Rusia ta ponokele Ukraine

Ongula onene mo 24 Febuluali 2022, etangakwiita lyaRusia olya ponokele Ukraine, nonando aawiliki miilongo oyindji oya li taya kambadhala okuyanda iita mbyoka. Iita mbika otayi ka guma ngiini uuyuni? Amushangandjayi gwiigwana ya Hangana António Guterres, omasiku opo ga zi ko okwa popi a ti: “Katu shi kutya emono lyiihuna ndika enenenene nosho wo ehanagulo otali ka guma ngiini egameno lyiilongo yaEuropa nosho wo uuyuni awuhe.”

Ombiimbeli otayi ti ngiini kombinga yiiningwanima mbika iindhindhilikwedhi?

• Jesus okwa hunganeka nale kutya “Iigwana otayi ka thikama okukondjithathana, iilongo otayi ka matukilathana.” (Mateus 24:7) Opo wu mone nkene kunena iita mbyoka tayi gwanitha po ehunganeko lyaJesus ndyoka li li mOmbiimbeli, lesha oshitopolwa, “What Is the Sign of ‘the Last Days,’ or ‘End Times’?” (“Endhindhiliko ‘lyomasiku gahugunina olini’ nenge ‘lyehulilo lyuuyuni’?”)

• Embo lyehololo olya popya kombinga yiita tayi thanekwa komukayili ‘gwokakambe okatiligane’ a pewa oonkondo “dhokuhomonena evi alihe iita.” (Ehololo 6:4) Opo wu mone nkene iita kunena tayi gwanitha po ehunganeko ndika, lesha oshitopolwa “Aakayili yuukambe yane oolye?”

• Embo lyaDaniel olya hunganeka iita pokati “komukwaniilwa gwokuumbangalantu” nosho wo “omukwaniilwa gwokuumbugantu.” (Daniel 11:25-45) Tala okavidio, Okugwanithwa kwehunganeko ndyoka li li muDaniel ontopolwa 11, opo wi ilonge kutya omolwashike Rusia naamboka yi imanga kumwe naye oyo ye li omukwaniilwa gwokuumbangalantu.a

• Ehololo olya popya wo kombinga ‘yiita mesiku enene lyaKalunga Omunankondoadhihe’ (Ehololo 16:14, 16) Ihe nonando ongawo, iita mbika kayi shi ngaashi mbyoka tu wete pokati kiigwana kunena. Opo wu mone uuyelele owundji kombinga yiiningwanima yomonakuyiwa, lesha oshitopolwa “What Is the Battle of Armageddon?” (“Iita yaArmagedon oshike?”)

Omolwashike tatu vulu okukala tu na etegameno lyonakuyiwa?

• Ombiimbeli otayi ti kutya Kalunga ota ka “hulitha po omalugodhi kombanda yevi alihe.” (Episalomi 46:9) Lesha oshitopolwa “A Real Hope for a Better Tomorrow” (“Etegameno lya shili otali ya masiku”) opo wi ilonge oshindji kombinga yonakuyiwa ndjoka Kalunga e tu uvanekela.

• Jesus okwa longa aalanduli ye ya galikane Oshilongo shaKalunga nenge tu tye Uukwaniilwa wu ye. (Mateus 6:9, 10) Uukwaniilwa mboka owo epangelo lyomegulu ndyoka tali ka ningitha ehalo lyaKalunga li longwe kombanda yevi notali ka eta ombili muuyuni awuhe. Opo wu ilonge nkene Uukwaniilwa tawu ke ku etela uuwanawa, tala okavidio, Uukwaniilwa waKalunga oshike?

MoUkraine omu na Oonzapo dhaJehova dhi vulithe 129 000. Ngaashi owala Oonzapo oonkwawo muuyuni, nadho ohadhi holele Jesus mokukala ihaadhi kutha ombinga mopolotika nosho wo miita. (Johannes 18:36) Oonzapo dhaJehova muuyuni awuhe otadhi tsikile okuuvitha ‘elaka etoye lyOshilongo’ nenge tu tye Uukwaniilwa waKalunga mboka owo owala tawu ka kandula po omaupyakadhi agehe gaantu, mwa kwatelwa wo iita. (Mateus 24:14) Ngele owa hala okwiilonga oshindji kombinga yetumwalaka lyetegameno ndyoka li li mOmbiimbeli, kwatathana natse.