Ombiimbeli otayi ti shike kombinga yomalongelokalunga nosho wo iita yomoUkraine?

Tala uuyelele tawu landula kombinga yaawiliki yomalongelokalunga ngoka ga simanekwa nosho wo iita yomoUkraine.

• ‘Omuwiliki gwongeleka yaOrthodox moRusia, Patriarch Kirill, ke wete Rusia a ninga nando epuko lyasha, sho a homona Ukraine. Ongeleka ye oya kala tayi taandelitha omitotolombo kombinga yaUkraine, nomupelesidente Putin okwa longitha omitotolombo ndhoka i ipopile kutya oku na uuthemba wokuhinga iita.’ — EUobserver, 7 Maalitsa 2022.

• “Patriarch Kirill . . . okwa tsu omuthindo kutya inashi puka nokuli sho Rusia ta ponokele Ukraine, oshoka aniwa iita mbyoka oyi li onkambadhala yokukondjitha uulunde.” — AP News, 8 Maalitsa 2022.

• “Omuwiliki gwongeleka yaOrthodox moUkraine, gwedhina Metropolitan Epiphanius I gwomoshilandopangelo Kyiv, mOmaandaha okwa laleke nuuyamba oshigwana shi ‘ka kondjithe aakwiita yaRusia mboka taye shi ponokele’ . . . . [Okwa] ti wo kutya okudhipaga aakwiita yaRusia kashi shi uulunde nando.” — Jerusalem Post, 16 Maalitsa 2022.

• “Tse [Ongongahangano yOongeleka dhaUkraine nosho wo Omahangano gopalongelokalunga (UCCRO)] otatu yambidhidha etangakwiita lyaUkraine nosho wo ayehe mboka taye tu popile, otatu ya halele omayambeko sho taya popile Ukraine komutondi ngoka e na onyanya, notatu ya galikanene.” — Etyokosho lyo-UCCROa, 24 Febuluali 2022.

Ngoye oto ti ngiini? Mbela omalongelokalunga ngoka tagi iti kutya otaga landula oshinkoti shaJesus Kristus oge na ngaa okuladhipika iilyo yago yi kuthe ombinga miita? Ombiimbeli otayi ti ngiini?

Ondjokonona yomalongelokalunga ngele tashi ya miita

Ondjokonona otayi ulike kutya omalongelokalunga olundji oga kala nokupopila iita, taga ti inashi puka okuya kiita, nenge nokuli okukutha ombinga miita opo aniwa ga kaleke po ombili. Uule womimvo, Oonzapo dhaJehova odha kala nokwaaneka pomutenya iihelele mbyoka yomalongelokalunga. Natu tale kiiholelwa yimwe yaashoka sha popiwa miileshomwa yetu.

• Oshitopolwa “The Crusades—A ‘Tragic Illusion,’” osha ti kutya ongeleka yaKatoolika kaRoma oya dhipagitha aantu oyendji, tayi ti kutya otayi shi ningi medhina lyaKalunga nolyaKristus.

• “Ongeleka yaKatoolika moAfrika” oya gandja oshiholelwa shankene oongeleka dha ndopa okukeelela iita yopamuhoko nosho wo nokuli omadhipago gakiinahenda.

• Oshitopolwa “Is Religion to Blame?,” “Religion’s Role in Man’s Wars,” nosho wo “Religion Takes Sides,” oya yelitha nkene aasita yongeleka yaKatoolika, yaOrthodox nosho wo yAaprotestande ya li ya yambidhidha aakwiita yoongundu dhopaali ndhoka dha li tadhi kondjithathana.

Omalongelokalunga gopaKriste oge na ngaa okukutha ombinga miita?

Shoka Jesus a longo: “Hola mukweni ngaashi ngoye wi ihole mwene.” (Mateus 22:39) “Holeni aatondi yeni.” — Mateus 5:44-47.

Shoka Jesus a ti: “Uukwaniilwa wandje kau shi womuuyuni mbuka. Ando uukwaniilwa wandje owa li womuuyuni mbuka, ando aantu yandje ya kondjele ndje ndaa gandjwe.” (Johannes 18:36) “Ayehe mboka taa longitha egongamwele, oyo otaa ka sa kegongamwele.” — Mateus 26:47-52.

Dhiladhila kwaashika: Ngele Aakriste kaya li nokuli ye na okukondja opo ya gamene Jesus, mbela oye na ngaa okukondja omolwetompelo lilwe? Oto vulu okulesha oshitopolwa “Is War Compatible With Christianity?,” opo wu mone nkene Aakriste aadhiginini yopetameko ya li ya landula thiluthilu oshiholelwa shaJesus nomalongo ge.

Oshike tashi ka ningilwa omalongelokalunga ngoka haga humitha komeho iita?

Ombiimbeli otayi ti kutya Kalunga ina hokwa omalongelokalunga ngoka taga ti kutya ogi itaala muJesus, ihe ihaga landula omalongo ge. — Mateus 7:21-23; Titus 1:16.

• Embo lyEhololo otali ulike kutya Kalunga okwa tala ko omalongelokalunga ngoka kutya ogo ge na ondjo yombinzi “yaantu ayehe mboka ya dhipagwa kombanda yevi.” (Ehololo 18:21, 24) Opo wu mone kutya omolwashike, lesha oshitopolwa, “What Is Babylon the Great?”

• Jesus okwa popya kutya omalongelokalunga agehe ngoka inaaga hokiwa kuKalunga otaga ka hanagulwa po omolwuukolokoshi wago, ngaashi owala omuti omwiinayi ngoka hagu imi iiyimati iiwinayi ‘tagu kewa po notagu umbilwa momulilo.’ (Mateus 7:15-20) Lesha oshitopolwa, “Ehulilo lyomalongelokalunga giifundja oli li popepi!,” wu mone nkene shoka tashi ka ningwa.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images