Iita yokoUkraine oya ningitha iikulya yi kale ya pumba muuyuni awuhe

Mo 19 Mei 2022, Olaata yEgameno yIigwana ya Hangana oya kundana okuza kaakwanepangelo yoondondo dhopombanda ye vulithe 75, kutya “ondjala ndjoka ye etitha muuyuni komukithi gwekomba gwo-Corona nosho wo kelunduluko lyonkalo yombepo, ngashingeyi otayi nayipala omolwiita yomoUkraine. Oshileshomwa shedhina The Economist osha ti kutya, “aantu oyendji muuyuni mbuka wu udha nale omaupyakadhi ogendji, masiku otaya ka kala kaaye na shoka taya li omolwiita.” Ombiimbeli oya hunganeka kutya otaku ke ya ondjala pethimbo lyetu, ihe nando ongawo, otayi tu lombwele wo shoka tatu vulu okuninga po, tu ungaunge nonkalo ndjoka.

Ombiimbeli oya hunganeka kutya otaku ka kala ondjala

•  MuMateus 24:7, Jesus okwa hunganeke a ti: “ligwana otayi ka thikama okukondjithathana, iilongo otayi ka matukilathana. Otaku ke ya oondjala.”

•  Ehololo olya popya kombinga yaalondi yuukambe yane yopathaneko. Omulondi gwokakambe kamwe ota thaneke iita. Okwa landulwa komulondi gulwe gwokakambe ngoka ta thaneke ondjala, sho iikulya tayi ka ninga ondilo unene. Ehololo 6:5, 6 otali ti: ‘Onda mono ko okakambe okaluudhe. Omukayili gwako okwa li e na oshiviha moshikaha she. Ngame ondu uvu ewi lya ti: Okatungwa kiilyawala oke thike pondjambi yomesiku nosho wo uutungwa utatu womahangu.’

Omahunganeko ngono kombinga yondjala otaga gwanithwa ngashingeyi pethimbo lyetu, ndyoka Ombiimbeli tayi li ithana ‘omasiku gokomeho’ nenge tu tye omasiku gahugunina. (2 Timoteus 3:1) Ngele owa hala okwiilonga oshindji shi na ko nasha nomasiku gahugunina nosho wo naalondi yuukambe une mboka ya tumbulwa mEhololo, tala okavidio, The World Has Changed Since 1914 (Uuyuni owa lunduluka okuza mo 1914). Lesha wo oshitopolwa, “Aakayili yuukambe yane oolye?”

Nkene Ombiimbeli tayi vulu oku tu kwathela

•  Ombiimbeli oyi na omayele tage tu kwathele nkene tatu vulu okuungaunga noonkalo oondhigu, mwa kwatelwa oondando dhiikulya ndhoka tadhi ende tadhi londo esiku nesiku nosho wo ompumbwe yiikulya. Opo wu mone iiholelwa yimwepo, tala oshitopolwa “How to Live on Less” (Nkene to vulu okuhupa nokashona hoka wu na po).

•  Ombiimbeli otayi tu pe wo etegameno kutya oonkalo otadhi ka hwepopala. Oyu uvaneka mEpisalomi 72:16 kutya otapu ka kala ethimbo uuna ‘tapu ka kala eloolo lyiilya’ nakehe gumwe ota ka kala e na iikulya ya gwana. Ngele owa hala okuuva oshindji kombinga yaashoka Ombiimbeli yu uvaneka tashi ka ningwa monakuyiwa nonokutya omolwashike to vulu oku yi inekela, lesha oshitopolwa “A Real Hope for a Better Tomorrow” (Otwa tegelela oonkalo dhi ka lundulukile kuuwanawa).