Kolumoho: Oshikungulu hashi ithanwa Ian, moFlorida, shaAmerika, muSeptemba 2022 (Sean Rayford/Getty Images); pokati: Omukulukadhi pamwe nomwanamati taya yi ontuku, moDonetsk, shaUkraine, muJuli 2022 (Alex Chan Tsz Yuk/SOPA Images/LightRocket via Getty Images); kolulyo: Aantu oyendji taya konakonwa o-COVID, moBeijing, shaChina, muApilili 2022 (Kevin Frayer/Getty Images)
KALENI MWA TONATA!
Omumvo 2022 ogwa li gwa piyagana—Ombiimbeli otayi ti ngiini?
Momumvo 2022, iinima ngaashi iita, eliko lya gwa pevi, iiponga yopaunshitwe oya kala tayi dhana onkandangala moonkundana esiku kehe. Ombiimbeli oyo owala tayi tu kwathele tu uve ko kutya omolwashike iiningwanima mbyoka tayi ningwa.
Iiningwanima yomo 2022 otayi ti lela shike?
Iiningwanima mbyoka ya li ya ningwa momumvo gwa zi ko otayi gandja lela uumbangi kutya otu li ‘momasiku gokomeho’ nenge tu tye ga hugunina ngoka ga popiwa mOmbiimbeli. (2 Timoteus 3:1) Omasiku ngoka ga hugunina oga tameke mo 1914. Ndhindhilika nkene iiningwanima mbyoka tayi ningwa pethimbo lyetu, tayi tsu kumwe naashoka Ombiimbeli ya hunganeka tashi ka ningwa pethimbo lyetu:
“Omalugodhi.” — Mateus 24:6.
“Momumvo 2022, onkalo moEuropa oya nayipala natango, omolwiita.”a
Tala oshitopolwa, “Rusia ta ponokele Ukraine.”
“Oondjala.” — Mateus 24:7.
“Ondjala oya kala tayi tyakaleke momumvo 2022.”b
Tala oshitopolwa, “Iita yokoUkraine oya ningitha iikulya yi kale ya pumba muuyuni awuhe.”
‘Omalega.’ — Lukas 21:11.
“Opolio oya tukuka natango muuyuni, omukithi gwedhina monkeypox ogwa kala omukundu omunene, aantu onkene ngaa taya tsikile okusa komukithi gwekomba gwo-COVID-19. Oonkalo ndhono odhe shi ulika kutya omikithi dholutapo odha nika oshiponga nonokutya aantu oye li monkugo yi na onkambe.”c
Tala oshitopolwa, “Aantu omamiliyona gahamano, mboka ya sa komukithi gwo-Corona.”
Iinima “iitilithi iinene.” — Lukas 21:11.
“Ethimbo lyothinge mo 2022 itatu li dhimbwa nando, omolwelunduluko lyonkalo yombepo ndyoka inaali monika nale, ndono lya faalele oomwenyo dhaantu omayovi, nokuhanagula po omagumbo gaantu omamiliyona. Uupyu owa li wa londa pombanda, iikukuta, omapeya nomafundja.”d
Tala oshitopolwa, “Elunduluko lyonkalo yombepo inaali monika nando onale muuyuni awuhe.”
“Omapiyagano.” — Lukas 21:9.
“Momumvo 2022 omakanka ge li ompinge nomapangelo oga li ga indjipala, oshoka aantu oyendji oya geya omolwuuhupilo tawu shongola, naunene tuu sho oondando dhiinima dha londo pombanda noonkondo.”e
Tala oshitopolwa, “Oondando dhiinima ndhoka tadhi londo pombanda noonkondo.”
Oshike tashi ka ningwa po momumvo tagu ya?
Kapu na naanaa ngoka e shi kutya oshike tashi ka ningwa mo 2023. Ihe shoka tu shi osho kutya masiku Uukwaniilwa waKalunga, nenge epangelo lyomegulu, otali ka eta omalunduluko omanene kombanda yevi. (Daniel 2:44) Epangelo ndyoka otali ka hulitha po, iinima ayihe mbyoka hayi etele aantu okumona iihuna nokushilipaleka kutya ehalo lyaKalunga otali gwanithwa kombanda yevi.—Mateus 6:9, 10.
Otatu ku ladhipike wu landule omayele gaJesus Kristus ngoka taga ti: “Tonateni!” Otwa pumbwa okukala twa tonata, opo tu mone nkene iiningwanima yuuyuni tayi gwanitha po omahunganeko gOmbiimbeli. (Markus 13:37) Otatu ku indile wu kwatathane natse, opo wu ilonge oshindji kombinga yankene Ombiimbeli tayi vulu oku ku kwathela ngashingeyi nonokutya ongiini tayi vulu oku mu pa etegameno lyonakuyiwa ombwanawa, ngoye naantu yaandjeni.
a Oohapu dha za moshikundaneki shedhina AP News, moshitopolwa shi na oshipalanyolo: “2022 Was Year the Horror of War Returned to Europe,” sha nyanyangidhwa kuJill Lawless, mo 8 Desemba 2022.
b Oohapu dha za moshitopolwa, “A Global Food Crises,” sha nyanyangidha kEhangano lyOkugandja Iikulya mUuyuni.
c Oohapu dha za moshitopolwa shi na oshipalanyolo: “Living in an Age of Pandemics—From COVID-19 to Monkeypox, Polio, and Disease X,” sha nyanyangidhwa mo 22 Septemba 2022 kuLawrence O. Gostin, JD, moonkundana dho-JAMA Health Forum.
d Oohapu dha za kepandja lyokointaneta lyehangano lyedhina Earth.Org, moshitopolwa shi na oshipalanyolo: “What’s Behind the Record-Breaking Extreme Weather Events of Summer 2022?,” dha nyanyangidhwa kuMartina Igini, mo 24 Kotoba 2022.
e Oohapu dha za moshitopolwa shi na oshipalanyolo: “Economic Anger Dominated Global Protests in 2022,” shehangano lyedhina, Carnegie Endowment for International Peace, sha nyanyangidhwa kuThomas Carothers nosho wo Benjamin Feldman, mo 8 Desemba 2022.