Omatompelo gokukala tu na etegameno mo 2023 — Ombiimbeli otayi ti ngiini?

Sho omumvo 2023 gwa tameke, kapu na omalimbililo kutya atuheni otwa hala gu tu endele nawa nosho wo aantu yaandjetu. Omolwashike tatu vulu okukala tu na etegameno ndyoka?

Ombiimbeli otayi tu pe etegameno

MOmbiimbeli omu na onkundana ombwanawa, ndjoka kutya omaupyakadhi ngoka hatu iyadha mugo ngashingeyi ogopakathimbo notaga ka hulithwa po masiku. Ombiimbeli oya ‘nyolwa yi tu longe, opo tu kale tu na omukumo, ngele tatu lesha Oohapu dhaKalunga.’ — Aaroma 15:4.

• Opo wu ilonge oshindji kombinga yaashoka Ombiimbeli ya uvaneka, lesha oshitopolwa “A Real Hope for a Better Tomorrow.”

Etegameno ndyoka tali vulu oku ku kwathela ngashingeyi

Etegameno ndyoka lya popiwa mOmbiimbeli, “olya kwata lya dhiginina oomwenyo dhetu.” (Aahebeli 6:19) Etegameno ndyoka otali vulu oku tu koleka. Otali vulu oku tu kwathela tu idhidhimikile omaupyakadhi ngoka hatu iyadha mugo ngashingeyi, tu kale tu na etaloko ewanawa notu kale tu na enyanyu tali kalelele. Pashiholelwa:

• Tala nkene etegameno ndyoka li li mOmbiimbeli lya li lya kwathele omulumentu gumwe ngoka a li a pikwa kiikolitha. Tala okavidio Onda li nda kenyanana iikala yandje.

• Tala nkene etegameno ndyoka li li mOmbiimbeli tali vulu oku tu kwathela, uuna twa silwa aaholike yetu. Tala okavidio Ehekeleko kwaamboka ya silwa.

Koleka etegameno lyoye

Aantu oyendji ohaya kala ya tegelela iinima iiwanawa yi ningwe, ihe ihaya kala naanaa ye na uushili kutya shono ya tegamena onashi ka gwanithwe po. Ihe ngele tashi ya pomauvaneko gOmbiimbeli, hasho shi li ngawo. Omolwashike mbela? Omolwaashoka omauvaneko gOmbiimbeli oga za kuJehova Kalungaa ye mwene, “ngoka ihaa fundju.” (Titus 1:2) Jehova oye owala e na oonkondo dhokugwanitha po omauvaneko ge agehe, noha “longo ashihe shoka she mu opalela.” — Episalomi 135:5, 6.

Otatu ku indile nesimaneko enene wu mone mo uuwanawa metegameno ndyoka li li mOmbiimbeli, oshoka oli shi okwiinekelwa. Oto vulu okukala neinekelo lya kola metegameno ndyoka, ‘mokukonakona Omanyolo.’ (Iilonga 17:11) Shi imonena ko ngoye mwene, mokukambadhala okukonakona Ombiimbeli pamwe natse oshali. Momumvo 2023, kala wu na etaloko ewanawa kombinga yonakuyiwa!