Holela aayengeli aadhiginini

1-2. (a) Otwa yooloka ko ngiini kaayengeli? (b) Omomukalo guni twa faathana naayengeli?

SHO Jehova e ku nanene moshili, okwe ku nanene muukwanegumbo uunene wo uunahole mboka hawu mu longele, nowa kwatela mo aayengeli aadhiginini omamiliyona. (Dan. 7:9, 10) Ngele tatu dhiladhila kombinga yaayengeli, olundji ohatu dhiladhila kunkene ya yooloka ko kutse. Pashiholelwa, aayengeli oko ya kala omanga inaatu shitwa. (Job 38:4, 7) Oye na oonkondo yetu vule. Aayapuki naayuuki ye tu vule, oshoka inatu gwanenena. — Luk. 9:26.

² Nonando otwa yooloka ko kaayengeli momikalo ndhoka, otwa faathana wo nayo momikalo odhindji. Pashiholelwa, ngaashi aayengeli, natse ohatu vulu okuholela uukwatya waJehova uuwanawa. Ngaashi aayengeli, natse otu na emanguluko lyokuninga omatokolo. Ngaashi yo, natse otu na omadhina, omaukwatya ga yoolokathana niinakugwanithwa. Ihe ngaashi owala aayengeli, atuhe otu na ompumbwe yokulongela Omushiti gwetu. — 1 Pet. 1:12.

3. Oshike tatu ilongo kaayengeli aadhiginini?

³ Molwaashoka otu na omaukwatya ogendji ga fa gaayengeli, oshiholelwa shayo otashi vulu oku tu tsa omukumo. Uushili owo kutya, otatu vulu okwiilonga iiyilongomwa ya simana kuyo. Moshitopolwa shika, otatu ka tala nkene tatu vulu okuholela eifupipiko lyaayengeli aadhiginini nohole yawo yokuhola aantu, eidhidhimiko noonkambadhala ndhoka haya ningi ya kaleke egongalo lya yela.

AAYENGELI AAIFUPIPIKI

4. (a) Aayengeli ohaya ulike ngiini eifupipiko? (b) Omolwashike aayengeli aaifupipiki? (Episalomi 89:7)

⁴ Aayengeli aadhiginini oye li aaifupipiki. Nonando oye na owino oyindji, aanankondo naanandunge, ohaya vulika komalombwelo gaJehova. (Eps. 103:20) Uuna taya gwanitha po iinakugwanithwa yawo, mbyoka Jehova e ya pa, ihaya itangele shoka haya ningi, nenge ya longithe oonkondo ndhoka ye na ya gandje eitulomo kuyo yene. Ohaya longo ehalo lyaKalunga nenyanyu, nonando omadhina gawo inaga tumbulwa.a (Gen. 32:24, 29; 2 Aak. 19:35) Ohaya tindi esimano ndyoka li na okupewa Jehova. Omolwashike aayengeli ye li aaifupipiki? Omolwaashoka oye hole Jehova noye mu simaneka noonkondo. — Lesha Episalomi 89:7.

5. Ongiini omuyengeli gumwe a ulike eifupipiko, sho a pukulula omuyapostoli Johannes? (Tala wo ethano.)

⁵ Natu taleni koshiningwanima shimwe shoka tashi ulike eifupipiko lyaayengeli. Lwomomumvo 96 E.N., omuyengeli inaa popiwa kedhina okwa li a ulukile omuyapostoli Johannes emoniko ekumithi. (Eh. 1:1) Mbela Johannes okwa li a inyenge ngiini kemoniko ndyono? Okwa li a kambadhala okwiinyongamena omuyengeli. Ihe omuyengeli ngoka okwe mu kankeke nziya a ti: “Ino shi yelekela nando! Oshoka ngame omupiya mukweni nogwomooyakweni ayehe . . . Galikana Kalunga.” (Eh. 19:10) Omuyengeli ngono ke shi tuu omwiifupipiki! Ka li a hala okupewa esimano nenge a pandike. Nziya, okwa lombwele Johannes a galikane Jehova Kalunga. Pethimbo opo tuu mpoka, omuyengeli ka li iwete a simana e vule Johannes. Nonando omuyengeli okwa longela Jehova uule wethimbo noku na oonkondo e vule Johannes, okwe mu lombwele neifupipiko kutya ye omupiya omukwawo. Ihe nonando omuyengeli okwa li e na okupukulula Johannes, ka li e mu nyenyetele nenge a ungaunge nonyanya nomuyapostoli ngoka omunamimvo. Pehala lyaashono, okwa popi naye nombili. Otashi vulika a li a ndhindhilike kutya Johannes okwa kumwa noonkondo.

6. Ongiini tatu vulu okuholela eifupipiko lyaayengeli?

⁶ Ongiini tatu vulu okuholela eifupipiko lyaayengeli? Natse wo otatu vulu okugwanitha po iinakugwanithwa yetu nokaapu na oku yi itangela, nenge tu kale twa hala okupewa esimano, omolwashoka twa tompola po. (1 Kor. 4:7) Shimwe ishewe, inatu pumbwa okukala tu uvite tu vule yalwe ngele otwa longela Jehova ethimbo ele tu ya vule nenge tu na iinakugwanithwa yontumba mbyoka kaaye na. Uushili owo kutya, ngele otu na iinakugwanithwa oyindji otashi ke tu ningitha tu ishonopeke lela. (Luk. 9:48) Ngaashi owala aayengeli, natse otwa hala okuyakula yalwe. Inatu hala yalwe ya dhiladhile kutya otwa simana tu ya vule.

7. Ongiini tatu vulu okuulika eifupipiko, uuna tatu pukulula gumwe nenge tatu mu pe omayele?

⁷ Otatu vulu wo okuulika eifupipiko, uuna tatu pukulula gumwe nenge tatu mu pe omayele, ano omwiitaali omukwetu nenge okanona ketu. Omathimbo gamwe otashi vulika tu gandje omayele ga ukilila omuntu. Ihe ngaashi omuyengeli ngoka a li a pukulula Johannes nombili, natse otatu vulu okupukulula gumwe twe mu ukilila nokaapu na oku mu teya omukumo. Ngele ihatu itala ko twa simana tu vule yalwe, otashi ke tu kwathela tu gandje omayele ga kankamena kOmbiimbeli momukalo gwesimaneko nogwohole. — Kol. 4:6.

AAYENGELI OYE HOLE AANTU

8. (a) Sha ikolelela kuLukas 15:10, aayengeli ohaya ulike ngiini kutya oye hole aantu? (b) Aayengeli otaya dhana onkandangala yini miilonga yokuuvitha? (Tala wo ethano .)

⁸ Aayengeli ihaya ipwililikile shoka hashi ningilwa aantu nenge ya dhiladhile kutya inaya simana. Oye hole aantu. Ohaya kala ya nyanyukwa uuna omuyoni a iyele ombedhi, ano ngoka a li a etha po okulongela Jehova a galukile kuye nenge uuna gumwe a lundulula iikala ye e te ya moshili. (Lesha Lukas 15:10.) Aayengeli ohaye tu ambidhidha wo uuna tatu uvitha onkundana yUukwaniilwa. (Eh. 14:6) Nonando ihaya uvithile aantu, ohaye tu wilike tu ye komuntu ngoka a hala okwiilonga kombinga yaJehova. Odhoshili kutya itatu vulu okupopya nuushili kutya aayengeli oyo ye tu wilika kondandalunde, tu ka uvithile gumwe. Komeho gaayihe, Jehova ota vulu okulongitha omikalo dhilwe, ngaashi ombepo ye ondjapuki, a kwathele aantu nenge a wilike aapiya ye. (Iil. 16:6, 7) Ashike oha longitha aayengeli ye, ye tu kwathele momikalo odhindji. Onkee ano uuna tatu uvitha onkundana ombwanawa, otatu vulu okukala nuushili kutya aayengeli otaya ka kala noku tu yambidhidha. — Tala oshimpungu “Omagalikano gawo oga li ga yamukulwa.”b

9. Ongiini tatu vulu okukala tu hole aantu, ngaashi aayengeli?

⁹ Ongiini tatu vulu okukala tu hole aantu, ngaashi aayengeli? Ngele otwa uvu kutya gumwe okwa galulilwa megongalo, natse otatu vulu okukala twa nyanyukwa ngaashi aayengeli. Otatu vulu okushilipaleka omumwatate kutya otu mu hole notwa nyanyukwa sho ta longele Jehova ishewe. (Luk. 15:4-7; 2 Kor. 2:6-8) Otatu vulu wo okuholela aayengeli mokuninga ngaashi tatu vulu tu uvithile yalwe. (Omuuv. 11:6) Ngaashi owala aayengeli haye tu ambidhidha sho tatu uvitha onkundana ombwanawa, natse otatu vulu okukonga omikalo moka tatu vulu okuyambidhidha aamwatate naamwameme miilonga yokuuvitha. Pashiholelwa, mbela ohatu ningi ngaa oonkambadhala tu longe naauvithi mboka aape? Mbela itatu vulu okwaambidhidha aamwatate naamwameme mboka aakokele naamboka ye na uulema, mokuya pamwe nayo muukalele?

10. Oshike tatu ilongo koshimoniwa shaSara?

¹⁰ Ongiini ngele otu na omangambeko mwaashoka tatu vulu okuninga? Otatu vulu okukonga omikalo tu longe pamwe naayengeli miilonga yokuuvitha. Natu taleni koshimoniwa shomumwameme gumwe gwokoIndia,c gwedhina Sara. Konima sho a kala ta kokola ondjila uule womimvo omilongo mbali, okwa tameke okweehama nokwa kala iha vulu we okweenda. Kapu na omalimbililo kutya okwa li a gwililwa po noonkondo. Ihe omolweyambidhidho lyopahole lyaamwatate naamwameme nosho wo okukala ha lesha Ombiimbeli, Sara okwa kala ishewe a nyanyukwa. Odhoshili kutya okwa li e na okwiigilila omikalo dhimwe omipe dhoku uvitha. Molwashoka ka li we ta vulu oku kuutumba opo a nyole oontumwafo, okwa li owala ta vulu okugandja uunzapo okupitila mongodhi. Onkee okwa li ha dhengele mboka ye na ohokwe, mboka nayo ye mu ukitha kuyalwe mboka ye na ishewe ohokwe. Oshizemo osha li shike? Momukokomoko gwoomwedhi, Sara okwa li e na aakonakoni ye li 70, mboka a li ihaa vulu oku ya mana ko. Onkee okwa gandja po yamwe kaauvithi yomegongalo lyawo. Ngashingeyi oyendji yomaakonakonimbiimbeli mboka ohaye ya kokugongala. Aayengeli inaya nyanyukwa tuu noonkondo okulonga pamwe naamwatate naamwameme, mboka ngaashi Sara, haya longo ngaashi taya vulu miilonga yokuuvitha.

AAYENGELI OHAYA IDHIDHIMIKE

11. Aayengeli aadhiginini oya ulike ngiini eidhidhimiko lya dhenga mbanda?

¹¹ Aayengeli aadhiginini oye li oshiholelwa oshiwanawa sheidhidhimiko. Oya kala nokwiidhidhimikila okwaanuuyuuki uule womimvo omayovi. Oya mono nkene Satana nosho wo iishitwa iikwawo oyindji yopambepo, mbyoka ya kala tayi longele Jehova pamwe nayo, ye mu tukulile oshipotha. (Gen. 3:1; 6:1, 2; Jud. 6) Ombiimbeli oya popi kombinga yomuyengeli omudhiginini, ngoka a li a kondjithwa kondemoni yimwe yi na oonkondo. (Dan. 10:13) Shimwe ishewe, mondjokonona yaantu, aayengeli oya kala nokumona omwaalu omushona gwaantu mboka taya longele Jehova. Nonando oya li ya mono iinima ayihe mbyoka, aayengeli mboka aadhiginini oya tsikila nokulongela Jehova nenyanyu nosho wo nuulaadhi. Oye shi kutya pethimbo lya opala, Kalunga ota ka hulitha po okwaanuuyuuki.

12. Oshike tashi vulu oku tu kwathela tu idhidhimike?

¹² Ongiini tatu vulu okuholela eidhidhimiko lyaayengeli? Ngaashi aayengeli, otashi vulika tu ungaungiwe natse kaashi li pauyuki nenge tu patanekwe. Ihe ngaashi yo, otu na eitaalo kutya Kalunga ota ka hulitha po okwaanuuyuuki akuhe pethimbo lya opala. Ngaashi aayengeli aadhiginini inatu “vulweni okulonga uuwanawa.” (Gal. 6:9) Kalunga okwa uvaneka kutya ote ke tu kwathela tu idhidhimike. (1 Kor. 10:13) Otatu vulu okugalikana kuJehova e tu pe ombepo ye, ndjoka hayi imike eidhidhimiko nosho wo enyanyu. (Gal. 5:22; Kol. 1:11) Ongiini ngele oto patanekwa? Inekela muJehova thiluthilu, ngoye ino kala wa tila. Ote ku ambidhidha aluhe noku ku pa oonkondo ndhoka wa pumbwa. — Heb. 13:6.

AAYENGELI OHAYA KWATHELE MOKUKALEKA EGONGALO LYA YELA

13. Oshinakugwanithwa shini sha ikalekelwa aayengeli ye na momasiku gahugunina? (Mateus 13:47-49)

¹³ Jehova okwa pa aayengeli oshinakugwanithwa sha ikalekelwa, momasiku ngaka gahugunina. (Lesha Mateus 13:47-49.) Aantu yomaludhi agehe muuyuni otaya ka kala ye na ohokwe monkundana ombwanawa. Yamwe yomuyo otaya ka katuka oonkatu ya ninge Aakriste yashili, omanga yalwe itaye ke shi ninga. Aayengeli oye na oshinakugwanithwa ‘shokuyoolola mo aakolokoshi mokati kaayuuki.’ Shino otashi ulike kutya oya pewa oshinakugwanithwa shokugamena egongalo li kale lya yogoka. Shika inashi hala okutya kehe gumwe ngoka ihaa endathana we natse omolwomatompelo gontumba ita galuka we, sho inashi hala okutya megongalo kamu na siku mu ka holoke omaupyakadhi. Otatu vulu okukala nuushili kutya aayengeli otaya longo nuudhiginini, opo ya kaleke egongalo lya yela.

14-15. Ongiini tatu vulu okuholela aayengeli mokuulika kutya otwa hala okukaleka egongalo lya yela? (Tala wo omathano.)

¹⁴ Ongiini tatu vulu okuholela aayengeli mokuulika kutya otwa hala okukaleka egongalo lya yela? Omokuninga ngaashi tatu vulu tu kaleke egongalo lya yogoka pamikalo nosho wo pambepo. Otwa pumbwa okulonga nuudhiginini tu gamene ekwatathano lyetu naJehova. Shoka ohatu shi ningi mokuhogolola ookuume mboka ye mu hole nokuyanda okuninga shoka tashi vulu okuyona po ekwatathano lyetu naye. Momukalo gwa tya ngawo, ohatu kwathele mokukaleka egongalo lya yogoka. (Eps. 101:3) Otatu vulu wo okukwathela ooitaali ooyakwetu ya kale aadhiginini kuJehova. Pashiholelwa, Mbela otatu ka ninga po shike ngele otwa uvu kutya omwiitaali omukwetu okwa yona eyono lya kwata miiti? Molwaashoka otu hole omuntu ngoka, otatu ke mu ladhipika a ka popye naakuluntugongalo. Ngele ine shi ninga, otatu ka lombwela aakuluntugongalo kombinga yoshinima shoka. Otwa hala omwiitaali omukwetu ngoka a nkundipala pambepo a kwathelwe nziya. — Jak. 5:14, 15.

¹⁵ Shiyemateka, yamwe mboka ya yona omayono ga kwata miiti, oye na okukuthwa mo megongalo. Uuna shoka sha ningwa, ohatu etha po okweendathana nayo.d (1 Kor. 5:9-13) Elongekidho ndyoka ohali kwathele egongalo li kale lya yogoka. Shimwe ishewe, okukala ihaatu endathana naantu mboka ya kuthwa mo megongalo, otashi ulike kutya otu ya hole. Uuna twa vulika kuJehova mokukala ihaatu endathana nayo, otashi vulika shi ya kwathele ya mone kutya oya pumbwa okugalukila kuye. Ngele oye shi ningi, ohashi tu nyanyudha, ohashi nyanyudha wo Jehova nosho wo aayengeli ye. — Luk. 15:7.

16. Omomikalo dhini to vulu okuholela aayengeli?

¹⁶ Oshi li uuthembahenda, sho Jehova e tu pitika tu ilonge kombinga yaayengeli nokulonga pamwe nayo. Natu holele omaukwatya gawo omawanawa ngaashi: eifupipiko lyawo, ohole yawo yokuhola aantu, eidhidhimiko lyawo nosho wo sho ye na ko nasha nokukaleka egongalo lya yogoka pamikalo nopambepo. Ngele otwa holele aayengeli aaifupipiki, natse otatu vulu okukala oshilyo shuukwanegumbo waJehova noku mu longela sigo aluhe.