1 Johannes 5:19) “Omuhindadhi” ngoka ohi ithanwa Satana Ondiyapoli, noku li omudhipagi omukwanyanya. (Johannes 8:44) Ye noondemoni dhe, ohaya nwetha mo aantu ya hinge iita, noya humithe komeho elongithonkondo. — Ehololo 12:9, 12.
Itatu vulu okuhulitha po shoka hashi etitha iita nelongithonkondo, ihe Kalunga ota vulu.