Mbela uudhano wetanga lyokoompadhi wEkopi lyUuyuni, otawu vulu ngaa shili okuhanganitha aantu? — Ombiimbeli otayi ti ngiini?

Aantu omabiliyona gatano lwaampono, oya li ya tegelelika ya ka tale uudhano wekopi lyuuyuni, mboka wa tamekele momasiku 20 Novomba sigo 18 Desemba 2022. Oyendji ohaya kala ye uvite kutya iiningwanima mbyoka yomaudhano, ohayi kwathele lela aantu shi vulithe owala poku ya hanganitha.

• Omupresitende omukulu gwaSouth Afrika, Nelson Mandela, okwa tile: “Uudhano owu na oonkondo dhokulundulula uuyuni. Owu na wo oonkondo dhokwiinyengitha aantu ya ninge sha. Owu na natango oonkondo dhokuhanganitha aantu momukalo gwi ikalekelwa.”

• Omupresitende guudhano wo-FIFA,a Gianni Infantino, okwa ti: “Uudhano wetanga lyokoompadhi . . . ohawu ningitha aantu ya kale ye na etegameno, ya nyanyukwa, ye hole aantu ooyakwawo noye wu hole noonkondo.”

Mbela uudhano wokoompadhi wekopi lyuuyuni nenge wulwe, otawu vulu ngaa shili okweetela aantu iizemo mbyoka? Mbela ohawu etele ngaa aantu ombili noku ya hanganitha?

Mbela udhano mbono ohawu hanganitha ngaa shili aantu?

Uudhano wetanga lyokoompadhi wekopi lyuuyuni womumvo nguka, owa ningitha aantu ya dhiladhile oshindji shi vuluthe petanga. Uudhano mbuka owa ningitha aantu ya kale taya popi kombinga yiinima yi na ko nasha nonkalathano nosho wo nopolitika, ya kwatela mo uuthemba womuntu, uukwamuhoko nosho wo uukwaathikepamwe muuhupilo.

Nonando ongawo, aantu oyendji oya mona kutya iiningwanima yomaudhano yopaigwana, ngaashi uudhano wekopi lyuuni ohayi nyanyudha. Ihe uushili owo kutya iiningwanima mbika itayi vulu okuhanganitha aantu sigo aluhe. Pehala lyaashono, olundji ohayi ulike iikala yokweeta etopoko nosho wo iilonga mbyoka ya popiwa kOmbiimbeli kutya otayi ka kala endhindhiliko ‘lyomasiku gahugunina.’—2 Timoteus 3:1-5.

Etegameno lyashili lyokuhanganitha uuyuni

MOmbiimbeli omu na etegameno lyashili lyokuhanganitha aantu muuyuni. Oya uvaneka kutya aantu ayehe kombanda yevi, otaya ka hangana kohi yepangelo lyomegulu, ndyoka hali ithanwa “Oshilongo shaKalunga.” — Lukas 4:43; Mateus 6:10.

Omukwaniilwa gUukwaniilwa mboka, Jesus Kristus, ota ka shilipaleka kutya muuyuni awuhe omu na ombili. Ombiimbeli otayi ti:

• “Uuyuuki nau pangele methimbo lye; ombili nayi kale moshilongo, manga omwedhi tagu minikile.” — Episalomi 72:7.

• “Ota hupitha ohepele ngo te mu lilile, . . . Ote ya hupitha methiminiko nomepiyagano.” — Episalomi 72:12, 14.

Nokuli nokunena, omalongo gaJesus oga hanganitha nale aantu omamiliyona miilongo 239. Oyi ilonga okukala ye hole aantu ooyakwawo, pehala lyoku ya tonda. Ngele owa hala okumona uuyelele owundji, lesha iitopolwa yi na oshipalanyolo “Nkene to vulu okuyanda uutondwe.”