Nkene Ombiimbeli tayi tu kwathele tu idhidhimike notu simaneke omataloko gayalwe
Mo 1995, ehangano UNESCO olya popi kombinga yomakotampango ge na ko nasha neidhidhimiko, lya ti: “Aantu otaya vulu owala okukala ye na ombili, ngele oya kala hayi idhidhimikilathana.”
Okwaa na eidhidhimiko ohaku ningitha aantu ya kale kaaye na esimaneko noye tondathane. Olundji omaiyuvo ngono, ohaga ningitha aantu ya popye oohapu oombwinayi, ya kale ye na okatongo naakolokoshi.
Uushili owo kutya ngele tashi ya peidhidhimiko, aantu oye na omataloko ga yoolokathana. Yamwe oyi itaala kutya aantu mboka hayi idhidhimike, naya kale ye hole kehe shoka yalwe taya ningi. Yalwe oye na etaloko lyopaMbiimbeli, ndyoka kutya aantu mboka aaidhidhimiki ohaya simaneke uuthemba wayalwe wokuhogolola shoka ya itaala, nonando yo itaya tsu kumwe nasho.
Mbela Ombiimbeli otayi vulu ngaa okukwathela aantu ya kale shili aaidhidhimiki muuyuni mbuka?
Shoka Ombiimbeli tayi ti kombinga yeidhidhimiko
Ombiimbeli otayi popile eidhidhimiko. Otayi ti: “Kaleni mu na olukeno naantu ayehe.” (Aafilippi 4:5) Ombiimbeli otayi tu ladhipike tu ungaunge nayalwe nondjaalela nomomukalo omwaanawa. Mboka haya tula miilonga omayele ngaka, otashi vulika kaaya tse kumwe nenge kaaya taambe ko shoka hashi ningwa kugulwe, ihe ohaye mu etha a ninge shoka a tokola okuninga.
Nonando ongawo, Ombiimbeli oya popya kutya Kalunga okwa tula po omithikampango dhi na ko nasha nankene omuntu e na okwiihumbata. Oya ti: “Omuwa okwe tu lombwela shoka shu uka.” (Mika 6:8) Omu na wo omalombwelo ngoka Kalunga a pa aantu, opo ge ya kwathele ya nyanyukilwe onkalamwenyo ngaashi tashi vulika. — Jesaja 48:17, 18.
Kalunga ine tu pa uuthemba wokupangula yalwe. Ombiimbeli otayi ti: “Kalunga oye omugandjimpango nomupanguli. . . . Ongoye lye ano, u vule okupangula mukweni?” (Jakob 4:12) Kalunga okwa pa kehe gumwe gwomutse emanguluko lyokuninga omatokolo, notse yene tu na oku ga kalela po. — Deuteronomium 30:19.
Shoka Ombiimbeli tayi ti kombinga yesimaneko
Ombiimbeli oya ti: “Simanekeni aantu ayehe.” (1 Petrus 2:17) Onkee ano, mboka haya kala metsokumwe nomithikampango dhOmbiimbeli, ohaya ungaunga naantu ayehe nesimaneko kutya nduno oyeitaalo lini noye na onkalamwenyo ya tya ngiini. (Lukas 6:31) Shika inashi hala okutya mboka haya vulika kudho otaya ka tsa kumwe neitaalo kehe nenge nomadhiladhilo kehe ngoka yalwe ye na. Itashi ti wo kutya otaya ka ambidhidha etokolo kehe tali ningwa kuyalwe. Nonando ongawo, itaye ki ihumbatela yalwe nayi nenge momukalo kaagu shi gwesimaneko, ihe otaya ka ninga ngaashi taya vulu ya holele omukalo moka Jesus a li ha ungaunga nayalwe.
Pashiholelwa, pompito yimwe Jesus okwa li a tsakanene nomukiintu gwelongelokalunga ndyoka itaa tsu kumwe nalyo. Omukiintu nguka okwa li wo ha zi nomulumentu ngoka kee shi omusamane gwe, onkalamwenyo ndjoka Jesus a li itaa tsu kumwe nayo. Nonando ongawo, okwa li a popi nomukiintu nguka nesimaneko. — Johannes 4:9, 17-24.
Ngaashi Jesus, Aakriste nayo ohaya kala yi ilongekidha okuyelithila yalwe mboka ye na ehalo lyokupulakena shoka ya itaala, ihe ohaye shi ningi ‘nesimaneko.’ (1 Petrus 3:15) Ombiimbeli otayi longo kutya Aakriste kaye na okuthiminikila yalwe omataloko gawo. Otayi ti kutya omulanduli gwaKristus ina “pumbwa okutamanana. Oye oku na okukala . . . e na olukeno naayehe,” mwa kwatelwa naamboka yeitaalo lya yooloka ko kulye. — 2 Timoteus 2:24.
Shoka Ombiimbeli tayi ti kombinga yuutondwe
Ombiimbeli otayi tu lombwele tu kambadhale “okukala nombili naantu ayehe.” (Aahebeli 12:14) Omuntu ngoka ha lalakanene ombili, oha yanda okukala e tonde yalwe. Nonando iha ningi shoka shi li ompinge naashoka a itaala, oha ningi oonkambadhala a kale nayalwe nombili. (Mateus 5:9) Ombiimbeli otayi ladhipike wo Aakriste ya kale ye hole aatondi yawo, moku ya ihumbatela nawa. — Mateus 5:44.
Uushili owo kutya Ombiimbeli otayi ti Kalunga oku “tonde” oonkatu dhaantu, ndhoka hadhi shindula yalwe nenge tadhi ya etele oshiponga. (Omayeletumbulo 6:16-19) Ihe mpaka Ombiimbeli oya longitha oshitya “tonde,” yi yelithe eiyuvo lyomuule lyokukala wu tonde oonkatu oombwinayi. Ombiimbeli oya ulika kutya Kalunga oku na ehalo lyokudhimina po nokukwathela aantu mboka ya hala okuninga omalunduluko nokukala ye li metsokumwe nomithikampango dhe. — Jesaja 55:7.
Oovelise dhOmbiimbeli ndhoka tadhi popi kombinga yeidhidhimiko noyesimaneko
Titus 3:2: ‘Kaleni mu na uukuume nolukeno naantu ayehe.’
Omuntu ngoka e na olukeno, oha inyenge komadhiladhilo gayalwe momukalo omwaanawa, shoka hashi humitha komeho esimaneko pokati komuntu nomuntu.
Mateus 7:12: “Onkee ano shaa shoka mwa hala aantu ye mu ningile, osho ya ningileni wo.”
Atuheni ohatu shi pandula, uuna yalwe taya ungaunga natse nesimaneko nosho wo momukalo ngoka tagu ulike kutya oye na ko nasha netaloko lyetu nonomaiyuvo getu. Opo wu ilonge oshindji kombinga yankene to vulu okutula miilonga ompango ndjika ombwanawa Jesus e tu longa, tala oshitopolwa “What Is the Golden Rule?”
Josua 24:15: “Tokoleni nena ndjika ngoka tamu longele.”
Ohatu humitha komeho ombili, uuna twa simaneka uuthemba wayalwe wokuninga omatokolo.
Iilonga 10:34: “Kalunga aantu ayehe ohe ya tala ye thike pamwe.”
Kalunga iha tongola omuntu shi ikolelela keputuko, kuukashike ko okantu, kuukwashigwana nenge kolwaala lwe. Mboka ya hala okuholela Kalunga, ohaya simaneke aantu ayehe.
Habakuk 1:12, 13: “[Kalunga ita] vulu nando okwiidhidhimikila okutala aantu taa eta eyonuko.”
Eidhidhimiko lyaKalunga oli na ongamba. Ita ka pitika nando eihumbato lyaakolokoshi li tsikile sigo aluhe. Opo wu ilonge oshindji, tala okavidio Omolwashike Kalunga e etha uukolokoshi nokumona iihuna ku kale po?
Aaroma 12:19: “Etheni, ondjahi yaKalunga yi shi ninge. Oshoka enyolo otali ti: ‘Egeelo olyandje, ongame mwene tandi ka geela, Omuwa osho ta ti.’”a
Jehova Kalunga ina pitika nando omuntu a kwatele yalwe iikonene. Ota ka shilipaleka kutya okwa yukipalitha iinima pethimbo lye lya opala. Opo wu ilonge oshindji, lesha oshitopolwa “Will the Cry for Justice Be Heard?”
a Jehova olyo edhina lyaKalunga. (Exodus 15:3, OB-1954) Tala oshitopolwa “Jehova oye lye?”