Jehova ote ke ku hekeleka

1. Hokolola onkalo yAajuda sho ya li muBabilonia.

DHILADHILA owala nkene Aajuda ya li ye uvite sho ya li muupongekwa muBabilonia. Oya mona nomeho gawo nkene Jerusalem sha li sha hanagulwa po. Omolwoondjo dhawo nosho wo dhoohekulululwa, Aajuda oya li ya kuthwa mevi lyawo e taya falwa koshilongo shilwe. (2 Ondjal. 36:15, 16, 20, 21) Ihe Aajuda muBabilonia oya li ye na emanguluko lyontumba, ya gwanithe po iilonga yawo yakehe siku monkalamwenyo. (Jer. 29:4-7) Eeno, odhoshili kutya onkalo kuyo kaya li ompu, nokaya li ya hala okukala moshilando shoka. Mbela oya li ye uvitile ngiini onkalo yawo? Gumwe gwomaapongekwa, omudhiginini, okwa popi a ti: “Otwa kuutumba pomilonga dhaBabilon e tatu lili, sho twa dhimbulukwa Sion.” (Eps. 137:1) Aajuda muupongekwa oya li ya pumbwa ehekeleko, ihe olye a li te ke li ya pa?

2-3. (a) Jehova okwa li a ningile shike Aajuda mboka ye li muupongekwa? (b) Oshike tatu ka kundathana moshitopolwa shino?

² Jehova ‘oKalunga ngoka kuye haku zi ekwatho alihe.’ (2 Kor. 1:3) E li Kalunga omunahole, oha kala a nyanyukwa, uuna ta hekeleke ayehe mboka taya hedha kuye. Jehova okwa li e shi kutya yamwe mboka ye li muupongekwa otaya ka taamba ko egeelo ndyoka te ya pe notaya ka galukila kuye. (Jes. 59:20) Onkee ano omimvo dha konda pe 100 manga Aajuda inaaya falwa muupongekwa, Jehova okwa nwetha mo omuhunganeki Jesaja a nyole embo ndyoka lya lukilwa edhina lye. Embo ndyono olya li tali ke ya kwathela ngiini? Jesaja okwa ti: “Kalunga ketu ota ti: “Hekelekeni, hekelekeni aantu yandje.” (Jes. 40:1) Okupitila membo lyaJesaja, Jehova okwa li a pe Aajuda mboka ye li muupongekwa ehekeleko ndyoka ya pumbwa.

³ Ngaashi owala Aajuda mboka ya li muupongekwa, natse ohatu kala twa pumbwa okuhekelekwa ethimbo nethimbo. Moshitopolwa shika, otatu ka taleni omikalo ndatu nkene Jehova a li a hekeleke mboka ya li muupongekwa: (1) okwa li a uvaneke kutya ota ka dhimina po mboka ya iyele ombedhi, (2) okwa pe aantu ye etegameno nosho wo (3) okwe ya kwathele kaaya kale ya tila. Sho tatu kundathana iinima mbyono, natu tale nkene tatu vulu okumona mo uuwanawa moohapu dhaJehova ndhoka tadhi tu hekeleke.

JEHOVA OHE TU DHIMINE PO OMOLWOHENDA YE

4. Jehova okwe shi ulika ngiini kutya ye oKalunga omunahenda? (Jesaja 55:7)

⁴ Jehova “oye Tate omunahenda.” (2 Kor. 1:3) Uukwatya mbono okwa kala noku wu ulika, sho a uvaneke okudhimina po Aajuda mboka ya li muupongekwa, uuna ya iyele ombedhi. (Lesha Jesaja 55:7.) Okwa ti: “Otandi ku sile ohenda hayi kalelele.” (Jes. 54:8) Jehova okwa li te ku ulika ohenda ye ngiini? Nonando oshigwana shAajuda osha li tashi ka mona iilanduliko omolwoonkatu dhasho, Jehova okwa li a uvaneka kutya itashi ka kala muBabilonia sigo aluhe. Osha li owala tashi ka kala muupongekwa uule wethimbo lya ngambekwa. (Jes. 40:2) Oohapu ndhoka odhi na okukala dha li dha hekeleke Aajuda mboka, nokushilipaleka mboka yi itedhulula mokati kawo.

5. Omolwashike tu na etompelo lya kola okupandula ohenda yaJehova, tu vulithe kokule Aajuda mboka ya li muupongekwa?

⁵ Shino otashi tu longo shike? Jehova okwa halelela okudhimina po aapiya ye thiluthilu. Kunena, otwa tompwa lela kutya okwa halelela oku shi ninga, okuyelekanitha nAajuda mboka ya li muupongekwa. Omolwashike tatu tile ngawo? Otu na euvoko kutya Jehova ohe tu dhimine po pakankameno lyashike. Omimvo omathele ogendji okuza sho Jesaja a nyola ehunganeko ndyoka, Jehova okwa tumu Omwana omuholike huka kombanda yevi, opo a kulile aalunde mboka ya iyela ombedhi. Onkee omayono ohaga ‘dhimwa po’ thiluthilu pakankameno lyekuliloyambo ndyoka. (Iil. 3:19; Jes. 1:18; Ef. 1:7) Ohatu longele shili Kalunga omunahenda.

6. Uuwanawa wuni tatu ka mona, ngele otwa gandja eitulomo kohenda yaJehova? (Tala wo ethano.)

⁶ Oohapu dhaJehova ndhoka dhi li muJesaja 55:7 otadhi vulu oku tu hekeleka, ngele ohatu kala tu uvite tu na ondjo sha pitilila. Yamwe yomutse otashi vulika tu kale tu uvite tu na ondjo, omolwomapuko gomonakuziwa, nokuli nokonima sho twa iyela ombedhi. Shono osho hashi kala ngawo, unene tuu ngele tatu mono iihuna, omolwiilanduliko yomayono getu. Ihe ngele otwa hempulula oondjo dhetu, notwa etha po okuyona, otatu vulu okukala tu na uushili kutya Jehova okwe tu dhimina po. Uuna Jehova e tu dhimine po, iha dhimbulukwa we oondjo dhetu. (Yelekanitha Jeremia 31:34.) Onkee ano ngele Jehova iha kala ti ipula nomayono getu gonale, natse katu na oku shi ninga. Shoka sha simana kuye, ooshoka tatu ningi ngashingeyi, ihe hamayono getu gomonakuziwa. (Hes. 33:14-16) Masiku, Tate yetu omunahenda ote ke tu mangulula sigo aluhe kiilanduliko yomapuko getu.

7. Oshike tashi ke tu inyengitha tu konge ekwatho, ngele otwa kala twa holeka eyono lyetu?

⁷ Oshike tu na okuninga ngele eiyuvo lyetu otali tu nyenyetele, molwaashoka twa kala twa holeka eyono lya kwata miiti? Ombiimbeli otayi tu ladhipike tu ye tu ka konge ekwatho kaakuluntugongalo. (Jak. 5:14, 15) Nonando ongawo, otashi vulika kaashi kale oshipu oku ya lombwela eyono lyetu. Ihe ngele otwa iyele ombedhi, notu shi kutya Jehova nosho wo aalumentu mboka aadhiginini a langeka po otaye ke tu sila ohenda, otashi ke tu inyengitha tu ye kuyo. Tala nkene ohenda yaJehova ya li ya hekeleke omumwatate gwedhina Arthur,a ngoka a kala neiyuvo tali mu nyenyetele noonkondo. Okwa ti: “Uule womumvo gumwe lwaampono, onda kala handi tala omathano giipala. Ihe sho nda pulakene koshipopiwa shoka sha li tashi popi kombinga yeiyuvo, onda lombwele omukulukadhi gwandje naakuluntugongalo eyono lyandje. Konima yaashono, onda kala ndi uvite nda pepelelwa, ihe natango onda li ndi uvitile nayi shoka nda ninga. Aakuluntugongalo oya li ya dhimbulukitha ndje kutya Jehova ina ekelahi ndje. Ohe tu pukulula, molwaashoka oku tu hole. Oohapu dhawo dhohenda odha gumu omutima gwandje nodha kwathele ndje ndi lundulule okudhiladhila kwandje.” Kunena, Arthur oku li omukokolindjila gwondjigilile nomuyakuligongalo. Otashi hekeleke lela okukala tu shi kutya Jehova ohe tu sile ohenda, ngele otwi iyele ombedhi.

JEHOVA OKWE TU PA ETEGAMENO

8. (a) Etegameno lini Jehova a li a pe Aajuda mboka ya li muupongekwa? (b) Sha ikolelela kuJesaja 40:29-31, etegameno olya li tali ka kwathela ngiini Aajuda mboka ya iyela ombedhi?

⁸ Pataloko lyopantu, Aajuda mboka ya li muukwatwa oya li kaaye na etegameno lyasha. Epangelo enankondo lyuuyuni lyaBabilonia olya li lyi shiwike kutya ihali mangulula oonkwatwa dhalyo. (Jes. 14:17) Ihe Jehova okwa li a pe oshigwana she etegameno. Okwa li a uvaneke kutya ote ke shi mangulula, nokapu na shoka sha li tashi vulu oku mu keelela e shi ninge. (Jes. 44:26; 55:12) Pataloko lyaJehova, Babilonia osha li sha fa ontsi yowala. (Jes. 40:15) Shampa ya fudhilwa, ihayi kala po we. Etegameno ndyoka olya li tali ka guma ngiini Aajuda mboka ya li muupongekwa? Olya li lye ya hekeleke. Jesaja okwa nyola a ti: “Mboka taa inekele Omuwa, ohaa mono oonkondo oompe.” (Lesha Jesaja 40:29-31.) Etegameno olya li tali ke ya nkondopaleka, ya fa “oontsa tadhi yelutha omawawa pombanda.”

9. Oshike sha li tashi vulu okukwathela Aajuda, mboka ya li muupongekwa, ya kale ya inekela momauvaneko gaJehova?

⁹ Jehova okwa li a pe Aajuda mboka ye li muupongekwa etompelo lyokukala ya inekela momauvaneko ge. Etompelo lini a li e ya pe? Dhiladhila kombinga yomahunganeko ngoka ya li ye shi kutya oga gwanithwa po nale. Pashiholelwa, oya li ye shi kutya Assur okwa sinda uukwaniilwa waIsraeli wokuumbangalantu nokufala aantu muupongekwa. (Jes. 8:4) Oya li ya mono nkene Aababilonia ya hanagula po Jerusalem nokufala aakalimo yomusho muupongekwa. (Jes. 39:5-7) Oya li wo ya mono nkene omukwaniilwa Sedekia a tsipulwa omeho nokufalwa kuBabilonia. (Jer. 39:7; Hes. 12:12, 13) Kehe shimwe shoka Jehova a hunganeka osha gwanithwa. (Jes. 42:9; 46:10) Iinima ayihe mbyoka oyi na okukala ya li ya koleke eitaalo lyawo muJehova kutya euvaneko lye li na ko nasha noku ya mangulula otali ka gwanithwa shili.

10. Oshike tashi ke tu kwathela tu kale tu na etegameno momasiku gahugunina ngaka tu li mugo?

¹⁰ Shino otashi tu longo shike? Uuna twa teka omukumo, etegameno otali vulu oku tu hekeleka noku tu nkondopaleka. Otu li momathimbo omadhigu, nopu na aatondi aanankondo mboka taye tu pataneke. Ihe inatu tyololoka. Jehova okwe tu pa etegameno ewanawa lyomwenyo gwaaluhe notatu ka kala tu uvite ombili yashili notwa gamenwa. Otu na okukaleka etegameno ndyoka lya tsa momadhiladhilo nomomitima dhetu. Ngele hasho, etegameno lyetu otali ka kala lya fa omushitilo gwevi omwaanawa ngoka kaatu wete nawa, oshoka otatu gu talele mekende lya kaka. Ongiini tatu vulu okwoopaleka ekende lyetu lyopathaneko, opo tu kale tu na etegameno lya tsa? Omokukala hatu kongo ethimbo tu dhiladhile kombinga yankene onkalo tayi ka kala ombwanawa muuyuni uupe. Otatu vulu okulesha iitopolwa, okutala uuvidio nokupulakena komaimbilo ngoka taga popi kombinga yetegameno lyetu. Otatu vulu wo okugalikana kuJehova shi na ko nasha nomauvaneko ngoka twa tegelela nondjuulukwe tu ka mone taga gwanithwa.

11. Oshike hashi kwathele omumwameme gumwe ngoka e na omukithi gwa kwata miiti, a kale e na oonkondo?

¹¹ Tala kunkene etegameno lya li lya hekeleke nokunkondopaleka omumwameme gwedhina Joy, ngoka e na omukithi gwa kwata miiti. Okwa ti: “Uuna ndi uvite nda gwilililwa po, ohandi lombwele Jehova omaiyuvo gandje ndi na einekelo kutya oku uvite ko omaiyuvo gandje. Jehova okwa li a pe ndje ‘oonkondo ndhoka dhi vule dhopaunshitwe.’” (2 Kor. 4:7) Joy oha kala wo i wete e li muuyuni uupe, moka ‘kape na nando ogumwe ta ka tya: “Otandi ehama.”’ (Jes. 33:24) Ngele natse otwa mbumbulile Jehova omitima dhetu, nokugandja eitulomo ketegameno lyetu, otatu ka mona oonkondo opo tu idhidhimikile omaudhigu.

12. Omatompelo geni tu na gokwiinekela momauvaneko gaJehova? (Tala wo ethano.)

¹² Ngaashi sha li sha ningilwa mboka ya li muupongekwa, Jehova okwe tu pa omatompelo ogendji gokukala twa inekela momauvaneko ge. Dhiladhila owala komahunganeko ngoka hatu mono taga gwanithwa po. Pashiholelwa, otu wete epangelo enankondo lyuuyuni ndoka ‘ombinga yimwe ya kola, nonkwawo inayi kola.’ (Dan. 2:42, 43) Ohatu uvu wo ‘omakakamo gevi koombinga noombinga’ nohatu kutha ombinga mokuuvithila ‘iigwana ayihe.’ (Mat. 24:7, 14) Omahunganeko ngaka, nagalwe ohaga koleke eitaalo lyetu momauvaneko gaJehova taga hekeleke, ngoka inaaga gwanithwa natango.

JEHOVA OHE TU KWATHELE KAATU KALE TWA TILA

13.(a) Mbela omashongo geni Aajuda ya li ye na okutaalela, sho ya li ye na okumangululwa mo muukwatwa? (b) Ngaashi sha popiwa muJesaja 41:10-13, Jehova okwa li a hekeleke ngiini Aajuda mboka ya li muupongekwa?

¹³ Nonando Jehova okwa li a hekeleke mboka ya li muupongekwa netegameno ewanawa, okwa li e shi kutya otaya ka taalela omashongo pethimbo lyemanguluko lyawo. Jehova okwa li a hunganeke kutya pehulilo lyuupongekwa wAajuda, omusindani ota ka hanagula po iigwana mbyoka ya kundukidha nohayi tilitha Babilonia. (Jes. 41:2-5) Mbela Aajuda oya li ye na okukala ya tila? Jehova okwa li a hekeleke oshigwana she komeho yethimbo, sho a ti: “Ino tila ongame ndi li pungoye. Ongame Kalunga koye ino limbililwa.” (Lesha Jesaja 41:10-13.) Mbela okwa li a hala okutya shike, sho a ti: “Ongame Kalunga koye”? Ka li ta dhimbulukitha Aajuda ye mu longele, oshoka oya li nale ye shi kutya oye na oku shi ninga. Pehala lyaashono, okwa li te ya dhimbulukitha kutya natango oku li pamwe nayo. — Eps. 118:6.

14. Jehova okwa li ishewe a ningi shike, a kwathele Aajuda kaa ya kale ya tila?

¹⁴ Jehova okwa li wo a kwathele Aajuda kaaya kale ya tila moku ya dhimbulukitha kombinga yoonkondo dhe oonenenene nosho wo uunongo we. Okwa li a lombwele Aajuda mboka ya li muupongekwa ya tale koonyothi kegulu. Okwa li e ya lombwele kutya ka li owala a shiti oonyothi, ihe oku dhi shi wo nokomadhina. (Jes. 40:25-28) Ngele Jehova oku shi edhina lyonyothi kehe, osha yela kutya oku shi edhina kehe lyomupiya gwe kehe. Ngele Jehova oku na oonkondo dhokushita oonyothi, osha yela wo kutya oku na oonkondo dhokukwathela aapiya ye. Onkene Aajuda mboka ya li muupongekwa kaya li ye na etompelo lya sha lyokukala ya tila nenge ye na iimpwiyu.

15. Kalunga okwa li a kwathele ngiini Aajuda mboka ya li muupongekwa, ya ilongekidhile shoka shi li komeho?

¹⁵ Jehova okwa li wo a kwathele oshigwana she, shi ilongekidhile shoka shi li komeho. Petameko lyembo lyaJesaja, Kalunga okwa lombwele oshigwana she, a ti: “Indeni momagumbo geni, mu iyedhilile mo. Holameni okathimbo, manga ondjahi yaKalunga tayi pitilile po.” (Jes. 26:20) Otashi vulika Aajuda ya li ya tula miilonga elombwelo ndyoka, sho omukwaniilwa Kores, a li a ponokele Babilonia. Omunandjokonona gumwe Omugreka okwa ti kutya sho Kores e ya muBabilonia “okwa gandja epitikilo [kaakwiita ye], ya dhipage kehe ngoka ta adhika kee li megumbo.” Dhiladhila owala kunkene aakalimo yomuBabilonia ya li ye uvite sho ya li ya tila! Ihe Aajuda mboka ya li muupongekwa otashi vulika ya li megameno, molwaashoka oya li ya vulika komalombwelo gaJehova.

16. Omolwashike inaatu pumbwa okukala tu na iimpwiyu ya pitilila kombinga yonakuyiwa yetu? (Tala wo ethano.)

¹⁶ Shino otashi tu longo shike? Masiku, otatu ka taalela uudhigu uunene, inawu kala ko nando onale mondjokonona yaantu. Uuna wa tameke, aantu muuyuni auhe otaya ka kala ya ngwangwana noya tila. Ihe hashigwana shaJehova, oshoka otu shi kutya Jehova oKalunga ketu. Otatu ka thikama tu ukilila, tu na einekelo kutya “ehupitho [lyetu] olya hedha popepi.” (Luk. 21:28) Nokuli nuuna Gog ano iigwana yi imanga kumwe, ye tu ponokele, otatu ka thikama twa ukilila. (Hes. 38:18) Jehova ota ka longitha aayengeli ye tu gamene, note ke tu pa omalombwelo ngoka taga ka hupitha oomwenyo dhetu. Omalombwelo ngoka ote ke ge tu pa ngiini? Otwa pumbwa okutegelela, nokutala nkene te ke shi ninga. Ihe nonando ongawo, otashi vulika tu ka pewe omalombwelo ngoka momagongalo getu. Momukalo moka, otashi vulika omalombwelo ngoka taga kala ga fa ‘omagumbo getu’ moka tatu ka kala twa gamenwa. Ongiini tatu vulu okwiilongekidhila shoka shi li komeho? Otwa pumbwa okukala tu na ekwatathano ewanawa naamwatate naamwameme, okuvulika komalombwelo ngoka ga za kehangano lyaJehova, nokukala twa tompwa kutya Jehova oye ta wilike ehangano lyetu. — Heb. 10:24, 25; 13:17.

17. Ongiini tatu vulu okukonga ehekeleko kuJehova?

¹⁷ Nonando Aajuda mboka ya li muupongekwa oya li ya taalela oonkalo oondhigu, Jehova okwa li e ya pe ehekeleko ndyoka ya li ya pumbwa. Ote ke tu ningila wo sha faathana. Onkee ano kutya nduno oshike tashi ke ku ningilwa monkalamwenyo yoye, tsikila okupula ehekeleko kuJehova. Inekela mohenda ye onenenene. Kaleka etegameno lyoye lya kola. Dhimbulukwa kutya, molwaashoka Jehova oKalunga koye, ino pumbwa okukala wa tila.