Omolwashike opolotika hayi topola aantu noonkondo? — Ombiimbeli otayi ti ngiini?

Muuyuni awuhe, iigwana oyindji oya topolwa kopolotika. Shi ikolelela kolopota yomo 2022, yehangano lyokukonga omauyelele hali ithanwa Pew Research Center, olya ti kutya “oopelesenda 65 dhaakuluntu yomiilongo 19, otaya ti kutya opu na okwaauvathana kwa kwata miiti pokati kaantu mboka haya ambidhidha oongundu dhopapolotika dha yoolokathana.”

Mbela owe shi ndhindhilika ngaa kutya aantu moshilongo sheni oya topoka noonkondo, omolwopolotika? Omolwashike shi li ngawo? Mbela opu na shoka tashi vulu okuningwa po? Tala shoka Ombiimbeli tayi ti.

Iikala mbyoka hayi eta etopoko

Ombiimbeli oya uvaneka kutya “komasiku gokomeho,” ano ya ukitha pethimbo lyetu ndika lyomasiku gahugunina, aantu oyendji otaya ka kala ye na iikala mbyoka tayi shi ningitha oshidhigu ya kale ya hangana.

• “Komasiku gokomeho otaku ke ya omathimbo omadhigu. Aantu otaa ka kala nokwiihola, . . . yaa na olukeno nohenda.” — 2 Timoteus 3:1-3.

Nonando aantu oyendji ohaya longo nuudhiginini ya kwathele omapangelo ga pondole, ohaya hulile owala mokwena kwa thita. Nokuli naantu mboka ye na omataloko ge li ompinge nago, ohaye shi mono oshidhigu nenge itaashi wapa ya longele kumwe, opo ya kandule po omaupyakadhi. Iizemo mbyoka oya koleka shoka Ombiimbeli ya hunganeka nalenale.

• “Omuntu gumwe ta dhiladhilile mukwawo oshiponga.” — Omuuvithi 8:9.

Nonando ongawo, Ombiimbeli oya popya shoka tashi vulu okweeta ekandulopo, ano epangelo ndyoka tali wilikwa kungoka ta vulu okuhulitha po omaupyakadhi, ngoka haga ningitha aantu ya mone iihuna kunena.

Omuwiliki ngoka a gwana okulela aantu noku na ko nasha natse

Ombiimbeli oya popya kombinga yomuwiliki ngoka i ikalekelwa nokwa gwana okulela aantu, ano Jesus Kristus. Jesus oku na oonkondo, uuthemba nosho wo ehalo lyokuhanganitha aantu ayehe noku ya etela ombili.

• “Uuyuuki nau pangele methimbo lye; ombili nayi kale moshilongo.” — Episalomi 72:7.

• “Iigwana ayihe otayi ke mu longela.” — Episalomi 72:11.

Jesus omuwiliki omwaanawa, oshoka oku na ko nasha naantu nokwa hala oku ya kwathela, unene tuu mboka ya kala nokuungaungiwa nayo kaashi li pauyuuki.

• “Ota hupitha ohepele ngo te mu lilile, omuthiminikwa ngo kee na ngo te mu kwatha. Ota sile oshimbembe nohepele olukeno note ya hupitha meso. Ote ya hupitha methiminiko nomepiyagano.” — Episalomi 72:12-14.

Ilonga oshindji kombinga yUukwaniilwa waKalunga, epangelo lyomegulu ndyoka tali wilikwa kuJesus. Tala nkene to vulu okumona mo uuwanawa nankene to vulu oku li yambidhidha.

• Tala okavidio Uukwaniilwa waKalunga oshike?

• Lesha oshitopolwa “Uukwaniilwa waKalunga, epangelo kaali na uulingilingi.”